Як Месяц уплывае на ўраджай

Земляробы старажытнасці ўлічвалі больш як трыццаць нябесных параметраў, звязаных са становішчам планет на гарызонце, іх узаемнае становішча адносна Месяца і Сонца ў сувязі з планетарным тыпам глебы і клімату ў пэўнай мясцовасці. У сучасных умовах найбольш мэтазгодным з'яўляецца ўлік руху Месяца. Гэта дае адчувальны практычны вынік, дазваляе павысіць ураджайнасць культур, якія вас цікавяць, і знізіць часавыя і матэрыяльныя затраты на правядзенне работ у садзе і агародзе.

Агульныя звесткі аб руху Месяца

Многія прэснаводныя і марскія рыбы прымяркоўваюць перыяды размнажэння і міграцыі да маладзіка ці поўні. У драпежных жывёл, грызуноў перыяды актыўнасці звязаныя з перыядамі максімальнай актыўнасці гэтай планеты. Нават многія марскія водарасці, некаторыя групы хваробатворных грыбоў і бактэрый спалучаюць свой жыццёвы цыкл з рытмамі гэтай планеты.

Але больш за ўсё схільныя да ўздзеяння месяцавага цыкла расліны, чый рост, развіццё і размнажэнне шмат у чым спалучаны з фазамі руху гэтага нябеснага цела. Калі днём яны імкнуцца атрымаць як мага больш сонечнага святла, то ноччу — увабраць у сябе больш энергіі начнога свяціла. Месяц, узаемадзейнічаючы з энергіямі Сонца, задае рытм, дынаміку і кірунак працэсаў, што адбываюцца ў прыродзе. Калі сонечны цыкл неабходна ўлічваць пры планаванні сельскагаспадарчай дзейнасці на працягу года, то незаменным памочнікам для размеркавання паўсядзённых абавязкаў і спраў у садзе і агародзе будзе ўлік характарыстык месяцавага цыкла.

Месяцавы цыкл — гэта перыядычна паўтаральнае становішча Сонца, Месяца і Зямлі адносна адно аднаго. Прыблізна кожныя 29,53 сутак Месяц вяртаецца на сваё месца адносна Сонца. Месяцавы цыкл пачынаецца з маладзіка, калі Месяц і Сонца знаходзяцца ў адным пункце, калі спраецыраваць іх становішча на экліптыку. Пры гэтым Месяц звернуты да нас неасветленым бокам і таму яго не відаць. Першы месяцавы дзень, які пачынаецца адразу пасля маладзіка, з'яўляецца спрыяльным для планавання сельскагаспадарчых работ на найбліжэйшы месяц. Але ў гэты перыяд не рэкамендуецца саджаць і сеяць. Ён спрыяльны для санітарнай абрэзкі дрэў, кустоў.

Калі Сонца знаходзіцца ў паветраных знаках Блізнят, Шаляў, Вадалея, а таксама ў вогненных знаках Авена, Льва, Стральца, то маладзік будзе спрыяльны для выдалення хворага і засохлага лісця. Калі маладзік адбываецца, калі Сонца знаходзіцца ў зямных знаках Цяльца, Дзевы, Казярога або водным знаку Рака, то ён будзе прыдатным для праполкі глебы, барацьбы з пустазеллем.

Маладзіком адкрываецца 1 фаза месяцавага цыкла. Яна звязана са стыхіяй зямлі. У гэты час узыходзячыя токі ад каранёў раслін становяцца больш актыўнымі і пераважаюць над сыходнымі патокамі. Засвоеныя коранем пажыўныя рэчывы пачынаюць актыўна падымацца ўверх, каб да поўні быць засвоенымі лісцем.

Гэты час спрыяльны для актыўных сельскагаспадарчых работ, звязаных з пасадкай раслін у цяпліцы, якія потым плануецца перамясціць у адкрыты грунт. Нядрэнны час для прэвентыўнай барацьбы з пустазеллем, паколькі ў наступныя месяцавыя фазы яно праявіць сябе актыўна і знішчыць яго будзе цяжэй. У першую месяцавую фазу неабходна скараціць да мінімуму прымяненне хімічных прэпаратаў для барацьбы з насякомымі, садовымі грызунамі, бо яны могуць назапашвацца ў грунце і праз некаторы час мігрыруюць у расліны. Гэта вельмі добры час для санітарнай апрацоўкі пладовых дрэў, у прыватнасці, для выдалення засохлага лісця, старых галін.

