Вы тут

Белпошта: Удзяляем кліентам столькі часу, колькі патрэбна


Якія новыя паслугі ўвяла пошта за апошнія гады? Ці даступныя яны вяскоўцам? Як вырашаюцца праблемы з чэргамі? І што можна набыць у паштовай інтэрнэт-краме? На актуальныя пытанні аб дзейнасці прадпрыемства адказала першы намеснік генеральнага дырэктара Белпошты Алена СКРЫПЧЫК.


— Дэвіз Белпошты — «Хуткасць. Надзейнасць. Даступнасць». Што сёння стаіць за гэтымі словамі?

— Пад такім дэвізам калектыў прадпрыемства працуе вось ужо больш за 20 гадоў. Мы строга захоўваем стандарты па прыёме, перасылцы і дастаўцы ўсіх відаў паштовых адпраўленняў, забяспечваем бесперабойную работу тэхнікі і транспарту, укараняем новыя тэхналогіі. Гэта штодзённая карпатлівая праца ўсяго шматтысячнага калектыву: паштальёнаў, аператараў, сартавальнікаў, кіроўцаў.

У нашай сетцы сёння 3305 аб'ектаў паштовай сувязі, 73 працэнты з якіх у сельскай мясцовасці, у тым ліку 222 перасовачныя аддзяленні. Гэта дазваляе задавальняць патрэбы насельніцтва і пры гэтым пашыраць спектр паслуг. Паколькі ўсе аб'екты паштовай сувязі маюць аднолькавае тэхнічнае абсталяванне, паслугі ў роўнай ступені даступныя жыхарам як гарадоў, так і аддаленых сельскіх населеных пунктаў.

Трэба сказаць, што беларуская пошта прызнана адной з найлепшых у свеце па ўзроўні развіцця электронных паслуг. Так, наша краіна — першая ў рэгіёне СНД, паштовая служба якой у 2013 годзе атрымала сертыфікат S42 Сусветнага паштовага саюза, які пацвярджае міжнародны стандарт адрасавання.

— Якія новыя паслугі за апошнія гады ўвяла пошта?

— Спектр паштовых і няпрофільных паслуг шырокі. Напрыклад, юрыдычным асобам і індывідуальным прадпрымальнікам мы прапануем комплекснае абслугоўванне ў выдзеленых цэнтрах «Бізнес-пошта» (такіх у краіне на сёння адкрыта 60). Абанементнае абслугоўванне ў офісе «Паштовы кур'ер кожны дзень» дазваляе дастаўляць адпраўленні «ад дзвярэй да дзвярэй» у любую кропку Беларусі і больш чым у 200 краін свету ў максімальна кароткія тэрміны. Карпаратыўным кліентам прапануем таксама карыстацца «гібрыднай поштай», у тым ліку бесканвертнымі адпраўленнямі.

Адпраўленні лінейкі «Камфорт» дазваляюць атрымальніку выбраць час і адрас уручэння, а адпраўніку ў гэты дзень прыходзіць SMS-паведамленне аб тым, што ліст ці пасылка дастаўлены.

Пошта распрацавала таксама праграмныя прадукты, якія дазваляюць атрымліваць пенсіі, дапамогі, грашовыя пераводы ў любым аддзяленні сувязі незалежна ад месца жыхарства. Усе аддзяленні прымаюць плацяжы ў сістэме ДРІП.

— Якія з паслуг найбольш запатрабаваныя ў карыстальнікаў?

— Найбольш папулярныя паслугі, якія забяспечваюць мінімальныя тэрміны перасылкі адпраўленняў і камфортныя ўмовы дастаўкі. Напрыклад, паскораная пошта (EMS Belpost): лісты і пасылкі дастаўляюцца на наступны рабочы дзень у любую кропку Беларусі. Запатрабаваны таксама адпраўленні простай пісьмовай карэспандэнцыі «1 клас» з сэрвісам «сачэнне», паслуга «Аплачаная дастаўка ў вячэрні час».

— Цяпер ідзе падпісная кампанія. Раскажыце, як можна лёгка аформіць падпіску на друкаваныя выданні, не выходзячы з дому?

— На сайце Белпошты працуе сістэма «Інтэрнэт-падпіска». Каб скарыстацца гэтай паслугай, трэба перайсці па адпаведнай спасылцы — «Падпіска». Там можна азнаёміцца з каталогамі, дзе ўтрымліваецца больш за тры з паловай тысячы найменняў выданняў. Неабходную газету ці часопіс можна адшукаць па алфавіце ці па тэматыцы. Аплачваецца падпіска банкаўскімі карткамі Vіsa і MasterCard, а таксама пры дапамозе электронных грошай EasyPay.

— З мінулага года працуе паштовая інтэрнэт-крама. У чым яе асаблівасці? Наколькі яна папулярная?

— У апошняе дзесяцігоддзе ў нашай краіне імкліва развіваецца электронны гандаль, і мы вырашылі не адставаць ад гэтай тэндэнцыі. Паштовую інтэрнэт-краму беларускіх тавараў Shop.belpost.by мы зрабілі найбуйнейшай віртуальнай гандлёвай пляцоўкай, якая аб'ядноўвае вядучыя айчынныя брэнды.

