23 студзеня, аўторак

Вы тут

Савет па ўзаемадзеянні органаў мясцовага самакіравання пачаў працаваць


Першае ў гэтым годзе выязное пасяджэнне Савета па ўзаемадзеянні органаў мясцовага самакіравання пры Савеце Рэспублікі Нацыянальнага сходу Беларусі прайшло ў Лідскім раёне. Там члены Савета і госці паглядзелі, як прыцягваюцца замежныя інвестыцыі, і абмеркавалі работу органаў мясцовага кіравання і самакіравання. Асноўны крытэрый — выкананне задач, агучаных на V Усебеларускім сходзе.


Працаваць на «Бел-Пласт Інтэрнэшнл» прэстыжна. Не дзіва, што вакансіі тут бываюць рэдка.

Спачатку — экскурсія

Першы прыпынак — шклозавод «Нёман». Прадпрыемства, якое робіць адны з самых прыгожых вырабаў са шкла. Дарэчы, у той дзень увечары, пасля візіту Савета па ўзаемадзеянні, «нёманскае» шкляное сэрца ўручылі пераможцам Нацыянальнага адбору на «Еўрабачанне». На вытворчасці не так даўно прайшла мадэрнізацыя — пра яе расказаў дырэктар «Нёмана» Ігар Бацян. Акрамя гэтага, на заводзе імкнуцца паступова зніжаць сабекошт. Эканамічны эфект ад такіх мерапрыемстваў у 2015 годзе склаў 1,6 млн рублёў, у 2016-м — 1,2 млн рублёў. Калі зайшла размова пра заробак, дырэктар адзначыў, што ўзровень у 1000 рублёў можа быць дасягнуты ў бліжэйшы час. «Асабліва на вытворчасці шклаваты зрабіць гэта — элементарна».

Старшыня Бярозаўскага гарадскога Савета дэпутатаў Валерый Яводзік у сваю чаргу звярнуў увагу на тое, што рашэннем гарвыканкама ўся тэрыторыя горада замацаваная за арганізацыямі, у тым ліку за шклозаводам «Нёман». Гэта азначае, што яны адказваюць за навядзенне парадку на пэўнай, напрыклад, вуліцы. Прыкладна два разы на год супрацоўнікі на сваёй тэрыторыі праводзяць месячнікі, а на працягу года даглядаюць яе, падтрымліваюць чысціню.

Пасля Бярозаўкі члены Савета накіраваліся на Лідскі ветэрынарна-санітарны ўтылізацыйны завод. Там яны паглядзелі, як арганізаваны замкнёны ланцужок вытворчасцяў. Прадпрыемствы накшталт гэтага існуюць у Літве і Латвіі. З Літвы і прыйшла кампанія «Марыямпалес АРВІ», якая вырашыла, што Беларусі патрэбен свой завод. Ён, дарэчы, прыцягнуў 23 млн рублёў інвестыцый у раён. Унікальнае прадпрыемства ажыццяўляе збор і перапрацоўку прадуктаў жывёльнага паходжання. Нават калі жывёла памерла ад нейкай хваробы, на вытворчасці змогуць яе бяспечна ўтылізаваць. У выніку атрымліваюць два прадукты: мяса-касцявую муку (зараз ідуць перамовы, каб пашырыць яе экспарт і прадаваць у Бангладэш і В'етнам) і тэхнічны тлушч, які ў Еўрасаюзе выкарыстоўваюць для вырабу біяпаліва. У хуткім часе запрацуе другая лінія, што дасць магчымасць павялічыць аб'ёмы вытворчасці ў 1,9 раза.

Іншае прадпрыемства, якое пабудавала гэтая ж літоўская кампанія, — «Арвібелагра». На ім вырошчваюць індыкоў. Дарэчы, у нашай краіне ў сярэднім ужываюць 200 грамаў мяса індычкі на душу насельніцтва, у той час, як у Еўропе гэты паказчык — 4 кілаграмы. Лічыцца, што гэта мяса больш карыснае, бо амаль не мае халестэрыну. На прадпрыемстве расказалі, што адзін з дырэктараў школ алімпійскага рэзерву ўжо заказаў партыю прадукцыі для сваіх спартсменаў.

Мі­ной­таў­скі ра­монт­ны за­во­д павялічыў экспарт да 57%.

