23 Верасень, нядзеля

Вы тут

Прафесія — толькі па душы


У дзяцінстве яна зачытвалася дэтэктывамі Агаты Крысці, уяўляла сябе агентам 007, не прапускала ніводнай серыі фільма «Вяртанне Мухтара» і марыла пра нямецкую аўчарку.


Сабаку ёй не купілі, але дзіцячая мара перарасла ў мэту — стаць міліцыянерам. І зараз мая аднакласніца Валерыя Крышталь рыхтуецца да паступлення ў Акадэмію МУС. Як вядома, для гэтага патрэбна добрая фізічная падрыхтоўка. Але Лера заўсёды была спартыўнай дзяўчынкай, з дзяцінства займалася танцамі, удзельнічала ў школьных спартландыях, некалькі разоў абараняла гонар школы ў раённых спаборніцтвах па мнагабор'і.

— Падчас кірмашоў і фестываляў ніколі не прапускаю магчымасці праверыць сваю трапнасць у ціры. Звычайна выбіваю 35 з 40, але не апускаю вінтоўку, пакуль не патраплю ў «яблычак», — прызнаецца дзяўчына.

Бацькі не падзяляюць выбар дачкі, а сябры, ведаючы Леру, раяць паступаць у Інстытут культуры. На самай справе, Валерыя вельмі творчая і ініцыятыўная. Колькі памятае сябе — спявае, а яшчэ займалася ў фальклорным гуртку «Скарбніца», была адзначана дыпломам на раённым фестывалі беларускай народнай творчасці «Беларусь — мая песня». Апроч таго, дзяўчына — нязменная вядучая школьных свят і вечароў.

Год таму Валерыя скончыла мастацкую школу. Яе дыпломнай работай была карціна ў стылі сюррэалізму. У гэтым кірунку пісалі, напрыклад, Сальвадор Далі і Марк Шагал. На карціне «Выбар» Валерыя намалявала дзяўчыну ў доўгай фіялетавай сукенцы, якая знаходзіцца ў пошуку ўнутранага «я» і свайго жыццёвага шляху. Як прызнаецца Лера, менавіта цяпер яна, як ніколі, разумее сваю гераіню, таму што і сама стаіць перад выбарам:

— Я, вядома, паважаю меркаванне бацькоў і сяброў, але ўсё ж такі прафесію трэба выбіраць па душы, і я адчуваю, што крыміналістыка — гэта маё прызванне. Творчасць застанецца са мной і будзе часткай майго жыцця, а стаўшы міліцыянерам, я змагу прынесці рэальную карысць грамадству.

Валянціна Трубач, вучаніца 11 класа гімназіі №10 г. Маладзечна


Пра аўтара

Як кажа сама аўтарка, за 17 гадоў жыцця ў яе было шмат захапленняў: выпальванне, пляценне з пацерак, танцы, камп'ютарная графіка. Дзесяць гадоў Валянціна займалася ўсходнімі адзінаборствамі. Любіць чытаць класічную рускую і беларускую літаратуру.

— Цяпер маё галоўнае пытанне: кім быць? — прызнаецца дзяўчына. — Мне вельмі падабаецца пісаць кароткія замалёўкі, эсэ, сачыненні, нататкі. Я планую паступаць у Інстытут журналістыкі БДУ. Як і гераіня нататкі, хачу праз гэтую прафесію прыносіць карысць грамадству.


 

Дадаць каментар

Выбар рэдакцыі

Грамадства

75 год таму пачалося вызваленне Беларусі

75 год таму пачалося вызваленне Беларусі

23 верасня 1943 года, савецкімі войскамі быў вызвалены ад нямецка-фашысцкіх захопнікаў першы населены пункт Беларусі — раённы цэнтр Камарын.

Грамадства

Каму і чым дапаможа ТЦСАН

Каму і чым дапаможа ТЦСАН

Ад дапамогі дома пажылым і да стварэння крызісных пакояў для ахвяр хатняга гвалту.

Грамадства

Маштабныя вучэнні прайшлі ў краіне

Маштабныя вучэнні прайшлі ў краіне

Актыўная фаза камандна-штабнога вучэння Узброеных Сіл прайшла ў Беларусі ў верасні.