У штотыднёвым спартыўным аглядзе «Звязды» расказваем пра вынікі пятага этапу Кубка свету па біятлоне, другі поспех Антона Кушніра ў спаборніцтвах фрыстайлістаў і пра вынікі беларускай каманды на завершаным «Дакары».
1. Кубак свету па біятлоне ў Рупольдынгу завяршыўся двума гонкамі пераследу. Дар'я Домрачава, якая заняла 13-е месца ў спрынце, на старт у нядзелю не выйшла. Найлепшы вынік з беларусак паказала Надзея Скардзіна, заняўшы 27-е месца, Ірына Крыўко завяршыла гонку 39-й.
У мужчынскай гонцы пераследу з прадстаўнікоў нашай краіны выступілі Уладзімір Чапелін, які стаў 29-м, і Сяргей Бачарнікаў, які фінішаваў 47-м.
Наступны, шосты, этап Кубка свету пройдзе ў італьянскім Антхольцы з 19 па 22 студзеня.
2. Алімпійскі чэмпіён Антон Кушнір стаў пераможцам этапу Кубка свету ў амерыканскім Лэйк-Плэсідзе. Такім чынам, ён другі раз за сезон падняўся на вышэйшую прыступку п'едэстала. Нагадаем, раней Кушнір стаў пераможцам першага этапу ў кітайскім Бэйда Лэйк.
Фіналістамі мужчынскіх спаборніцтваў у Лэйк-Плэсідзе таксама былі яшчэ два беларусы. Станіслаў Гладчанка заняў выніковае 7-е месца, Максім Гусцік — 9-е.
Антон Кушнір узначаліў агульны залік Кубка свету сёлетняга сезона сярод лыжных акрабатаў. На яго рахунку 208 балаў.
У жаночых спаборніцтвах у Лэйк-Плэсідзе самы лепшы сярод беларусак вынік у Аляксандры Раманоўскай (8-е месца), Ганна Гуськова была 26-й.
3. Мінскае «Дынама» ўзяло рэванш у кітайскага клуба «Куньлунь». На гасцявой пляцоўцы «зубры» давялі сустрэчу да серыі пасляматчавых кідкоў і там сталі мацнейшымі — 3:2. Нагадаем, раней, 10 лістапада, сустрэча гэтых каманд скончылася паражэннем мінчан 3:4.
Учора перамогай (5:3) у матчы супраць «Адмірала» з Уладзівастока «Дынама» скончыла выязную серыю. Іх наступны матч пройдзе на «Мінск-Арэне» 19 студзеня супраць рыжскіх аднаклубнікаў.
4. Беларускія гоншчыкі «МАЗ-СПОРТаўта» паказалі самы высокі вынік за час выступлення на «Дакары». Экіпаж пад кіраўніцтвам Аляксандра Васілеўскага завяршыў марафон на шостым месцы. Такім чынам, Васілеўскі перавысіў уласнае дасягненне. У 2015 годзе яго экіпаж заняў 10-е месца на «Дакары».
Апошні спецучастак з фінішам у Буэнас-Айрасе стаў даволі простым і, як і чакалася, не паўплываў на вынік. Найлепшы час на этапе сярод беларусаў паказаў МАЗ Сяргея Вязовіча, які заняў трэцяе месца. Экіпаж пад кіраўніцтвам Аляксандра Васілеўскага фінішаваў у сталіцы Аргенціны дзявятым, МАЗ Аляксея Вішнеўскага прыйшоў да фінішу 17-м.
Чэмпіёнам ралі-рэйду «Дакар-2017» стаў экіпаж пад кіраўніцтвам расіяніна Эдуарда Мікалаева на Камазе. Беларус Аляксандр Васілеўскі, які заняў шостую пазіцыю ў агульным заліку, саступіў яму прыкладна 2 гадзіны 35 хвілін.
Дар'я ЛАБАЖЭВІЧ
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
Васілеўскія такія: на Зямлі і ў космасе ліхія!