Калі на небе з'явіцца палова Месяца, што адбудзецца прыкладна праз сем — восем дзён пасля маладзіка, наступіць другая фаза месяца. Яна звязана са стыхіяй зямлі і зялёным колерам. У гэты час узыходзячы ток раслін актыўна нясе пажыўныя рэчывы ад кораня праз сцябло і лісце, у той час як сыходны ток ад лісця праз сцябло да каранёў прыкметна запавольваецца. Працэсы сінтэзу пажыўных рэчываў, фотасінтэз паскараецца.

У гэты час натуральныя ахоўныя рэакцыі раслін паляпшаюцца і яны ў стане лепш спраўляцца з неспрыяльнымі фактарамі навакольнага асяроддзя. Пакаёвыя расліны будуць адчувальныя да асветленасці, а таксама да гідралагічнага рэжыму. У гэты перыяд рэкамендуецца часты, але ўмераны паліў пакаёвых раслін і агародных культур. Але гэта не самы зручны перыяд для выдалення засохлага лісця, абрэзкі бакавых галін пладовых дрэў.

Завяршае трэцюю фазу месяцавага цыкла наступленне поўні, калі відаць асветленая частка Месяца. У поўню ўзыходзячыя токі раслін максімальныя, а актыўнасць сыходных токаў мінімальная. Сінтэз хларафілу ў лісці ідзе інтэнсіўна. У гэты час рэкамендуецца ўносіць угнаенні ў грунт, саджаць дрэвы, кусты, перасаджваць старыя дрэвы, а таксама ўносіць расаду ў адкрыты грунт і ў цяпліцы.

Поўня адкрывае трэцюю фазу месяцавага цыкла, калі месяцавы дыск паступова змяншаецца. Перыяд ад маладзіка да поўні называецца Растучым Месяцам, а перыяд ад поўні да маладзіка называецца Старэючым Месяцам.

Трэцяя фаза месяцавага цыкла звязана са стыхіяй паветра і жоўтым колерам. У гэты час рэчывы, сінтэзаваныя ў лісці, пачынаюць свой актыўны рух праз сцябло да кораня. Па меры праходжання трэцяй месяцавай фазы расліна паступова засвойвае назапашаны пажыўны матэрыял для свайго развіцця і росту. Гэта вельмі добры час для вырабу сокаў, перапрацоўкі сцёблаў, а таксама для збору раслін для неадкладнага ўжывання, калі гэтаму не перашкаджаюць іншыя астралагічныя паказчыкі. У трэцюю месяцавую фазу добра збіраць смалу са ствалоў хвойных, а таксама праводзіць санітарную апрацоўку ствалоў пладовых дрэў. Калі ёсць іншыя астралагічныя ўказанні, то на гэту фазу лепш за ўсё прымеркаваць прышчэпку яблынь, сліў, алычы, вішань.

Чацвёртая фаза пачынаецца тады, калі на небе застанецца менш як палова месяцавага сярпа. Яна звязана са стыхіяй агню і чырвоным колерам. У гэты час сыходныя токі ад лісця праз сцябло становяцца вельмі актыўнымі, у той час як узыходзячыя токі маюць мінімальны ўзровень інтэнсіўнасці. Рэчывы, якія не былі выкарыстаны раслінай для пабудовы свайго цела і росту, пачынаюць актыўна назапашвацца ў корані. Чым бліжэй да маладзіка, тым лепшыя ствараюцца ўмовы для абрэзкі дрэў, пасадкі караняплодаў, такіх, як морква, рэпа, бульба, буракі, бручка, спаржа, чорная рэдзька. Гэтая фаза Месяца найлепшая для ўнясення ўгнаенняў, як мінеральных, так і арганічных, асабліва тады, калі Сонца знаходзіцца ў зямных і паветраных знаках. Гэта добры час для барацьбы са шкоднікамі і пустазеллем, якія знаходзяцца ў зямлі і на зямлі.

Уплыў Месяца на сельскагаспадарчыя работы

Для планавання дзейнасці на тыдзень-два наперад неабходна ўлічваць фазу Месяца і сонечнага цыкла. Гэта першасная інфармацыя. Для правядзення работ на найбліжэйшыя некалькі дзён трэба ўлічваць становішча Месяца ў знаках Задыяка. Гэта інфармацыя другасная.