Памятаць пра галоўнае

Дырэктар Мінойтаўскага рамонтнага завода ўпэўнены, што для яго прадукцыі канкурэнтаў няма. Прадпрыемства з кожным годам павялічвае экспарт: калі ў 2015-м ён складаў 39%, то ў 2016-м ужо 57%. На гэтым выніку адбіліся і пастаўкі ва Украіну, якія былі адноўленыя. Дарэчы, аб'ёмы вытворчасці за мінулы год выраслі на 16%.

Прыкладам, як зрабіць завод больш эканомным, стаў «Бел-Пласт Інтэрнэшнл» — прадпрыемства, якое вырабляе пластыкавую тару для бытавой хіміі, касметыкі і прадуктаў харчавання. Зараз яно пачынае рэалізоўваць новы праект па вытворчасці ПЭТ-бутэлек — празрыстай тары высокай якасці для касметыкі і бытавой хіміі. На заводзе стаіць спецыяльная ўстаноўка, якая дазваляе эканоміць электраэнергію, а таксама ўсталявана сістэма рэкумерацыі — яна бярэ цеплыню ад машын і перадае ў батарэі.

Старшыня Савета Рэспублікі Нацыянальнага сходу Беларусі Міхаіл Мясніковіч расказаў, чым яшчэ цікавіліся члены Савета па ўзаемадзеянні падчас візітаў на прадпрыемствы:

— Савет па ўзаемадзеянні ахоплівае прадстаўнікоў усіх катэгорый кіравання і гаспадарчых суб'ектаў — таму, па-першае, ёсць наконт чаго абмяняцца думкамі, па-другое, калі прафесіяналы сустракаюцца, яны ўзаемна ўзбагачаюць адзін аднаго. Тут таксама прымаюць удзел прадстаўнікі прафсаюзаў, Акадэміі кіравання... Я думаю, што і для гэтых арганізацый наша мерапрыемства будзе добрай школай. У Лідскім раёне досыць паспяхова вырашаюцца сацыяльныя пытанні, таму сёння мы разглядалі работу і дзіцячых дашкольных устаноў, і аб'ектаў аховы здароўя, і школ ... Можа, не так глыбока, як вытворчую сферу і работу Саветаў, але гэтыя пытанні таксама былі ў полі зроку. Такім чынам, можна казаць пра комплексны падыход. Ёсць чаму вучыцца, што запазычыць і трансфармаваць на ўсю тэрыторыю.

Пасля наведвання пяці прадпрыемстваў настрой удзельнікаў быў узняты.

Вырашаць разам

Вынікі ўбачанага ў раёне прадстаўнікі Савета па ўзаемадзеянні абмеркавалі на пасяджэнні. Старшыня Пастаяннай камісіі Савета Рэспублікі Нацыянальнага сходу па рэгіянальнай палітыцы і мясцовым самакіраванні, намеснік старшыні Савета па ўзаемадзеянні органаў мясцовага самакіравання пры Савеце Рэспублікі Аляксандр Папкоў адзначыў, што «гэта тое кола зносін, калі мы можам высветліць пэўныя пытанні, праблемы, якія ўзнікаюць у нашым паўсядзённым жыцці».

На пасяджэнні выступілі і прадстаўнікі кіраўніцтва Лідскага раёна і Гродзенскай вобласці. Старшыня Гродзенскага абласнога Савета дэпутатаў, член Савета Рэспублікі Нацыянальнага сходу Беларусі Ігар Жук адзначыў, што ў вобласці стала добрай практыкай сумесна планаваць і праводзіць розныя мерапрыемствы — прэзідыумы абласнога Савета і выканкама, пасяджэнні прэзідыума, пастаянных і міжведамасных камісій, якія створаны пры абласным выканаўчым камітэце. «Старшыня Гродзенскага аблвыканкама часта ўдзельнічае ў сесіях, кантактуе з дэпутатамі, — і мы тут цесна супрацоўнічаем. Сумесна распрацоўваем і зацвярджаем дакументы, якія ўплываюць на сацыяльна-эканамічнае жыццё. Каля 30% дэпутатаў абласнога Савета ўключаны ў склад міжведамасных камітэтаў і камісій». Дарэчы, пры абласным Савеце ў 2015 годзе быў створаны маладзёжны парламент.

Гродзенская вобласць як прыгранічная актыўна ўдзельнічае ў трасгранічных праграмах супрацоўніцтва. Дзве найбуйнейшыя: Латвія—Літва—Беларусь і Польшча—Беларусь—Украіна. Старшыня Гродзенскага аблвыканкама Уладзімір Краўцоў расказаў, што «цяпер падрыхтаваны 200 праектаў па гэтых дзвюх праграмах на суму больш за 50 млн еўра. З 2017 года пачнём працаваць над імі». Вядома, першапачаткова яны пройдуць пэўны адбор, і толькі лепшыя ідэі будуць рэалізаваны. Старшыня Лідскага райвыканкама Міхаіл Карповіч звярнуў увагу на тое, што летась дзякуючы экспарту тавараў у раён паступіла каля $270 млн — на душу насельніцтва прыпадае каля $2000 экспартнай выручкі. А гэта другое месца ў вобласці.

