24 кастрычніка, субота

Вы тут

У дзень нараджэння Багдановіча адбудзецца шмат імпрэз


Падчас урачыстага адкрыцця абноўленай экспазіцыі Літаратурнага музея паэта, герояў Багдановіча ўвасобяць артысты Беларускага дзяржаўнага заслужанага харэаграфічнага ансамбля «Харошкі». У вобразе музыкі з дэбютнага апавядання Багдановіча рыхтуецца выступіць намеснік дырэктара «Харошак», выдатны альтыст Аляксандр НІКІТА, якога наш фотакарэспандэнт Анатоль Кляшчук сустрэў учора ўвечары ў музеі падчас генеральнай рэпетыцыі. Падтрымаць тату прыйшоў і Дамінік Нікіта, які таксама вучыцца граць на скрыпцы.


Гэта далёка не ўсе святочныя імпрэзы, запланаваныя на дзень нараджэння Паэта, які мы адзначаем сёння. Шырокая ўвага грамадскасці да 125-годдзя Максіма Багдановіча, аднаго з пачынальнікаў новай беларускай літаратурнай традыцыі, сведчыць пра павагу нашага народа да спадчыны і памяці Страціма. Больш за тое, свята стане важным акцэнтам Года культуры.

Духоўнасць, вернасць высокім ідэалам — адна з рыс паэзіі і філасофскай прозы Багдановіча. Таму не выпадкова святкаванне дня яго нараджэння распачнецца сёння ў Храме-помніку Усіх святых. Цырымонія «Вяртанне» надасць гэтаму знакаваму месцу ў сталіцы яшчэ адну сімвалічную рысу: менавіта тут, у крыпце храма, будзе закладзена капсула з зямлёй з месца пахавання Максіма ў Ялце.

На дзень нараджэння прынята дарыць падарункі імяніннікам. Але здараецца, што і самі віноўнікі свята адорваюць гасцей. Так, усе мінчане і госці горада сёння атрымаюць падарункі ад Максіма-кніжніка. На Траецкай набярэжнай урачыста адчыніць дзверы абноўленая кнігарня «Вянок». Сёлета ў легендарнай крамы змяніўся ўладальнік — цяпер гэта ААТ «Белкніга», праведзены рамонт, адбылася невялікая пераарыентацыя ў профілі. Усіх сакрэтаў арганізатары свята і супрацоўнікі крамы пакуль не раскрываюць. Але мы даведаліся, што на цырымоніі адкрыцця чакаюцца высокія госці, сярод іх — намеснік прэм'ер-міністра Наталля Качанава, міністр інфармацыі Лілія Ананіч, міністр антыманапольнага рэгулявання і гандлю Уладзімір Калтовіч, старшыня Саюза пісьменнікаў Беларусі Мікалай Чаргінец, кіраўнікі дзяржаўных выдавецтваў. Падчас імпрэзы адкрыцця пройдзе тэатралізаванае прадстаўленне з удзелам акцёраў Купалаўскага тэатра Андрэя і Крысціны Дробышаў. Яны з'явяцца ў вобразах Максіма Багдановіча і Ганны Какуевай. Таксама будзе прадстаўлена выстаўка выданняў твораў Максіма Багдановіча з фондаў Нацыянальнай кніжнай палаты Беларусі. Сам «Вянок» у хуткім часе ператворыцца ў сапраўдны пісьменніцкі клуб, дзе будуць ладзіцца сустрэчы з чытачамі, прэзентацыі кніг. Думаецца, сам Максім ухваліў бы тэндэнцыю ператварэння сімвала яго кнігі паэзіі ў знак цэнтра кніжнасці.