Месяцавы цыкл занадта нестабільны. Ён вельмі хутка мяняе свой уплыў. Часта яго ўплыў трансфармуюць бачныя планеты, і тады многія рэкамендацыі будуць не зусім адпавядаць агульнапрынятым. Калі вы сустрэнеце гэта ў штодзённым календары работ, то не палохайцеся, бо часам месяцавыя рытмы вымушаны падпарадкоўвацца больш высокім па энергетыцы і ўздзеянні бачных планет Сонечнай сістэмы.

Падрыхтоўка глебы для градак

Ускопванне зямлі, падрыхтоўка яе для будучых пасеваў з'яўляецца асноўнай часткай першай вогненнай фазы сонечнага цыкла, якая пачынаецца ў канцы сакавіка і пачатку красавіка. Ускопванне градак для будучых пасеваў звязана з энергіямі планеты Марс, і, значыць, першы раз павінна праводзіцца на растучай фазе Месяца, гэта значыць у першую ці другую месяцавыя квадры. Пажадана, каб ён знаходзіўся ў вогненных знаках Задыяка — Авене, Льве, Стральцы. Лепш выбраць час, калі ён будзе знаходзіцца ў знаку Льва, калі гэта датычыцца прысядзібнага ўчастка, у знаку Авена, калі гаворка ідзе пра вялікія тэрыторыі палёў і сельскагаспадарчых угоддзяў.

Другі раз зямлю неабходна ўскопваць на ўбываючай фазе, гэта значыць у трэцюю і чацвёртую месяцавыя квадры. Пажадана гэта рабіць, калі Месяц знаходзіцца ў знаку Казярога, Дзевы або Цяльца. Калі вы апрацоўваеце прысядзібны ўчастак, то лепш за ўсё выбраць дні знаходжання Месяца ў знаку Казярога. Калі гаворка ідзе пра вялікія ўчасткі зямлі, то лепш за ўсё выбраць дні Дзевы. Для аранжарэйных і цяплічных глеб пажадана выбіраць дні становішча Месяца ў Казярогу і Цяльцы. Трэці раз ускопваць зямлю трэба на чацвёртай месяцавай фазе, калі Месяц будзе знаходзіцца ў зямным ці вогненным знаку.

Пасадка раслін

Пасадка раслін з'яўляецца восевым працэсам усіх сельскагаспадарчых работ. Неабходна выразна адрозніваць пасадку раслін-караня-
плодаў і раслін, якія развіваюцца і даюць ураджай надземнымі часткамі. Акрамя таго, правілы пасадкі дрэў, кустоў, аднагадовых і шматгадовых раслін будуць не вельмі адрознівацца.

У першую чаргу трэба ўлічваць пладавітасць знакаў Задыяка. Пладавітымі знакамі з'яўляюцца Цялец, Рак, Скарпіён і Рыбы. Калі Месяц звязаны з гэтымі знакамі, то надыходзіць найбольш спрыяльны час для пасадкі раслін, якія павінны даваць вялікі ўраджай па біямасе, напрыклад буракоў, бульбы, баклажанаў, кавуноў.

Можна выкарыстоўваць знакі сярэдняй пладавітасці — Казярога, Авена, Стральца, Льва — для пасадкі культур, якія валодаюць унікальнымі ўласцівасцямі (напрыклад, лекавымі), або тых, для якіх не мае значэння аб'ём іх біямасы, напрыклад газоннай травы.

Бясплодныя знакі Блізнят, Шаляў і Вадалея трэба выкарыстоўваць вельмі асцярожна. Становішча Месяца ў гэтых знаках Задыяка пажадана выкарыстоўваць для пасадкі экзатычных, не характэрных для клімату сярэдняй паласы раслін, дэкаратыўных гібрыдных культур, якія не могуць даваць вялікага ўраджаю, а служаць толькі прадметам эстэтычнага задавальнення. Напрыклад, у дні праходжання Месяца па знаку Вадалея можна высаджваць кітайскі лімоннік, айву, а ў дні становішча Месяца ў Блізнятах — ліяны, бярозкі і асабліва вінаград. Памятайце, што пладавітасць знакаў — пераменная велічыня, і ў залежнасці ад становішча планет і фазы сонечнага цыкла яна можа мяняцца. Многія знакі сярэдняй пладавітасці і бясплодныя знакі могуць мяняцца месцамі.

