Упершыню студэнты хімічнага факультэта БДУ выканаюць лабараторныя работы па ядзернай фізіцы ў рэжыме відэаканферэнцыі пры ўдзеле спецыялістаў Нацыянальнага інстытута ядзернай навукі і тэхналогій (INSTN) Камісарыята па атамнай і альтэрнатыўных відах энергіі (СЕА, Францыя). Сеанс сувязі адбудзецца 7 снежня на хімічным факультэце БДУ.
Пачынаючы з гэтага сеанса цягам пяці гадоў студэнты БДУ будуць мець магчымасць выконваць лабараторныя работы па ядзернай фізіцы ў рэжыме відэаканферэнцый. Адной з найважнейшых задач праекта з'яўляецца забеспячэнне студэнтам БДУ віртуальнага доступу да даследчага рэактара камісарыята па атамнай і альтэрнатыўных відах энергіі. Ён выкарыстоўваецца для правядзення навукова-даследчых і навучальных работ у галіне малекулярнай і ядзернай фізікі, а таксама радыяцыйнай хіміі.
З дапамогай інтэрнэт-сувязі кантрольны пункт і сам рэактар будуць злучаны з вучэбнай аўдыторыяй хімічнага факультэта. Для ажыццяўлення такіх ан-лайн лабараторных работ Міжнароднае агенцтва па атамнай энергіі (МАГАТЭ) прадаставіла БДУ спецыяльнае абсталяванне і вялікія маніторы.
Першыя лекцыі па характарыстыках рэактара і яго выкарыстанні ў навучальных мэтах і трэнінгах прачытае эксперт даследчых рэактараў Хаўер Вахлебер. Акрамя візуальнай магчымасці і адначасовых стасункаў з лектарам, будучыя спецыялісты ў галіне ядзернай энергетыкі змогуць выконваць заданні і сачыць за практычным вынікам сваіх дзеянняў па рэгуляванні работы рэактара. Напрыклад, упершыню старшакурснікі хімічнага факультэта БДУ змогуць віртуальна паўдзельнічаць пры загрузцы паліва ў рэактар і яго запуску.
У Белдзяржуніверсітэце тлумачаць: праект скіраваны на павышэнне якасці падрыхтоўкі спецыялістаў для ядзернай энергетыкі. Ён рэалізуецца ў адпаведнасці з дамовай паміж МАГАТЭ і БДУ.
Надзея НІКАЛАЕВА
Як мы бярозавік куплялі на гандлёвай пляцоўцы лясгаса і ў лясніцтве
Творчая вечарына народнага артыста Беларусі прайшла ў адной з мінскіх гімназій.