На сёння Белпошта мае шырокую сетку аддзяленняў сувязі, шматгадовы вопыт дастаўкі адпраўленняў па прынцыпе «ад дзвярэй да дзвярэй», уласны аўтатранспарт. Усё гэта дазваляе прадпрыемству дастаўляць кліентам заказаны тавар нават у самыя аддаленыя куткі краіны.

Акцэнт на айчынных вытворцаў зроблены не выпадкова. Як вядома, беларускія брэнды цэняцца сваёй высокай якасцю і даступным узроўнем цэн. Асартымент разнастайны, лінейкі тавараў пастаянна папаўняюцца. Сёння, напрыклад, на сайце прадстаўлена прадукцыя 206 айчынных вытворцаў, размешчана больш за 4800 тавараў: для дома і сям'і, для дачы і адпачынку, бытавая тэхніка, касметыка і парфумерыя, адзенне і абутак, дзіцячыя тавары. Штодня віртуальную гандлёвую пляцоўку наведвае каля тысячы пакупнікоў. За 10 месяцаў бягучага года інтэрнэт-крама выканала 33,9 тысячы заказаў, што ў тры разы больш, чым за аналагічны перыяд мінулага года.

Акрамя таго, з кастрычніка штомесяц выдаюцца каталогі з акцыйнымі таварамі, прадастаўляюцца зніжкі пакупнікам. Перавагі каталожнага гандлю ў першую чаргу ацанілі жыхары сельскай мясцовасці. У іх з'явілася магчымасць набываць неабходныя тавары, не плануючы паездкі ў райцэнтр і не марнуючы час.

— Ці закранула пошту аптымізацыя? І як вырашаецца пытанне аб тым, захаваць аддзяленне ў раёне ці не?

— Так, закранула. Сетка стацыянарных сельскіх аддзяленняў сувязі сфарміравалася некалькі дзесяцігоддзяў таму. Але з таго часу прайшло шмат змен — міграцыя і натуральнае змяншэнне вясковага насельніцтва, аптымізацыя сельсаветаў. Усё гэта паўплывала на работу нашых аб'ектаў.

Каб знізіць выдаткі, Белпошта праводзіла аптымізацыю сеткі шляхам перагляду рэжымаў работы аб'ектаў, пераводу аддзяленняў у пункты паштовай сувязі. Адначасова праводзілася мадэрнізацыя паштовай сувязі, скарачэнне неэфектыўных працоўных месцаў і стварэнне новых за кошт пераходу на сучасныя тэхналогіі.

Пры разглядзе пытання закрыцця аддзяленняў падыход індывідуальны. З улікам меркавання жыхароў і па ўзгадненні з мясцовымі органамі ўлады прымаецца аб'ектыўнае рашэнне. Некаторыя сельскія населеныя пункты пераводзяць на абслугоўванне перасовачнымі аддзяленнямі паштовай сувязі, якія па тэхнічным абсталяванні роўныя па вартасці гарадскім аддзяленням.

— Заўважалі, што пры аплаце паслуг большасць людзей аддае перавагу менавіта аддзяленням сувязі. На вашу думку, з чым гэта звязана?

— Думаю, справа ў тым, што пошта задавальняе патрэбы шырокіх слаёў насельніцтва, у тым ліку асоб, якія праз узрост, маёмаснае становішча і іншыя прычыны не валодаюць інфармацыйнымі тэхналогіямі ў аб'ёме, які дазваляе адмовіцца ад аплаты паслуг у традыцыйным фармаце.

Працоўныя месцы ў аддзяленнях паштовай сувязі набліжаны да ўніверсальных, з улікам пажаданняў карыстальнікаў. На ўсіх месцах прадастаўляецца максімальна магчымая колькасць паслуг па заяўным прынцыпе аднаго акна. Пры гэтым аператар паштовай сувязі ўдзеліць кліенту столькі ўвагі і часу, колькі патрэбна.

— Як вырашаецца праблема з чэргамі?

— Адна з асаблівасцяў работы паштовых аддзяленняў — гэта нераўнамерная нагрузка. Акрамя таго, большасць кліентаў атрымлівае па некалькі паслуг (адначасова паштовых і няпрофільных). Каб скараціць час абслугоўвання ў аддзяленнях, устанавілі тысячу плацежна-даведачных тэрміналаў, уводзім электронную чаргу. У Мінску ўкаранілі 41 тэрмінал самаабслугоўвання SmartPOST па прыёме заказных паштовых адпраўленняў. Зрабілі так, каб пенсію і сацыяльную дапамогу можна было атрымаць у любым аддзяленні краіны, незалежна ад таго, дзе гэтыя выплаты прызначаны. Плюс у кожным гарадскім аб'екце сувязі, які мае тры і больш аперацыйныя акны, арганізуецца спецыяльнае працоўнае месца па прадастаўленні толькі паштовых паслуг.

