Адбудзецца міжнародны сімпозіум літаратараў «Пісьменнік і час»

У межах традыцыйнай Мінскай міжнароднай кніжнай выстаўкі-кірмашу, якая сёлета пройдзе з 8 па 12 лютага, адбудзецца і міжнародны сімпозіум літаратараў «Пісьменнік і час».

Асноўнай прасторай дыялогаў і разваг яго замежных і беларускіх удзельнікаў гэтым разам стане наступная тэма — «500-годдзе беларускага кнігадрукавання як частка сусветнай кніжнай гісторыі». Літаратары з Расіі, Украіны, Літвы, Польшчы, Малдовы, Латвіі, Таджыкістана, Казахстана, Азербайджана, іншых краін свету абмяркуюць здзяйсненні Францыска Скарыны ў кантэксце беларускай і сусветнай культуры. Звернуцца да разгляду літаратурных узаемасувязяў як важкага фактару міжнародных агульнакультурных узаемаадносін. Асобная дыскусійная пляцоўка будзе прысвечана функцыям мастацкай літаратуры ў свеце рэалій сучаснага свету.

— Да сімпозіума «Пісьменнік і час», заснавальнікамі якога з'яўляюцца Міністэрства інфармацыі краіны, Саюз пісьменнікаў Беларусі, Выдавецкі дом «Звязда» і выдавецтва «Мастацкая літаратура», — расказвае намеснік дырэктара Выдавецкага дома «Звязда» — галоўны рэдактар часопіса «Нёман» Аляксей Чарота, — падрыхтаваны спецыяльныя выпускі часопісаў «Нёман» і «Полымя», газеты «Літаратура і мастацтва». Мы працягваем тую даўнюю працу па знаёмству айчыннага чытача з замежнымі літаратурамі на беларускай і рускай мовах. Прыкметна, што ў Беларусі гэта адбываецца ў той час, калі вакол мізарнеюць тыражы літаратурных часопісаў, калі многія з выданняў з часам спыняюць свой выхад. Дзяржаўная падтрымка, дзяржаўная арыентаванасць у нашай краіне на сапраўднае мастацкае слова ёсць не што іншае, як праява шырокай увагі да ролі, месца перакладчыцкай справы ў развіцці і айчыннай гуманітарнай прасторы, і ўсталяванні дыпламатыі мастацтваў і культур.

Мікола БЕРЛЕЖ