Вы тут

Адкрылася выстаўка «Транспарт і лагістыка — 2016»


Учора пачаўся Х Беларускі транспартна-лагістычны кангрэс і адкрылася выстаўка «Транспарт і лагістыка — 2016». Да гэтага сёлетнія замежныя госці адкрыцця — міністры з Польшчы — паспелі правесці шэраг двухбаковых сустрэч, па выніку якіх дамовіліся развіваць беларуска-польскае супрацоўніцтва ў суднаходстве і прымежнай інфраструктуры.


На выставе.

Па словах Анатоля КАЛІНІНА, намесніка прэм'ер-міністра Рэспублікі Беларусь, беларускі транспартны тыдзень стаў міжнароднай пляцоўкай, на якой адбываецца абмен вопытам, абмяркоўваюцца планы на будучыню і ствараюцца новыя стратэгіі развіцця лагістыкі. «Наша рэспубліка знаходзіцца на мяжы двух найбольш буйных інтэграцыйных аб'яднанняў — Еўрапейскага і Еўразійскага эканамічнага саюзаў, з'яўляецца скрыжаваннем міжнародных транспартных шляхоў. Таму для нас важна выкарыстанне найлепшых сусветных практык нарошчвання міжнародных пасажырскіх і грузавых патокаў», — адзначыў ён.

Анатоль Калінін выказаў надзею, што па выніках кангрэсу будуць знойдзены новыя метады кіравання транспартам і лагістыкай, а галоўнае — працягнуць фарміравацца партнёрскія адносіны паміж бізнесам і дзяржавай. «Транспарт з'яўляецца найважнейшым складнікам росту эканомікі, таму ўрадам нашай краіны дадзенай сферы ўдзяляецца значная ўвага», — сказаў віцэ-прэм'ер.

Выстаўка «Транспарт і лагістыка — 2016» размясцілася ў мінскім Футбольным манежы. У ёй узялі ўдзел каля 70 арганізацый з 9 краін свету. Сярод задзейнічаных — транспартна-лагістычныя цэнтры, вытворцы і дылеры аўтатэхнікі, пастаўшчыкі абсталявання для аснашчэння лагістычных цэнтраў, страхавыя кампаніі, адміністрацыі марскіх партоў і кіравання чыгунак з СНД, блізкага і далёкага замежжа.

Ад разнастайнасці стэндаў на выстаўцы разбягаюцца вочы, аднак адразу прыцягвае ўвагу пляцоўка, арганізаваная Беларускай чыгункай. Ігар АДЛІГА, начальнік службы інфармацыйных тэхналогій чыгункі, трымае ў руках мадэль электроннай пломбы. «Наша інавацыя, — тлумачыць ён, — гэта новая тэхналогія электроннай пломбы. Яе выкарыстанне дапамагае як паскараць працэс камерцыйнага агляду грузу, так і спрашчаць працэдуры, звязаныя з праходжаннем мытні. Зараз яна праходзіць тэсціраванне». Па яго словах, такая электронная пломба можа выкарыстоўвацца перавозчыкамі ці ўладальнікамі грузаў. Яе аналагі існуюць і ў іншых краінах свету. Распрацоўка беларускай кампаніі «Наваком» каштуе ў дзесяць разоў танней за імпартныя, але не саступае па якасных характарыстыках.

На адкрыцці мерапрыемства таксама прысутнічалі і замежныя госці: міністр зносін Латвійскай Рэспублікі Улдзіс Аўгуліс, а таксама міністры з Польшчы, які паспелі правесці перамовы з айчынным міністэрствам транспарту і камунікацый. Па яго выніках было вырашана развіваць суднаходства паміж Беларуссю і Польшчай. Адпаведны мемарандум аб супрацоўніцтве ў галіне аднаўлення воднага шляху Е40 на ўчастку Днепр-Вісла падпісалі міністр транспарту і камунікацый Беларусі Анатоль СІВАК і міністр марской гаспадаркі і рачнога суднаходства Польшчы Марэк ГРУБАРЧЫК.

«Польшча і польская транспартная сістэма, транспартнае ведамства — нашы асноўныя партнёры ў плане развіцця транзіту», — заявіў Анатоль Сівак. Па яго словах, рост транзітных перавозак за восем месяцаў гэтага года склаў 13%. Пры гэтым найбольш актыўна развіваюцца кантэйнерныя перавозкі. Яны выраслі амаль у два разы ў параўнанні з мінулым годам у перыяд са студзеня па жнівень (напрамак з Кітая ў Еўропу і з Еўропы ў Кітай) — да 75 тысяч кантэйнераў.

Таксама бакі абмеркавалі пытанні развіцця пагранпераходаў, утрымання, рэканструкцыі аўтамабільных, чыгуначных мастоў. Быў падпісаны адпаведны мемарандум аб узаемаразуменні і паглыбленні супрацоўніцтва ў галіне чыгуначнага, аўтамабільнага і авіятранспарту. У хуткім часе плануецца падпісаць пагадненне аб будаўніцтве новага аўтадарожнага моста. «Мы ўзгаднілі свае планы развіцця інфраструктуры ІІ Агульнаеўрапейскага транспартнага калідора (Берлін — Познань — Варшава — Брэст — Мінск — Смаленск — Масква — Ніжні Ноўгарад. — «Звязда»). Таксама было расказана аб інтарэсе беларускіх экспартных прадпрыемстваў да польскіх партоў. Былі выказаны элементы, якія дазваляюць далей аб'ядноўваць інфраструктуру з гэтым праектам. Гэта палепшыць сувязь з поўднем Еўропы», — дадаў міністр транспарту і камунікацый.

Міністр інфраструктуры і будаўніцтва Польшчы Анджэй Адамчык адзначыў, што развіццё транспартнай інфраструктуры ўсіх тыпаў — авія-, аўтадарожнай, чыгуначнай — вельмі важнае для абедзвюх краін, і назваў яе «рухавіком прагрэсу». «Мы хочам быць канкурэнтаздольнымі ў Еўропе, а для гэтага неабходна супрацоўніцтва паміж Польшчай і Беларуссю», — падкрэсліў ён. У сваю чаргу, Марэк Грубарчык заявіў, што «пачаўся новы этап адносін паміж Беларуссю і Польшчай». Перш за ўсё — гэта пытанне ўз'яднання Варшавы і Брэста (Е-40) водным шляхам і выкарыстання польскіх партоў. Ужо створана спецыяльная працоўная група. «І дадатковы аргумент у развіцці гэтага кірунку: з пункту гледжання ўздзеяння на навакольнае асяроддзе гэта найбольш экалагічны від транспарту», — лічыць міністр марской гаспадаркі і рачнога суднаходства Польшчы.

Вераніка ПУСТАВІТ

pustavit@zviazda.by

Фота БЕЛТА

Загаловак у газеце: Суднаходства разам з Польшчай

Выбар рэдакцыі

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Вольга Здзярская: Для мяне мая прафесія — жыццё

Вольга Здзярская: Для мяне мая прафесія — жыццё

Актрыса НАДТ імя М. Горкага — пра шлях да сцэны і натхненне.

Грамадства

«Любоў — галоўнае, што бацькі павінны даць сваім дзецям»

«Любоў — галоўнае, што бацькі павінны даць сваім дзецям»

Тата і мама — два самыя важныя чалавекі ў жыцці кожнага дзіцяці.