«Афіцыянт, вады!»
Сын еў суп з мясам і знайшоў костачку.
— О, я яе памыю і пакажу свайму сябру ў садзіку. Скажу, што гэта костка дыназаўра, — «загарэліся» вочы ў выдумшчыка.
* * *
Мы з Данем доўга займаліся кожны сваёй справай. Сын, напэўна, стаміўся і кажа:
— Можа, зробім перадых?
* * *
Даня распавядае:
— Дзеці ў садзіку кідаліся снежкамі. А я пачаў ім свістаць у свісток.
— А выхавальніца што рабіла?
— Яна па тэлефоне размаўляла. Вось я і вырашыў, пакуль яна занятая, усіх выхаваць.
* * *
— Заўтра ўвечары бацькоўскі сход, — кажу я Даню. — Будуць расказваць, як ты сябе паводзіш. Ты ж слухаешся выхавальніц?
— Так, — кажа Даня. — Толькі давайце не пойдзем на гэты сход.
* * *
Да нас прыехаў дзядуля ў госці.
— Хадзем пакажу табе сюрпрыз, — павёў Даня дзядулю ў свой пакой.
— І дзе сюрпрыз? — азіраецца той па баках.
— Вось! Чысціня!
* * *
Трохі пазней.
— Давай будзем заўсёды ў зале гуляць, — прапануе сын дзядулю.
— А чаму не ў тваім пакоі?
— Каб у мяне заўсёды чысціня была.
* * *
Даня з дзядулем гуляюць у «ядомае-неядомае». Унук загадвае:
— Яблык і дзве цагліны!
* * *
Муж захварэў. Кажа:
— Я сабе асобны посуд паставіў, і дай мне ручнік для твару асобны.
— Мама, давай яго пену для галення таксама асобна паставім, — прапанаваў сын.
* * *
— Мама, калі нараджаецца малы, ён пачынае ўсё грызці, — раптам кажа Даня.
— Нічога страшнага, у яго рэжуцца зубкі. Ты таксама ўсё грыз.
Даню, здаецца, не задаволіў такі адказ, бо ён раз'юшана запытаў:
— Ты што, хочаш пагрызенымі патэльнямі карыстацца?
* * *
Даня вярнуўся пасля заняткаў гімнастыкай.
— Ну што, будзем вячэраць?
— Не, я не галодны, я ў садзіку еў «бабку».
— Яна падчас трэніроўкі не «выйшла»? — пытаюся, маючы на ўвазе, што шмат энергіі затраціў.
— Не, я не хадзіў у прыбіральню.
* * *
Даню пасадзілі за святочны стол, павязалі сурвэтку вакол шыі.
— Як у рэстаране! — каменціруе бабуля.
— Афіцыянт, вады! — тут жа адрэагаваў малы.
Запісала Яна ЛЫЧКОЎСКАЯ
Мерапрыемства праводзіцца на добраахвотнай аснове.
Не выявіць ні секунды абыякавасці.