Прэзідэнт прыняў кадравыя рашэнні

Учора кіраўнік дзяржавы прыняў важныя кадравыя рашэнні. Васіль Жарко назначаны намеснікам прэм'ер-міністра Беларусі. Анатоль Лапо назначаны старшынёй Дзяржаўнага пагранічнага камітэта.

Прэзідэнт адзначыў, што сярод шэрагу кандыдатур выбраў на пасаду віцэ-прэм'ера менавіта Васіля Жарко па многіх прычынах. «Сапраўды, ёсць у вашай галіне сур'ёзныя поспехі. Але і вялікая колькасць недахопаў, якімі вам давядзецца займацца і на пасадзе віцэ-прэм'ера. Яшчэ я выбраў таму, што вы ў нас міністр ужо з велізарным вопытам», — сказаў Аляксандр Лукашэнка, звярнуўшы ўвагу, што сацыяльная сфера, якую будзе курыраваць Васіль Жарко, у тым ліку ўваходзіць у зону адказнасці і кіраўніка Адміністрацыі Прэзідэнта. «Таму што там і адукацыя, і ахова здароўя, і спорт. А гэта — ідэалогія, пытаннямі якой займаецца Адміністрацыя Прэзідэнта. Будзеце несці адказнасць і разам у гэтым напрамку працаваць», — заявіў кіраўнік дзяржавы.

Аляксандр Лукашэнка таксама абазначыў некаторыя задачы, над вырашэннем якіх давядзецца працаваць новаму віцэ-прэм'еру.

«У адукацыі мы падышлі да таго, што нам трэба ўдасканальваць, наводзіць парадак у школе. Нам трэба глядзець па ВНУ, пачынаючы ад уступных экзаменаў. Мы даволі шмат і доўга прапрацавалі з цэнтралізаваным тэсціраваннем і гэтак далей. Ёсць пэўныя нараканні. Мы іх павінны ўлічыць», — адзначыў Прэзідэнт. Паводле яго слоў, наперадзе сур'ёзная работа і ў сферы спорту, дзе пры адносна вялікіх затратах адсутнічаюць чаканыя вынікі.

Кіраўнік дзяржавы нагадаў аб даручэнні па дасягненні ў 2017 годзе ўзроўню сярэдняй зарплаты ў краіне $500. «А гэта ваша Міністэрства працы і сацыяльнай абароны, — адзначыў ён. — Зарплата ў людзей у сувязі з гэтымі эканамічнымі перапетыямі невысокая. Яе трэба паднімаць, чаго б нам ні каштавала».

Назначаючы Анатоля Лапо на пасаду старшыні Дзяржпагранкамітэта, кіраўнік дзяржавы адзначыў, што ў час узмоцненай аховы граніц ведамства не павінна заставацца без гаспадара. Асабліва напярэдадні навагодніх свят, якія лічацца цяжкай парой для пагранічных застаў.

«З усіх кандыдатур, якія мне прапанавалі, я прыняў рашэнне назначыць вас на гэту пасаду. Вы ўсё ведаеце. Для вас тайн у пагранічных войсках няма, — сказаў Аляксандр Лукашэнка. — Усё, што нагарадзілі лішняга (хоць і няшмат, напэўна), трэба выправіць, калі гэта памылкі».

Асаблівую ўвагу Прэзідэнт звярнуў на аптымізацыю ведамства. «Але самае галоўнае — гэта належнае выкананне абавязку пагранічніка», — падкрэсліў кіраўнік дзяржавы і дадаў, што дапускаць парушэнняў дзяржаўнай граніцы недазвольна.

Біяграфія Жарко В.І.

Жарко Васіль Іванавіч нарадзіўся ў 1956 годзе ў в. Леснікі Драгічынскага раёна Брэсцкай вобласці. У 1984 годзе скончыў Мінскі дзяржаўны медыцынскі інстытут. У 2008-м — Акадэмію кіравання пры Прэзідэнце Рэспублікі Беларусь.

З 1975-га па 1977 год праходзіў службу ў радах Савецкай Арміі. У 1984—1991 гадах — урач-інтэрн Брэсцкай абласной дзіцячай бальніцы, урач-тэрапеўт, раённы педыятр, загадчык аддзялення Драгічынскай раённай бальніцы.

У 1991—2002 гадах — урач-інспектар, намеснік начальніка ўпраўлення аховы здароўя Брэсцкага аблвыканкама.

У 2002—2003 гадах быў намеснікам галоўнага ўрача Брэсцкай абласной дзіцячай бальніцы, дырэктарам даччынага ўнітарнага прадпрыемства «Санаторый «Крыніца».

У 2003—2005 гадах працаваў генеральным дырэктарам УП «Белпрафсаюзкурорт».

У 2005—2006 гадах — выконваючы абавязкі генеральнага сакратара Беларускага таварыства Чырвонага Крыжа.

З мая 2006 года — міністр аховы здароўя Рэспублікі Беларусь.

Біяграфія Лапо А.П.

Лапо Анатоль Пятровіч нарадзіўся 24 мая 1963 года ў в. Кулакоўка Бялыніцкага раёна Магілёўскай вобласці.

У 1986 годзе скончыў Галіцынскае Вышэйшае пагранічнае ваенна-палітычнае вучылішча КДБ СССР імя К.Я. Варашылава, у 2001 годзе — Акадэмію федэральнай пагранічнай службы Расійскай Федэрацыі.

З 1981-га па 1992 год праходзіў службу ў Чырванасцяжнай Закаўказскай пагранічнай акрузе КДБ СССР на розных пасадах: ад радавога тэрміновай службы, намесніка начальніка пагранічнай заставы, начальніка пагранічнай заставы да намесніка каменданта — начальніка штаба пагранкамендатуры.

У перыяд з 1992-га па 2008 год на розных пасадах праходзіў службу ў Смаргонскім пагранічным атрадзе, з 2004 года быў начальнікам гэтага атрада.

У 2008 годзе быў назначаны на пасаду намесніка начальніка галоўнага аператыўнага ўпраўлення Дзяржаўнага пагранічнага камітэта Беларусі, а затым — намесніка старшыні Дзяржпагранкамітэта — начальніка галоўнага ўпраўлення матэрыяльна-тэхнічнага забеспячэння.

З 2014 года працаваў намеснікам старшыні Дзяржаўнага пагранічнага камітэта Беларусі.

Генерал-маёр.

Узнагароджаны шэрагам дзяржаўных узнагарод СССР і Рэспублікі Беларусь, сярод якіх медаль «За баявыя заслугі», медалі «За бездакорную службу» І і ІІ ступені, ордэн «За службу Радзіме» ІІІ ступені.

Паводле БЕЛТА