Вы тут

Удзел беларускіх ВНУ ў міжнародных рэйтынгах абмяркуюць 9 студзеня


У праграму семінара “Міжнародныя рэйтынгі як інструмент інтэрнацыяналізацыі ўніверсітэтаў” уключаны выступленні экспертаў у галіне ўзаемадзеяння з міжнароднымі акрэдытацыйнымі і рэйтынгавымі агенцтвамі. У прыватнасці, пра досвед удзелу БДУ і ўвогуле пра перспектывы ўдзелу ў рэйтынгах раскажа яго прарэктар па вучэбнай рабоце Аляксей Тоўсцік. Таксама запланавана разгледзець пытанні, якія тычацца інфарматызацыі універсітэта як аднаго з фактараў павышэння пазіцый ВНУ ў міжнародных рэйтынгах і іх інтэграцыі ў сусветную інфармацыйную прастору, а таксама прааналізаваць ролю бібліятэк у рэйтынгавых стратэгіях універсітэтаў.


Фота: thinktanks.by

З дакладам “Прасоўванне ўніверсітэта на міжнароднай арэне” выступіць рэгіянальны дырэктар па Усходняй Еўропе і Цэнтральнай Азіі кансалтынгавай кампаніі Quacquarelli Symonds (QS) (Лондан, Вялікабрытанія) Зоя Зайцава. Яна правядзе для ўдзельнікаў майстар-клас па прасоўванні пазіцый універсітэтаў у міжнародных рэйтынгах і метадалогіі іх правядзення.

Для даведкі: Беларускі дзяржаўны ўніверсітэт на працягу апошніх дзесяці гадоў  актыўна і паспяхова ўдзельнічае ў міжнародных рэйтынгах. Сёння вядучая ВНУ краіны знаходзіцца на 354-м месцы ў рэйтынгу універсітэтаў свету QS World University Rankings, апублікаваным агенцтвам QS. Гэтае агенцтва прадаставіла універсітэту права выкарыстоўваць сваю эмблему для абазначэння высокай міжнароднай рэпутацыі на сайце ВНУ і ў друкаваных матэрыялах.

У самым масавым міжнародным рэйтынгу Webometrics, які разлічваецца даследчай групай з Іспаніі, БДУ сярод універсітэтаў краін СНД займае трэцюю пазіцыю пасля Маскоўскага дзяржаўнага універсітэта імя М.В. Ламаносава і Санкт-Пецярбургскага дзяржаўнага універсітэта. Брытанскі спецыялізаваны часопіс Times Higher Education таксама уключыў БДУ ў лік лепшых універсітэтаў свету. Белдзяржуніверсітэт пакуль застаецца адзінай беларускай ВНУ, якая адзначана гэтым прэстыжным выданнем.

Надзея НІКАЛАЕВА

nikalaeva@zviazda.by

Выбар рэдакцыі

Грамадства

Прадпрымальнікі запусцілі сацыяльную ініцыятыву, каб сэканоміць сродкі бюджэту, але вымушаны за гэта плаціць

Прадпрымальнікі запусцілі сацыяльную ініцыятыву, каб сэканоміць сродкі бюджэту, але вымушаны за гэта плаціць

На ўпарадкаванне пасля прыклееных паперак выдаткоўваюцца велізарныя сродкі.