— Дарэчы, пра тэрміналы самаабслугоўвання. Наколькі яны запатрабаваныя? Людзі лёгка асвоілі новую тэхніку?

— Статыстыка паказвае, што тэрміналы самаабслугоўвання карыстаюцца попытам. Так за 9 месяцаў мінулага года з дапамогай плацежна-даведачных тэрміналаў пошта аказала 15,7 мільёна паслуг, за 9 месяцаў бягучага года — 16,5 мільёна.

Варта заўважыць, што наша задача не зводзіцца толькі да тэхнічнага боку справы. Мы стараемся прасоўваць новы сэрвіс сярод насельніцтва. Напрыклад, штомесяц, у перыяд максімальнай нагрузкі з 15 па 25 чысло, у аддзяленнях паштовай сувязі праводзіцца акцыя «Бліжэй да кліента». Як правіла, аднойчы аплаціўшы паслугі праз тэрмінал з дапамогай спецыялістаў, кліенты ў далейшым карыстаюцца ім самастойна. Асвойваць новыя сэрвісы імкнецца не толькі моладзь, але і пенсіянеры. Усё больш кліентаў разумеюць, што тэрміналы — гэта сучасны, зручны і хуткі спосаб аплаты розных паслуг.

— Як плануецца ўдасканальваць работу паштовых аддзяленняў надалей?

— Прадпрыемства нацэлена на павышэнне якасці прадастаўлення паслуг. Плануем мадэрнізацыю паштовай інфраструктуры: перагляд зон абслугоўвання і ўзбуйненне сельскіх аддзяленняў паштовай сувязі, развіццё сеткі абанементных паштовых скрынак (у першую чаргу ў катэджных пасёлках і сельскіх населеных пунктах з высокай працягласцю даставачных участкаў).

Працягнем устаноўку ў аддзяленнях сістэмы кіравання патокамі кліентаў «Электронная чарга», паштаматаў, будзем развіваць сетку кур'ераў. Робім усё, каб нашым кліентам было камфортна.


Дырэктар Гомельскага філіяла Белпошты Галіна Цярэшчанка:

— Гомельская вобласць дастаткова вялікая. На сёння ў нас амаль 55% аддаленых населеных пунктаў абслугоўваецца з дапамогай аўтатранспарту. Размова ідзе не толькі пра перасоўныя пункты паштовай сувязі, але і персанальную дастаўку пенсіі, карэспандэнцыі і іншых паслуг з дапамогай мотатранспарту. Да таго ж, у кожнага паштальёна ёсць свае пастаянныя кліенты, якіх ён добра ведае, да якіх рэгулярна заходзіць. Многія людзі замаўляюць у паштальёнаў пэўныя паслугі. Напрыклад, прыём плацяжоў, набыццё тавараў народнага спажывання. І, вядома, афармляюць падпіску. У многіх паштальёнаў напрацавана добрая кліенцкая база, і супрацоўнікі ёй даражаць. Таму заўсёды загадзя, пачынаючы з папярэдняга месяца, нагадваюць сваім кліентам пра тэрміны падпіскі. Гэта важна і для людзей, якіх абслугоўваем, і для саміх паштальёнаў. Яны разумеюць: ад таго, які тыраж яны зробяць сёння, залежыць іх заробак заўтра.


Намеснік дырэктара Мінскага філіяла Белпошты Алена Ішчук:

— Для таго, каб максімальна задаволіць чаканні кліентаў, Белпошта пастаянна ўдасканальвае сваю работу. Не абыходзім увагай і сельскіх жыхароў. Цяпер спектр паслуг, якія аказваюцца нават у невялікім сельскім аддзяленні паштовай сувязі, адпавядае сталічнаму ўзроўню. Паштальён у вёсцы найбольш блізкі да сваіх кліентаў. Сёння ён не толькі прыносіць газеты і пісьмы, але можа таксама аформіць заказ у паштовай інтэрнэт-краме, дзе прапаноўваюцца тавары айчынных вытворцаў.

Дарэчы, з 22 лістапада запушчаны новы партнёрскі праект з беларускімі інтэрнэт-крамамі: каталог «Тавары поштай». Тут можна набыць новую бытавую тэхніку, навагоднюю прадукцыю, тавары для дома, дзяцей, аўтааматараў і іншыя. Кліент вызначаецца з пакупкай, тэлефануе ў інтэрнэт-краму, а пошта ажыццяўляе дастаўку.

Наталля ЛУБНЕЎСКАЯ

lubneuskaya@zvіazda.by

Выбар рэдакцыі

Грамадства

Прадпрымальнікі запусцілі сацыяльную ініцыятыву, каб сэканоміць сродкі бюджэту, але вымушаны за гэта плаціць

Прадпрымальнікі запусцілі сацыяльную ініцыятыву, каб сэканоміць сродкі бюджэту, але вымушаны за гэта плаціць

На ўпарадкаванне пасля прыклееных паперак выдаткоўваюцца велізарныя сродкі.