Вы тут

Выбіраем правільную тактыку, як «адшыць» паклонніка раз і назаўсёды


Адчапіцца ад абрыдлага вам бойфрэнда не так і складана — варта толькі праявіць крыху кемлівасці і артыстызму. І... выбраць правільную тактыку.


«Міс Неадэкватнасць»

Дзівацтвы і непрадказальнасць жанчыны нічога, акрамя забабоннага жаху, у мужчын не выклікаюць. Таму смела трымайцеся прынцыпу «Не чакайце дзіва — дзівачце самі»: навучыцеся вычварным словам і жэстам, дэманструйце недарэчныя эмоцыі. Напрыклад, гучна рагачыце, калі кавалер расказвае вам пра смерць любімага коціка. Альбо захапіцеся эзатэрыкай і стамляйце яго штодзённым гараскопам або раскладаннем карт таро. А яшчэ вазьміце за правіла тэлефанаваць «каханаму» сярод ночы з просьбай прадэкламаваць што-небудзь з творчасці, скажам, Іосіфа Бродскага. І абавязкова дапоўніце свой вобраз гардэробам а-ля гарадская вар'ятка.

Як гэта дзейнічае? Мужчына імкнецца да такіх стасункаў, якія б ураўнаважвалі яго жыццё, давалі магчымасць чэрпаць у іх рэсурсы. А калі з жанчынай не ведаеш, чаго чакаць, — гэта напружвае.

«Атэла ў спадніцы»

Галоўны прынцып гэтай стратэгіі — татальны кантроль над жыццём мужчыны. Раўнуйце яго да ўсіх прадстаўніц жаночага полу, якія маюць да яго хоць нейкае дачыненне, — да сястры, калег, прадаўшчыцы ў краме і да т.п.

Тэлефануйце яму кожныя 15 хвілін і патрабуйце даць справаздачу, дзе ён і з кім. Штодня правярайце ўсе яго акаўнты ў сацсетках і, вядома, SMS! Прычым кожны раз настойвайце на тлумачэннях у сувязі з усімі выяўленымі там фактамі — дададзенымі сябрамі, фотаздымкамі і інш.

Як гэта дзейнічае? У кожнага чалавека павінна быць права на асабістую прастору. А беспрычынная рэўнасць, пастаянны кантроль, забарона на сустрэчы з сябрамі «забіваюць» нават самыя моцныя пачуцці.

«Мамачка»

Мужчынам, безумоўна, падабаецца клопат пра іх, але да таго часу, пакуль ён не перарастае ў звышапеку. Таму ваша мэта — стаць другой маці для свайго паклонніка. Нястомна завіхайцеся на кухні, гатуючы для яго розныя стравы. А калі раптам ён скажа, што не галодны, страшна пакрыўдзіцеся! Дакучліва цікаўцеся станам яго здароўя: ці не схуднеў ён; чаму такі бледны; ці ўсё ў парадку з кішэчнікам... Пры нязначнай скарзе бойфрэнда на недамаганне адразу з заклапочаным выглядам бяжыце ў аптэку — яго трэба ратаваць!

Як гэта дзейнічае? «Жанчына-маці» заўсёды ставіць мужчыну ў зневажальнае становішча маленькага бездапаможнага дзіцяці. І пры такім раскладзе ў яго проста атрафіруецца любая цяга да яе.

«Свой хлопец»

У гэтым выпадку вам варта пазбавіць сябе якой бы там ні было жаноцкасці і сексуальнасці. Насіце мешкаватае адзенне, забудзьцеся пра макіяж. А сваю раптоўную «змену» раслумачце тым, што не жадаеце марнаваць час на ўсялякае глупства.

Хадзіце разам з «каханым» і яго сябрамі на спартыўныя матчы і ў клубы. І адрывайцеся там на роўных з усімі.

Як гэта дзейнічае? У такіх стасунках сціраюцца ўсе палавыя адрозненні. Апроч таго, падобная «аголенасць» у бытавым плане пазбаўляе жанчыну загадкі, чароўнасці. Мужчына пачынае ўспрымаць яе як сябра або суседку па кватэры.

«Меркантыльная блудніца»

Гэта толькі ў эратычных фільмах мужчыны любяць распусных дзяўчат у латэксе, а на справе такія дамы адштурхоўваюць іх не менш, чым мужчынападобныя. Таму старайцеся адзявацца як мага больш вульгарна: чырвоная памада, глыбокае дэкальтэ, калготкі ў сетачку і лакавыя батфорты — хай усяго будзе шмат!

Пры гэтым падкрэслівайце, што ў вас у прыярытэце толькі заможныя паклоннікі, таму і яму нядрэнна было б раскашэліцца.

Як гэта дзейнічае? У сур'ёзных адносінах мужчыну ніколі не задаволіць той факт, што ён усяго толькі перавалачны пункт, які, да таго ж, выкарыстоўваюць.

Калі ж вам трапіўся зусім ужо «моцны арэшак» і ніводны з прапанаваных спосабаў не дзейнічае, можа, варта прыгледзецца да яго лепш? Раптам гэта тое самае, сапраўднае каханне?

Вера ФЕМІНА

Выбар рэдакцыі

Грамадства

Палацы, паркi, сядзiбы. На Брэстчыне вядзецца вялiкая работа па аднаўленнi гiсторыка-культурных аб'ектаў

Палацы, паркi, сядзiбы. На Брэстчыне вядзецца вялiкая работа па аднаўленнi гiсторыка-культурных аб'ектаў

Адным з першых у вобласцi пачалi рэстаўрыраваць велiчны палац Сапег у Ружанах.

Грамадства

Шопiнг з дапоўненай рэальнасцю. Тэхналогii 3D-мадэлявання адкрыюць новы фармат гандлю

Шопiнг з дапоўненай рэальнасцю. Тэхналогii 3D-мадэлявання адкрыюць новы фармат гандлю

Наша краiна займае трэцяе месца ў сваiм рэгiёне па колькасцi бескантактавых транзакцый.

Грамадства

Неспадзяваныя падарожжы. Як не згубiцца ў лесе?

Неспадзяваныя падарожжы. Як не згубiцца ў лесе?

Цёплае i вiльготнае надвор'е, якое вось ужо чацвёрты тыдзень з невялiкiмi перапынкамi пануе ў Беларусi, штурхае да таго, каб пайсцi ў лес.