Нехта скажа, што літаратурнае жыццё віруе адно ў сталіцы. Толькі тут ёсць і тусоўка, і вечарыны, і магчымасць чытачам ледзь не штодзень сустракацца з пісьменнікамі, а творцам — выходзіць да публікі. Але прыклад паэткі з Піншчыны Марыі Кобец даказвае зусім адваротнае: можна быць і жыць у літаратуры, нават жывучы ў вёсачцы на Палессі. Яна актыўна друкуецца ў літаратурна-мастацкіх выданнях, выступае на творчых вечарынах, а не так даўно прадставіла сваю другую кнігу вершаў «Палыновая квецень».
Марыю Кобец як паэтку хвалююць розныя аспекты. Гэта і горкая адзінота, і шчаслівыя моманты радасці (адсюль і сімвалізм назвы новай кнігі), і адвечная антытэза горада і вёскі, і жаданне простага жаночага шчасця. Ёсць тут ноты філасофскіх роздумаў, клопат аб лёсе роднай зямлі. Ды што казаць — лепш чытаць. Таму прапануем чытачам «Звязды» некалькі новых вершаў гэтага аўтара.
Марыя Кобец
***
З гасцінца крочу я ў сяло —
Вяртаюць карані з дарогі.
Сталіцы шумнае сіло
Стаміла цела да знямогі.
Ступаю роснаю травой,
Па быльнягу, па ўзмежках.
Здыму абцасы з ног далоў —
Ды басанож з усмешкай!
Глядзі ж ты — ў небасхіле, вунь,
Вясёлкі карагодзяць.
Гэй, поля веснавая рунь!
Ралля, што так лагодзіць!
Гэй, далеч, сонейка, цяпло!
Гэй ветрык, лес, мурогі!
Дамоў, у роднае сяло!
Бывайце ўжо, трывогі!
***
Вецер лашчыць зімовую хмарку.
Ён каханак яе і вястун.
Даланёю падхопіць і шпарка
Закалыша, гарэза-пястун.
Валасы ёй расчэша лісліва,
Клапатлівай расправіць рукой.
Сарамліва, ласкава, цнатліва
Пацалуе, крануўшы шчакой.
Побач зорка — нябёсаў істота —
Ззяе ярка на Млечным Шляху.
Але ў бляску — нуда і самота.
Ёй жа ласкі ну хоць бы крыху!
Маладзік — прыгажун яснавокі —
Асвятляе наўкола усіх.
Ды пагляд свой халодны, высокі
Ёй не дорыць, а звыкла прыціх.
Толькі зорачка з даляў далёкіх
Бляск свой дзеліць са мной
надвая.
І здаецца такой адзінокай!
Адзінокай... Такой жа, як я.
***
...Усмешкі Вашай шчырае
святло,
Далоняў цёплых хуткае
крананне —
Да дрыжыкаў,
Бяспамяцтва...
Сышло
Зімы мярзотнай золкае
трыванне.
Заззяў Сусвет адценнем
Вашых воч,
Згарэлі ўміг сумнеў
і спадзяванні.
...Стаў Новы Свет!
Былое ўсё — апроч!
Дзень добры,
Час адчайных парыванняў!
Бывай навекі ўжо, назола-тло!
Бывай...
Спатоліць хай імклівае
адхланне —
Усмешкі роднай шчырае святло,
Далоняў цёплых дрогкае
крананне...
***
Вечар.
Ціша.
Плыве далячынь.
Піша дождж на шкле
вокнаў нататкі.
Вечар.
Вы.
І рука на плячы.
Падваконне...
і Вашы пальчаткі.
Словаў шквал.
Усвядоміць б змагчы!
Рысы, рухі,
Загадкі, загадкі...
Ноч і Вы.
Галава на плячы
Падваконне...
і Вашы пальчаткі.
Забыццё.
Ноч сышла на спачын.
Завіхаецца золак — і раптам...
Падваконне...
Яно ж ні пры чым...
Падваконне —
без Вашых пальчаткаў.
Так. Адсутнасць.
Крычы — не крычы.
Без адказу — адно толькі
згадкі.
Падваконне... і Вашы ключы.
Падваконне...
без Вашых пальчаткаў.
Набор на бюджэтныя месцы павялічыцца.
Колькі ж каштуе гэты важны кампанент здаровага рацыёну зараз?
Не выявіць ні секунды абыякавасці.