Святкаванне працягнецца там жа, у Траецкім. Непадалёк ад «Вянка» на вуліцы М. Багдановіча месціцца Літаратурны музей паэта. У другой палове дня пройдзе цырымонія адкрыцця яго абноўленай экспазіцыі. Адметна, што ў музей паэта варта наведацца нават тым, хто неаднойчы тут бываў. Каб пабачыць новае мастацкае рашэнне экспазіцыі і рэчы, якія толькі нядаўна трапілі ў фонды ўстановы. Найперш — невядомыя аўтографы Максіма Багдановіча: паштоўка на адрас «Нашай Нівы» з просьбай выпісаць для яго газету «рускім шрыфтам» (кірыліцай), дароўны надпіс на адбітку артыкула «Белорусское возрождение», які паэт прэзентаваў рэдактару яраслаўскай газеты «Голос» Мікалаю Дружыніну. З'явіліся ў экспазіцыі новыя дакументы, датычныя Адама Багдановіча, бацькі Максіма. Гэтаксама — куфар Ганны Какуевай стаіць на покуці (сімвалічна?).

Што да мастацкага рашэння, захавалі лепку ў стылістыцы эпохі мадэрн і славутыя люстры, якія рабіліся адмыслова для музея яшчэ ў 1991 годзе. І, вядома ж, сваё месца занялі ўнікальныя вітражы, на якіх — пазнавальныя месцы Мінска, горада, дзе Максім нарадзіўся. Цікава, што тэхніка, у якой ствараліся вітражы, сёння надзвычай рэдкая, таму яны маюць асаблівую мастацкую каштоўнасць.

Сёння адчыніць дзверы і «Беларуская хатка», дзе ўзноўленая атмасфера пачатку ХХ стагоддзя. Дакументальную аснову складаюць паперы, датычныя як самога Максіма Багдановіча, так і прадстаўнікоў тагачаснай інтэлігенцыі, што гуртавалася вакол «Хаткі» (ёсць і зусім новыя, раней не экспанаваныя дакументы). Сярод імёнаў — Змітрок Бядуля, які і даў прытулак Багдановічу. Цяпер да Максіма літаральна можна зайсці ў госці: мемарыяльны пакой «Хатка», канешне ж, захавала. Як і славутую батлейку, якая цяпер зноў дае прадстаўленні. Акрамя таго, у «Хатцы» будуць праводзіць рэгулярныя музейна-педагагічныя заняткі для дзяцей. Распрацоўваецца таксама адмысловая праграма на час Калядаў, імпрэзы ў межах якой пройдуць і ў музеі Максіма Багдановіча.

Завяршыцца святкаванне Дня Максіма ўжо ўвечары, у яшчэ адным сімвалічным месцы — каля помніка паэту, што на плошчы Парыжскай камуны, каля Опернага тэатра. У 17.30 тут распачнецца памятны мітынг «Пакланіся Максіму».

Натуральна, цэлы дзень будуць гучаць творы паэта — іх прачытаюць дзяржаўныя дзеячы, вядомыя акцёры тэатра і кіно, навукоўцы, школьнікі і студэнты. Музычным суправаджэннем святкавання стануць песні на вершы Максіма. Думаецца, сёння нас чакае сапраўды грандыёзная праграма, і гэта не выпадкова, бо Дзень Максіма — знакавы дзень для ўсіх беларусаў.

Марына ВЕСЯЛУХА

vesіaluha@zvіazda.by

Наста ГРЫШЧУК

Фота Анатоля КЛЕШЧУКА

Загаловак у газеце: Максімаў дзень: святкуйма разам!

Выбар рэдакцыі

Грамадства

Жыццёвы шлях Якава Крэйзера. Першы камдзiў, якi атрымаў Зорку Героя, заслужыў яе, абараняючы Барысаў

Жыццёвы шлях Якава Крэйзера. Першы камдзiў, якi атрымаў Зорку Героя, заслужыў яе, абараняючы Барысаў

У пачатковы перыяд Вялiкай Айчыннай вайны зацятыя баi разгарнулiся пры абароне Барысава — старадаўняга беларускага горада на Бярэзiне. 

Грамадства

Схадзіць на «Куфар» і застацца без грошай. На папулярным сайце можна сустрэць махляра, замаскіраванага пад пакупніка

Схадзіць на «Куфар» і застацца без грошай. На папулярным сайце можна сустрэць махляра, замаскіраванага пад пакупніка

«Лічбавыя жулікі», якія здымаюць грошы з чужых банкаўскіх карт, звычайна маскіруюцца пад інтэрнэт-рэсурсы, вартыя даверу.