Усе дзеці, якія знаходзяцца на стацыянарным лячэнні ў абласной дзіцячай бальніцы, атрымалі калядныя падарункі ад епіскапа Гомельскага і Жлобінскага Сцяфана.
Ён наведаў у тым ліку палаты ў рэанімацыйным аддзяленні, дзе блаславіў дзяцей і падтрымаў цёплымі словамі бацькоў, павіншаваў усіх са святам Раства Хрыстова:
— Свята Раства Хрыстова дорыць любоў старэйшага пакалення да малодшага, і сёння царква моліцца за гэтых дзяцей, каб Бог хутчэй даў ім акрыянне, каб яны прыйшлі ў свае сем'і і цешылі бацькоў. Гэта акрыянне і будзе, напэўна, цудам у іх жыцці.
Калядныя акцыі Гомельскай епархіі ў абласной дзіцячай клінічнай бальніцы сталі традыцыйнымі. Сёлета дзеці атрымалі ласункі, наборы цацак у гульнявыя пакоі, а таксама тэлевізар і DVD-прыстаўку ў кардыялагічнае аддзяленне.
У горадзе над Сожам прайшла і Архірэйская ёлка. Мерапрыемства сабрала ў Гомельскім дзяржаўным тэатры лялек больш за 600 дзяцей, сярод якіх дзеці святароў, дзеці-сіроты, дзеці з абмежаванымі магчымасцямі, а таксама са шматдзетных і малазабяспечаных сем'яў, якія пражываюць у раёнах, найбольш пацярпелых ад аварыі на ЧАЭС. Дзеці пабачылі спектакль і атрымалі калядныя падарункі.
Ірына АСТАШКЕВІЧ
Сумесныя праекты ядзерных тэхналогій.
У парадку дня — зацвярджэнне Канцэпцыі нацбяспекі і Ваеннай дактрыны.