Ведаць адзін аднаго

Нацыянальная акадэмія навук правяла сацыялагічнае даследаванне і высветліла, ці ведаюць выбаршчыкі сваіх дэпутатаў. Лічбы не радуюць. На пярвічным узроўні сваіх дэпутатаў ведаюць 53% грамадзян, на ўзроўні раёна — 41%, вобласці — 20%, членаў Палаты прадстаўнікоў — 15%, Савета Рэспублікі — 12%. Міхаіл Мясніковіч параіў «сустракацца з людзьмі, вырашаць пытанні, а лепш не дапускаць ніякіх праблем, працаваць на апярэджанне».

Адно з галоўных дасягненняў Лідчыны, якое адзначылі ўсе ўдзельнікі выязнога пасяджэння, — прыцягненне інвестыцый. Наконт гэтага выказаўся і старшыня Савета Рэспублікі: «Давайце паглядзім на міжнародныя трэнды. Ужо другі год запар ідзе вялікі адток капіталу з краін Паўднёва-Усходняй Азіі. Па розных ацэнках, ад $500 млрд у год вяртаецца ў краіны ЕС і ЗША. Працэс набірае абароты. Толькі за 11 дзён студзеня 2017 года фонды, якія інвестуюць у Кітай, страцілі $650 млн. Адток сродкаў фіксуюць і індыйскія фонды. У той жа час, нягледзячы на санкцыі, аб'ём замежных інвестыцый у расійскія фонды склаў па другім паўгоддзі 2016-га каля $200 млн у тыдзень. А колькі замежных інвестыцый прыйшло ў Беларусь? За 9 месяцаў мінулага года — каля $1 млрд. Ці можна ў гэтай сітуацыі, калі ў нас крэдытныя рэсурсы вельмі дарагія, калі бюджэтных сродкаў і прыбытку прадпрыемстваў недастаткова, забяспечыць прыстойную мадэрнізацыю для таго, каб наша прадукцыя была канкурэнтаздольнай? Вядома, не. Таму мы вельмі зацікаўленыя ў прыцягненні прамых замежных інвестыцый.

Вядома, лепш, калі айчыннага капіталу будзе больш, але трэба зыходзіць з жорсткага прагматызму, што гэта прадпрыемства працуе на нашай тэрыторыі, з'яўляецца рэзідэнтам Рэспублікі Беларусь, плаціць падаткі ў бюджэт, там працуюць нашы людзі. На беларуска-польскім прадпрыемстве («Бел-Пласт Інтэрнэшнл». — Аўт.) за 17 гадоў польскі заснавальнік ні аднаго долара яшчэ адсюль не вывеў. Усе дывідэнды ён рэінвестуе ў развіццё вытворчасці. Таму трэба досыць сур'ёзна гэтым займацца і ствараць умовы для інвестараў».

Надзея АНІСОВІЧ

аnіsоvісh@zvіаzdа.bу

Фота Сяргея НІКАНОВІЧА

Загаловак у газеце: Пацяпленне інвестыцыйнага клімату

Дадаць каментар

Выбар рэдакцыі

Грамадства

Знайсці працу дапаможа служба занятасці насельніцтва

Знайсці працу дапаможа служба занятасці насельніцтва

Хойніцкі, Брагінскі і Жлобінскі раёны афіцыйна адносяцца да тых, дзе адзначаецца самы высокі ўзровень беспрацоўя — 0,8 %.

Грамадства

Звычайная настаўніца фізікі трапіла на адронны калайдар

Звычайная настаўніца фізікі трапіла на адронны калайдар

Што насамрэч адбываецца на мяжы Швейцарыі і Францыі, дзе на глыбіні каля ста метраў размяшчаецца Вялікі адронны калайдар?

Грамадства

Як мы наведалі курсы перападрыхтоўкі для беспрацоўных

Як мы наведалі курсы перападрыхтоўкі для беспрацоўных

Не так даўно навукоўцы выявілі, што стрэс ад страты або змены месца працы ўваходзіць у топ-3 самых моцных негатыўных перажыванняў сучасных людзей.