Акрамя таго, трэба ўлічваць фазу Месяца. Расліны, якія развіваюцца над зямлёй, варта саджаць на растучай фазе Месяца, гэта значыць у першую і другую месяцавыя квадры. Звычайна ў канцы другой месяцавай квадры перасаджваюць дрэвы, кусты, пакаёвыя дрэвападобныя расліны.

У той жа час расліны, якія павінны даць добры ўраджай пад зямлёй, напрыклад, караняплоды, трэба саджаць на трэцяй і чацвёртай месяцавых квадрах.

Вельмі добры час для перасадкі і пасадкі культур, ад якіх патрабуецца развіццё магутнай каранёвай сістэмы, будзе ў дні, калі Месяц праходзіць задыякальны знак Дзевы. Ён дае пераважнае развіццё каранёвай сістэмы. Шматгадовыя культуры лепш за ўсё саджаць менавіта ў гэты перыяд часу.

Паліў раслін

Паліў раслін, якія знаходзяцца ў адкрытым грунце і развіваюцца ў асноўным над зямлёй, трэба рабіць на растучым Месяцы, у першую і другую месяцавыя квадры, каб забяспечыць падтрымку развіцця сцябловых і ліставых структур.

У той жа час паліў раслін, якія развіваюцца пад зямлёй, рэкамендуецца рабіць у трэцяй і чацвёртай месяцавых фазах, гэта значыць на так званым старэючым Месяцы, каб забяспечыць пераважнае развіццё каранёвай сістэмы караняплодаў.

Калі вашы расліны маюць слабую каранёвую сістэму, то багаты паліў лепш рабіць у чацвёртую месяцавую квадру. Калі ж слаба развіваюцца ліставыя структуры і сцёблы, то лепш за ўсё паліваць у першую і другую месяцавыя квадры.

Пакаёвыя і экзатычныя расліны лепш за ўсё добра паліваць, калі Месяц будзе знаходзіцца ў знаках вады — Раку, Скарпіёне і Рыбах. Пазбягайце паліваць расліны, калі Месяц знаходзіцца ў знаку Шалі, гэта можа выклікаць запавольванне развіцця і росту.

Унясенне ўгнаенняў

Арганічныя ўгнаенні неабходна ўносіць пераважна на другой месяцавай квадры, калі Месяц знаходзіцца ў знаку Рака або, у горшым выпадку, у знаку Скарпіёна. Пазбягайце ўнясення не мінеральных, асабліва азотных угнаенняў, калі Месяц будзе праходзіць знакі Агню — Льва, Авена і Стральца. Угнаенні, унесеныя ў красавіку і жніўні, калі Месяц знаходзіўся ў знаках Авена і Льва, будуць дрэнна засвойвацца раслінамі.

Мінеральныя ўгнаенні лепш за ўсё ўносіць на трэцяй месяцавай фазе. У першую чаргу гэта датычыцца збожжавых культур і фруктовых дрэў. Перыяд непасрэдна перад поўняй, а таксама дні змены фаз месяцавага цыкла неабходна выкарыстоўваць для ўнясення мікраэлементаў у глебу.

Барацьба са шкоднікамі і пустазеллем

Найлепшы час для барацьбы з насякомымі — трэцяя і чацвёртая фаза месяцавага цыкла, калі Месяц знаходзіцца ў знаках паветра — Блізнятах, Шалях і Вадалеі. Хімічную апрацоўку пладовых дрэў, кустоў сёлета лепш за ўсё праводзіць, калі Месяц будзе знаходзіцца ў знаках Вадалея і Льва, паколькі планетарныя ўплывы зменяць уздзеянне месяцавага цыкла.

Барацьба з падземнымі шкоднікамі будзе паспяховай у дні, калі Месяц праходзіць знакі Цяльца, Казярога і Дзевы, у асноўным на чацвёртай месяцавай фазе. Але сёлета ў дні Дзевы не рэкамендуецца выкарыстоўваць для гэтага моцныя хімічныя прэпараты на аснове медзі.

