19 Люты, панядзелак

Вы тут

Незалежны экзамен: узважыць усе «за» і «супраць»


Магчымасць правядзення праз некалькі гадоў нацыянальнага экзамену для выпускнікоў 11-х класаў разглядаюць у Міністэрстве адукацыі. Пра гэта ў праграме «Галоўны эфір» на «Беларусь 1» расказаў міністр адукацыі Міхаіл ЖУРАЎКОЎ.


У прыватнасці, прапрацоўваецца магчымасць правядзення ў 2019-2020 навучальным годзе незалежнай атэстацыі за 9-ты клас, а ў 2021-2022 навучальным годзе — нацыянальнага экзамену ў 11-ым класе. Па словах міністра, пытанні ўдасканалення форм здачы экзаменаў абмяркоўваюцца пастаянна, але абсалютна справядлівай і карэктнай формы пакуль яшчэ не прыдумалі. Ёсць прапановы па ўдасканаленні выпускных іспытаў. Асабліва актуальна гэта стала пасля ўвядзення ў школах профільнага навучання.

Форму нацыянальнага экзамену прапануецца зрабіць камбінаванай, але аснову яго будзе складаць цэнтралізаванае тэсціраванне. Першая частка гэтага іспыту стане праверкай ведаў «за школу», а другая частка будзе абавязковая для тых, хто сабраўся паступаць у сярэднія спецыяльныя і вышэйшыя навучальныя ўстановы. У ёй прапануецца акрамя пісьмовых адказаў, увесці і вусныя. Гэтую частку, магчыма, будуць распрацоўваць самі ўніверсітэты ў залежнасці ад спецыфікі спецыяльнасці, на якую прэтэндуе абітурыент. Напрыклад, сёння ўсе заданні ў тэсце па матэматыцы аднолькавыя і для тых, хто здае гэту дысцыпліну на факультэт прыкладной матэматыкі і інфарматыкі, і для тых, хто паступае на юрыдычныя спецыяльнасці.

У другую частку нацыянальнага экзамену ўвойдуць розныя формы, разлічаныя на вывучэнне здольнасцяў абітурыента ў залежнасці ад абранай спецыяльнасці, у тым ліку і гутарка.

Па словах міністра, ужо сёння абітурыенты пры паступленні больш чым на 200 спецыяльнасцяў здаюць дадатковыя іспыты ў залежнасці ад спецыфікі ВНУ. Сярод іх — спартыўныя, ваенныя, творчыя спецыяльнасці, а таксама журналістыка.

— Мы пачынаем шырокае абмеркаванне гэтых прапаноў: плануюцца сустрэчы з дэпутатамі, настаўнікамі, выкладчыкамі, бацькоўскай грамадскасцю, — паведаміў міністр.

Што да ўвядзення незалежнай атэстацыі за курс базавай школы, то гэта прапанова выказвалася яшчэ пры абмеркаванні ўнясення паправак у Кодэкс аб адукацыі. Не сакрэт, што ў цяперашніх выпускных экзаменах за курс базавай школы, якія праводзяць «свае» ж настаўнікі, ніхто сэнсу не бачыць, паколькі яны пазбаўлены аб'ектыўнасці. Да незалежнай атэстацыі паступова пераходзяць у многіх краінах. У Расійскай Федэрацыі абавязковая дзяржаўная выніковая атэстацыя дзевяцікласнікаў таксама ажыццяўляецца на незалежнай аснове.

Як варыянт, школьнікам могуць быць прапанаваны стандартызаваныя заданні, якія правяраюцца камп'ютарам, але экзаменацыйная работа абавязкова павінна змяшчаць і заданне творчага характару, якое будзе правярацца незалежным педагогам.

Усе ўпэўненыя, што будучыня — за незалежнымі формамі ацэньвання. Але яшчэ ёсць час узважыць усе «за» і «супраць» і падрыхтаваць і дзяцей, і педагогаў да экзаменацыйнага новаўвядзення...

Надзея НІКАЛАЕВА

nіkalaeva@zvіazda.by

Дадаць каментар

Выбар рэдакцыі

Палітыка

Прэзідэнт паўдзельнічаў у выбарах і адказаў на пытанні журналістаў

Прэзідэнт паўдзельнічаў у выбарах і адказаў на пытанні журналістаў

За каго аддаць свой голас, якога кандыдата лепей абраць у дзень выбараў у мясцовыя Саветы дэпутатаў? 

Калейдаскоп

Як прайшоў фінал нацыянальнага адбору на «Еўрабачанне»

Як прайшоў фінал нацыянальнага адбору на «Еўрабачанне»

Беларусь на конкурсе прадставіць украінец ALEKSEEV.

Культура

«Бум культурных стартапаў стане новым вітком эканомікі»

«Бум культурных стартапаў стане новым вітком эканомікі»

Некалькі месяцаў таму адна з найпапулярнейшых сталічных вуліц Кастрычніцкая ўзбагацілася на яшчэ адно «тусовачнае» месца — «Ок16».

Калейдаскоп

Вясёлыя гісторыі чытачоў

Вясёлыя гісторыі чытачоў

Праславіў Някрасаў рускую жанчыну, на вякі праславіў!