«Францыск Скарына быў з тых, першых, хто, кажучы сучаснымі словамі, стварыў стартавую пляцоўку для рыўка чалавецтва ў ягоную неабсяжную будучыню», — напісаў шмат гадоў таму ў эсэ «Подзвіг Францыска Скарыны» Уладзімір Караткевіч. Многія і многія паэты, празаікі, драматургі ўславілі зробленае, здзейсненае беларускім першадрукаром. Зорка Скарыны відаць і нашым сябрам з іншых старонак. Народны паэт Рэспублікі Марый Эл (Расійская Федэрацыя) Генадзь Ояр у пярэдадзень 500-годдзя беларускага кнігадрукавання напісаў сваё «Прысвячэнне Францыску Скарыну». А пераўвасобіў выкладзены марыйскі погляд на нашага велічнага суайчынніка лаўрэат Дзяржаўнай прэміі Рэспублікі Беларусь Мікола Мятліцкі. Дарэчы, Генадзь Ояр з цікавасцю ставіцца да беларускай літаратуры, беларускай паэзіі. Рыхтуе зараз вялікую падборку перакладаў твораў сучасных майстроў мастацкага слова з Беларусі. Пераклаў марыйскі пісьменнік на сваю родную мову і славуты верш Максіма Багдановіча «Я хацеў бы спаткацца з Вамі на вуліцы...». Памятаеце яго канцоўку: «Нашто ж на зямлі/ Сваркі і звадкі, боль і горыч,/ Калі ўсе мы разам ляцім/ Да зор?»...
Будзем спадзявацца на працяг сяброўства марыйскага паэта Генадзя Ояра з беларускай паэзіяй, беларускімі паэтамі. Зварот да Скарыны і Багдановіча абавязвае да гэтага.
Мікола Берлеж
Генадзь ОЯР,
народны паэт Рэспублікі Марый Эл
ПРЫСВЯЧЭННЕ ФРАНЦЫСКУ СКАРЫНУ
Той змрочны век хаваў не раз, было,
Ў нябёсах — сонца, а ў душы — святло...
Ды на зямлю прывёў наступнік-дзень
Тых, у каго ў грудзях — жывы агмень.
Яны пачулі Божы сказ з нябёс,
Яны зямлі змаглі з'іначыць лёс,
Сагрэць народ сваёй душы цяплом:
Хай будучыня зорыцца святлом!
Скарыны сэрца — сонцам узышло,
Зямлі айчыннай Слова моц дало:
Ён кніжнай праўдай асляпіў нявер,
Высокай зоркай ззяе і цяпер.
Ён акрыліў хаду зямных падзей,
Яго імя — на вуснах у людзей.
Да новай славы, да святлынь-яснот
Вядзе і сёння родны свой народ!
З марыйскай. Пераклад Міколы Мятліцкага
Канцэрт для дзяцей і моладзі, пластычны спектакль Ягора Дружыніна і «Рок-панарама».
Выбар саджанца для садавода — той момант, значнасць якога складана пераацаніць.
Актрыса НАДТ імя М. Горкага — пра шлях да сцэны і натхненне.
Тата і мама — два самыя важныя чалавекі ў жыцці кожнага дзіцяці.