Пра гэта паведаміў першы намеснік міністра жыллёва-камунальнай гаспадаркі Алег Паскробка.
Новая сістэма субсідый у першую чаргу павінна была падтрымаць асоб пенсійнага ўзросту і сацыяльна неабароненыя катэгорыі грамадзян ва ўмовах росту ўзроўню кампенсацыі насельніцтвам затрат на аказанне жыллёва-камунальных паслуг. Тут выкарыстоўваюцца два прынцыпы — выяўляльны і заяўны. Па першым — пенсіянерам з малой пенсіяй і інвалідам субсідыя даецца аўтаматычна. Астатнім прэтэндэнтам на такую падтрымку неабходна пісаць заяву і збіраць адпаведныя дакументы.
Сёння сістэма ўжо пачала працаваць, але яе першыя вынікі крыху здзіўляюць нават кіраўніцтва ЖКГ. Работнікі міністэрства падлічылі, што хатніх гаспадарак, якія патэнцыйна маглі б трапіць пад атрыманне жыллёвых субсідый па выяўляльным прынцыпе, каля 420 тысяч. А на самай справе субсідыі атрымалі толькі прыкладна 2 тысячы сем'яў. Астатнія маюць большыя даходы, чым прапісана ў дакуменце, таму ў гэтую катэгорыю слабаабароненых і не трапляюць.
«Праграма новая, мы яе тэстуем. Сёння спецыялісты правяраюць кожны рахунак-паведамленне. Але парадак лічбаў, на жаль, атрымаўся невялікі, — сказаў Алег Паскробка. — Мы разумеем, што ў выпадку змены тарыфаў, дапамогай у выглядзе безнаяўных жыллёвых субсідый скарыстаецца значна большая колькасць людзей».
Падлічылі спецыялісты і тых, хто вырашыў атрымаць субсідыю самастойна. Аказалася, што гэты прынцып цяпер увогуле амаль не працуе. З заявамі на налічэнне безнаяўных жыллёвых субсідый звярнуліся 315 хатніх гаспадарак. Па іх прынята 164 рашэнні: 63 заяўнікі атрымалі субсідыі, а 101-му адмовілі. Гэта пры тым, што ў сістэме ЖКГ зарэгістравана каля 3 мільёнаў 542 тысяч асабовых рахункаў хатніх гаспадарак.
«Аналіз адмоў паказвае, што і тут парогавае значэнне, у межах якога прадастаўляюцца безнаяўныя жыллёвыя субсідыі, не дасягнута. Астатнія заявы знаходзяцца на стадыі разгляду», — адзначыў Алег Паскробка.
Прынцыповым момантам для атрымання такой субсідыі з'яўляецца мінімальная мяжа сярэднямесячнага даходу сям'і, які будзе параўноўвацца з сумай аплаты за жыллёва-камунальныя паслугі. На практыцы падобную дапамогу будуць прадастаўляць у выпадку, калі штомесячная плата за «камуналку» ў межах устаноўленых нормаў спажывання гэтых паслуг перавышае 20% сярэднямесячнага сукупнага даходу сям'і, якая пражывае ў горадзе, і 15% — у сельскім населеным пункце.
Дарэчы, гэтыя прапорцыі могуць і змяніць. У Міністэрстве ЖКГ цяпер ідуць размовы аб тым, каб прапанаваць дыферэнцыраваны парог атрымання субсідыі. Напрыклад, тыя, хто мае зарплату ў 300 рублёў, будуць мець парог у 5% ад даходу замест 20%, а тыя, у каго 400 рублёў — 10%.
Сяргей КУРКАЧ
Фіналістка праекта «Акадэмія талентаў» на АНТ — пра творчасць і жыццё.
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.