Вы тут

Экслібрыс «Звязды». Авантуры Пранціша Вырвіча, здрадніка і канфедэрата


Людміла Рублеўская. Авантуры Пранціша Вырвіча, здрадніка і канфедэрата. — Мінск: Звязда, 2017. — 368 с.


Новая кніга серыі — як новы сезон любімага серыяла: героі ўсе знаёмыя, іх характары вядомыя, чытаеш — нібы плывеш на хвалях павольнай ракі. Але кепска тое, што, як у серыяле бывае апошні сезон, так у кніжнай серыі — апошні том. Сумна ўсведамляць, што гісторыя смелага Пранціша Вырвіча і мудрага Баўтрамея Лёдніка заканчваецца. Але гэта не азначае, што новы раман Людмілы Рублеўскай наводзіць нуду і выклікае сон. Зусім наадварот: чацвёртая кніга прыгод нашых любімых герояў хавае шмат вострых момантаў, выпрабаванняў, вынаходніцтваў.

Раман «Авантуры Пранціша Вырвіча, здрадніка і канфедэрата» прыйшоў да чытача спачатку на старонках часопіса «Полымя», затым у фармаце электроннай кнігі і толькі цяпер — у класічным папяровым варыянце. Твор зноў пераносіць нас у эпоху Асветніцтва, вірлівае XVІІІ стагоддзе, дзе герояў літаральна на кожным шляху чакаюць і прыемныя сюрпрызы, і смяротная небяспека. Як ужо бачна па назве, Пранціш і Баўтрамей становяцца канфедэратамі, змагаюцца за незалежнасць краю, супрацьдзейнічаюць старым і новым ворагам, здабываюць саюзнікаў.

Гэтым раманам Людміла Рублеўская нібыта закрывае кола расповеду пра сваіх герояў: як і ў першай кнізе, яны працуюць з вялікім і значным ваенным вынаходніцтвам (ужо падводным), гэтым разам выпраўляюцца ў старажытны Тураў, дзе разгадваюць загадкі падводнага возера, зноў дзейнічаюць у Полацку. Цікава, што тут мы сустракаем старых знаёмых, яны абсалютна пазнавальныя, хоць змянілі імя, а некаторыя — нават знешнасць. Падаецца, што ў кнізе яшчэ большы акцэнт робіцца на медыцыне, рабоце з мозгам, смелых эксперыментах са свядомасцю і характарамі пацыентаў.

Мы знаёмімся з вынаходніцтвамі, што дазваляюць даследаваць мозг, апынаемся на небяспечных аперацыях і нават разам з Вырвічам выпрабоўваем лекі, якія спачатку сціраюць, а потым (ужо змяшаныя ў новых прапорцыях) аднаўляюць памяць. Але, як кажа Лёднік, «усё — лекі, і ўсё — атрута», таму без гэтай навуковасці, расказваючы пра той час, аўтару немагчыма абысціся. Сама эпоха вымагала адвагі, мужнасці і цвёрдасці, адкрытасці новым тэорыям і поглядам. І доктар Баўтрамей Лёднік становіцца тым самым універсальным асветнікам, каму не чужыя філасофія, медыцына, хімія і фізіка. А расповеды пра эксперыменты не ўскладняюць сюжэт твора, а зусім наадварот — робяць яго яшчэ больш захапляльным.

Ярка вымалёўвае пісьменніца і лінію пачуццяў галоўных герояў. І калі ў жыцці доктара Лёдніка ў гэтай сферы ўсё застаецца па-ранейшаму: ён шчаслівы з жонкай Саламеяй, гадуе дваіх дзетак і жыве клопатамі пра іх, то ў Пранціша зноў разгараецца і згасае старое каханне, а таксама ўзнікае новае. Хай гэта будзе спойлерам, але скажу, што Вырвіч тут нарэшце ажэніцца, але яго шлюб стане, як вядзецца, новай авантурай са шчаслівым канцом. Шкада толькі, што ў гэтай кнізе Людміла Рублеўская заб'е адну з самых яскравых гераінь усяго цыкла раманаў...

Развітвацца заўсёды сумна, але мы пакідаем Беларусь XVІІІ стагоддзя з упэўненасцю, што край застаецца ў добрых руках. Падрастаюць дзеці Лёдніка, Алесік стаў сапраўдным мужным рыцарам, а маленькая Сафійка ўжо ў дзяцінстве пачынае выяўляць прагу да навукі і доследаў. Таму можна быць упэўненымі, што ў рэальнасці раманаў Людмілы Рублеўскай пра адважнага Вырвіча і дапытлівага Лёдніка ўсё будзе добра, хоць і не заўсёды спакойна.

Марына ВЕСЯЛУХА

vesіaluha@zvіazda.by

Загаловак у газеце: Жыццё або гонар?

Выбар рэдакцыі

Культура

Як  мастак Май Данцыг ствараў свае карціны

Як мастак Май Данцыг ствараў свае карціны

Наватар, «шасцідзясятнік», ваяўнічы аптыміст — гэта ўсё пра яго.

Грамадства

Як ператварыць звычайны ўрок беларускай літаратуры у творчую майстэрню?

Як ператварыць звычайны ўрок беларускай літаратуры у творчую майстэрню?

Настаўнікі ўпэўнены: ці будуць вучні чытаць, у многім залежыць ад іх саміх. 

Эканоміка

Петришенко: Называть ЕАЭС экономическим союзом сегодня можно только авансом

Петришенко: Называть ЕАЭС экономическим союзом сегодня можно только авансом

Однако наша страна надеется, что это временные трудности.

Грамадства

Апублікаваны поўны тэкст Канцэпцыі інфармацыйнай бяспекі Беларусі

Апублікаваны поўны тэкст Канцэпцыі інфармацыйнай бяспекі Беларусі

Дзяржаўным органам і іншым арганізацыям даручана кіравацца палажэннямі канцэпцыі ў практычнай дзейнасці.