Вы тут

Дзе знайсці жаніха


«Добрыя мужчыны на дарозе не валяюцца», — сказала мне неяк бабуля. — «Яны па ёй ездзяць!» — дадумала я, села ў аўтамабіль і ў чарговы раз выправілася на «паляванне».


Месца: дарога, затор, аўтасэрвіс, запраўка.

Уваход: для тых, у каго ёсць вадзіцельскія правы.

Дрэс-код: штосьці спакуслівае, але камфортнае.

Абавязкова для выканання: жаноцкія паводзіны ў любой сітуацыі.

Гэтым разам удзельнічаць у журналісцка-авантурысцкім падарожжы будзе мая стрыечная сястра. Каця — кіроўца вопытны, а таму і эксперымент па пошуку патэнцыйнага жаніха за рулём аўто ёй можна даверыць з упэўненасцю.

— З дзяўчатамі на выключна жаночых транспартных сродках знаёмяцца часцей, чым з іх сяброўкамі на «мужчынскіх» аўтамабілях, — пачала Каця, пачуўшы «баявое заданне». — Таму сёння мы паедзем на матчынай Tоуоtа Yаrіs.

Сеўшы за руль маленькай чырвоненькай машынкі, Кацька адразу падрыхтавалася да шавіністычных насмешак і нават вадзіць пачала горш, чым звычайна. Але ніхто з нас не смяяўся! Наадварот, не толькі кіроўцы, але і пешаходы з задавальненнем прапускалі і ўсміхаліся ўслед.

Хутчэй за ўсё такі «гарачы прыём» на дарозе выклікала не аўто, а наш спосаб пазнаёміцца. На бакавое шкло мы прыляпілі таблічку з надпісам «Калі ў цябе дрэнны настрой — скажы іншаму што-небудзь прыемнае» з нумарам майго мабільнага. Дарэчы, тэкст можа быць любым, але галоўнае — не спудзіць патэнцыйнага жаніха чымсьці накшталт «Шукаю мужа! Вяселле аплачу сама». Пазітыўны і падахвочвальны да дыялогу прыём спрацаваў, і праз хвілін пятнаццаць пасля старту мы размаўлялі па тэлефоне з Міхаілам.

— Што робіш сёння ўвечары? — пачаў новы знаёмы. — Я замоўлю нам столік у кафэ?

Пасля Мішы патэлефанавалі яшчэ Стас, Коля, Ваван і... Маша(!)

— Думаеце, самыя разумныя? — спытала дзяўчына. — Вось так проста ўзялі і ўсіх сваім дурным надпісам прыцягнулі? Але калі ў вас што-небудзь атрымаецца — патэлефануйце, мяне Маша завуць.

Знаёміцца з дзяўчатамі ў нашы планы не ўваходзіла, таму далей мы рушылі без плаката.

***

На аўтазапраўцы «ўключаць бландзінак», каб прыцягнуць увагу хлопцаў, нам не прыйшлося: усё выйшла само сабой. Накрыўка паліўнага бака прымерзла, і, каб выратаваць дзвюх небарак, сабраўся цэлы кансіліум. Нарада складалася выключна з мужчын. «Мне падабаецца вунь той, у жоўтай куртцы, — пачала Кацька, — але і гэты, з тэлефонам у руках, нічога».

Пакуль мы разглядалі кандыдатуры, нашу «ластаўку» выратавалі і заправілі, а «патэнцыйны жаніх» Сяргей пачаставаў кавай.

— І часта вы ў такія сітуацыі трапляеце? — пацікавіўся ён. — Не супраць, калі вашу жаночую кампанію разбавяць два сімпатычныя мужчыны? Коля, давай сюды! — паклікаў хлопца ў спартыўным касцюме.

Акрамя гэтых «ратавальнікаў», у наш бок глядзеў яшчэ адзін прэтэндэнт. Але ён, відаць, быў сціплым, бо падысці так і не адважыўся.

***

— Ты лепш закручвай, бо не даляціць, — інструктавала мяне Каця. — І цаляй больш упэўнена.