Калі казаць пра пустазелле, то найлепшы час для яго выдалення наступіць, калі Месяц будзе знаходзіцца ў знаках Казярога і Скарпіёна ў трэцяй і чацвёртай месяцавых фазах, а ў першай і другой неабходна выкарыстоўваць дні праходжання Месяца па знаках Льва і Стральца. Асеннюю праполку градак лепш за ўсё праводзіць пры ўбываючым Месяцы, калі ён будзе знаходзіцца ў знаках Рака, Льва, Казярога.

Меры па барацьбе са шкоднікамі, якія жывуць на сцябле і лісці раслін, добра праводзіць, калі Месяц будзе знаходзіцца ў знаках Авена, Льва або Вадалея на другой і трэцяй месяцавай квадры.

Абрэзка і прышчэпка раслін

Абрэзка пладовых дрэў і кустоў павінна праводзіцца на чацвёртай месяцавай фазе, калі Месяц знаходзіцца ў мужчынскіх, актыўных знаках — Авена, Льва, Шаляў, Стральца. Але пажадана, каб гэта не прыпадала на другую і трэцюю квадру Месяца, калі ён знаходзіцца ў знаках Рака, Скарпіёна і Рыб.

Прышчэпліваць пладовыя дрэвы лепш за ўсё ў першую і другую месяцавыя квадры, калі Месяц знаходзіцца ў вогненных знаках Авена, Льва і асабліва Стральца.

Калі вам неабходна выдаліць засохлыя або хворыя расліны, то гэта лепш за ўсё рабіць у маладзік, гэта значыць на мяжы чацвёртай і першай квадраў, калі Месяца яшчэ не відаць.

Абразаць вінаградную лазу і павойныя расліны лепш за ўсё на чацвёртай квадры, калі Месяц будзе знаходзіцца ў знаку Авена або Стральца.

Збор ураджаю

Лепш за ўсё для гэтага выбраць узыходзячую фазу месяцавага цыкла, гэта значыць час першай і другой месяцавых квадраў, калі гаворка ідзе пра збор агародніны і садавіны на захоўванне. Гэта дазваляе ім доўга захоўвацца нават пры ўздзеянні неспрыяльных умоў навакольнага асяроддзя.

Для збору ўраджаю збожжавых культур зручны час — дні праходжання Месяцам вогненных знакаў Авена і Льва ў трэцяй месяцавай чвэрці.

Для збору і закладкі на захоўванне караняплодаў, такіх, як бульба, буракі, радыска, неабходна выкарыстоўваць чацвёртую месяцавую квадру і праходжанне Месяца па вогненных знаках, лепш за ўсё па знаку Авена.

Збор ураджаю для неадкладнага ўжывання добра прымеркаваць да праходжання Месяца па знаках Авена, Рака, Скарпіёна або Казярога на першай або трэцяй месяцавых квадрах. Але гэтыя дні будуць неспрыяльнымі для збору ўраджаю на захоўванне.

Дэкаратыўныя і кветкавыя культуры для фарміравання букета лепш за ўсё зрэзаць, калі Месяц будзе расці і звязаны са знакамі Шаляў або Вадалея. Лекавыя расліны трэба збіраць, калі Месяц праходзіць адпаведныя неабходным для ўжывання часткам расліны. У дні кораня, калі Месяц у Цяльцы, Казярогу і Дзеве, рэкамендуецца збіраць карэнне лекавых раслін, напрыклад, валяр'яну. Калі праходзяць дні ліста, пры знаходжанні Месяца ў знаках Рака, Скарпіёна і Рыб, — варта збіраць сцёблы і лісце, кару лекавых раслін. У дні кветкі, калі Месяц праходзіць знакі Блізнят, Вадалея і Шаляў, добра збіраць кветкі лекавых раслін. У дні плода, калі Месяц будзе знаходзіцца ў знаках Авена, Льва і Стральца, варта збіраць плады лекавых раслін. Для збору грыбоў найбольш прыдатным будзе перыяд праходжання Месяца па знаку Скарпіёна на другой і чацвёртай месяцавай квадры.

Уладзімір Васюк.

Уладзімір Васюк — прафесійны астролаг з 17-гадовым стажам. Мае дзве вышэйшыя адукацыі: біялагічную і эканамічную. У 1997 годзе скончыў Цэнтральную астралагічную акадэмію ў Маскве, у 2001 годзе — Australіan Academy of Astrology & Cosmobіology (AAAC). Сфера інтарэсаў — сусветная і бізнес-астралогія.