У 9-й гарадской клінічнай бальніцы Мінска з'явілася магчымасць абследаваць стрававод і страўнік больш сучаснай тэхнікай.
Абследаванне стрававода і страўніка можа адбывацца на працягу цэлых сутак. Для такога сутачнага маніторынгу — ён называецца рН-метрыяй — патрабуецца спецыяльная тэхніка. У некаторых краінах СНД, дарэчы, яе няма, а таму і падобныя даследаванні не праводзяцца ўвогуле. У нашай краіне не так даўно з'явілася нават яшчэ больш сучаснае прыстасаванне. І цяпер можна падабраць больш дакладную індывідуальную схему лячэння, а значыць, дасягнуць большага эфекту ад яго.
— Раней мы працавалі з расійскай, а нядаўна атрымалі тэхніку амерыканскай кампаніі, зборачны цэх якой знаходзіцца ў Ізраілі, — тлумачыць дацэнт 2-й кафедры ўнутраных захворванняў, кандыдат медыцынскіх навук, урач-гастраэнтэролаг вышэйшай кваліфікацыйнай катэгорыі Мікалай КАПРАЛАЎ. — Гэта кампактны апарат з большымі магчымасцямі, большай колькасцю датчыкаў — у расійскім было ўсяго тры, а ў ізраільскім — ужо восем. Цяпер мы дыягнастуем у страваводзе і страўніку ўжо не толькі кіслату, але і шчолач, даследуем, як рухаецца ежа. Акрамя таго, можам устанавіць і аб'ём сакрэту, які закідваецца падчас рэфлюксу, або, кажучы простай мовай, таго, што закідваецца са страўніка ў стрававод і што хворы адчувае як пякотку. Пякотка бывае і бяскрыўдная, на якія-небудзь асобныя прадукты харчавання, аднак бывае, што гэты стан мучыць пацыентаў пастаянна. Многія з іх пры гэтым і не здагадваюцца, наколькі гэта небяспечна. Так праяўляецца гастраэзафагеальная рэфлюксная хвароба, здольная з цягам часу пры адсутнасці лячэння прывесці да сур'ёзных ускладненняў. У нашай краіне ад такой паталогіі пакутуе прыкладна кожны пяты...
Зразумела, што ежа не павінна нікуды вяртацца. Прырода прадугледзела так, што ў страваводзе асяроддзе шчолачнае, а ў страўніку — кіслае. Таму калі кіслы страўнікавы рэфлюкс закідваецца ў стрававод, гэта яго пашкоджвае. Раз за разам... і ўзнікае запаленне, пасля эрозія, язва, урэшце такое захворванне, як стрававод Барэта, а гэта ўжо перадракавы стан! Кіслае змесціва страўніка можа нашкодзіць нават лёгкім (анатамічна ж органы блізкія), а тое і паспрыяць запаленню трахеі ці бронхаў. Пацыент, і нават урач, могуць грашыць пры гэтым на бранхіяльную астму! Нездарма ў кожнага шостага «астматыка» выяўляецца рэфлюксная хвароба.
— Верхні сфінктар замыкаецца, як толькі ежа прайшла ў стрававод, што папярэджвае яе вяртанне ў ротавую поласць, — тлумачыць Мікалай Капралаў. — А ніжні сфінктар папярэджвае закід ежы са страўніка ў стрававод. Аднак бывае, што сфінктар не змыкаецца як належыць, або, наадварот, змыкаецца так, што ежа не праходзіць далей і можа нават трапляць у органы дыхання. Стрававод багаты на нервовыя адросткі, а таму яго няправільнае скарачэнне прыносіць чалавеку пакуты і не можа застацца для яго незаўважаным. Самае важнае, каб людзі не трывалі, а ішлі да ўрача, які прызначыць спецыяльнае абследаванне, бо ніякі ўльтрагук не выявіць тое, што адбываецца ўнутры органа.
Даследаваць стрававод дапамагае яшчэ адзін новы і пакуль адзіны ў краіне апарат замежнай вытворчасці — «Манаскан». Датчыкі зонда, падключанага да гэтага абсталявання, вызначаюць рухальную функцыю органа, фіксуюць скарачэнні яго сценак падчас праходжання ежы, выяўляюць у хворага грыжу страваводнай адтуліны дыяфрагмы, калі страўнік пачынае выпінацца ў грудную поласць
Святлана Барысенка
Мерапрыемства праводзілася на добраахвотнай аснове.
Не выявіць ні секунды абыякавасці.