Запіскі са сваім нумарам тэлефона ў адчыненыя акенцы машын я закідвала нядоўга. Эксперымент скончыўся на другой спробе, бо падаўся мне недастаткова прыстойным для жанчыны. Мужчыны самі любяць праяўляць ініцыятыву, а я ледзь не ў ложак цягну! Да таго ж — раптам на заднім сядзенні не заўважу яго сяброўку або, куды горш, жонку! Будзе потым спатканне ўтраіх...

***

Нядрэннае месца, куды можна з'явіцца на транспарце, — аўтамыйка. Кантынгент нас задаволіў. Мужчын на любы густ! І ўсе адкрытыя, гатовыя да дыялогу. Як вынік — добрая зніжка на мыццё аўто і новы нумар у тэлефоннай кніжцы. Калі шчыра, то кандыдату я наўрад ці патэлефаную, але не скарыстацца сваёй усмешкай і абаяннем, каб выгадна памыць машыну, проста не змагла!

На аўтасэрвіс нам не трэба, але Кацька — чалавек азартны і дзеля чысціні эксперымента мы проста павінны былі сюды заехаць. Гэтым разам выконвалі ролі моцных і незалежных дзяўчат.

— Я заўсёды паветраны фільтр мяняю сама, але сёння проста няма на гэта часу, — пачала Каця.

Мужчына ўзяўся за справу, а «самастойная жанчына» не супакойвалася.

— Гэта, вядома, мяне не датычыцца, але дзе вы гэтаму вучыліся? — працягвала Каця. — Мне падаецца, гэта можна зрабіць крыху хутчэй?!

Было відаць, што майстру такія неабгрунтаваныя заўвагі не спадабаліся, але ён змаўчаў і пасля таго, як скончыў працу, адразу знік. «Перастаралася, — падумала я пра сястру. — Тут галоўнае мяжу не пераходзіць. Істэрычка і самастойная жанчына — рэчы розныя».

— Прабачце, як вас завуць? — звярнуўся да Каці ўладальнік сіняга BMW, — Крута вы яго на месца паставілі.

***

Яшчэ адзін прыём знайшла ў інтэрнэце. Выбрала яго з-за бязмежнай колькасці хвалебных водгукаў. Сутнасць метаду заключаецца ў тым, каб прыцягнуць увагу мужчыны, стоячы ў заторы, уявіўшы сябе... папугайчыкам. Яркія птушкі заўсёды чысцяць пёркі, напяваюць, радуюцца жыццю, таму іх цяжка не заўважыць.

— Уключай нашую любімую песню, — дала каманду Кацька.

Дзесьці хвілін пятнаццаць сястра танцавала за рулём, а я крыўлялася, страляла вачыма, раз-пораз падфарбоўвала вусны, але не заўважыла ніводнага мужчыны, які б любаваўся намі! «Гэта проста мая блізарукасць» — суцяшала сябе я. Каця паддала газу, і мы паехалі далей.

Каля святлафора заўважыла, што кіроўца вялікага чорнага аўтамабіля не спускае з нас вачэй.

— Ты такая смешная, — звярнуўся да мяне кавалер у шэрым паліто, — я за табой даўно назіраў. Мабыць, смелая? Нумар тэлефона падкажаш?

Па дарозе дадому я думала аб тым, што сучасныя жанчыны ўсё больш падобныя да мужчын: носяць штаны, займаюць кіруючыя пасады, дабіваюцца кар'ернага поспеху... Але замуж па-ранейшаму бяруць вытанчаных лэдзі.

***

Пра тое, як нас хацелі, што называецца ў народзе, «развесці на грошы» на аўтарынку, расказваць не буду. Дадам, што не ўсюды метад «папугайчыка» і «бландзінкі» працуе. Дзесьці лепей быць «мужчынам у спадніцы». Бо замест маторнага масла за 70 рублёў атрымаеце масла такой жа якасці за 120.

ВЫВАДЫ

  • 1. Пазнаёміцца за рулём аўто цалкам рэальна. Галоўнае — даць зразумець мужчыну, што вы таксама ў гэтым зацікаўлены.
  • 2. Паказваць, што мужчына вам сімпатычны, трэба далікатна, каб не насцярожыць яго.
  • 3. Зусім не важна, якая ў вас марка машыны. Мае значэнне тое, як вы сябе ў ёй паводзіце. Сёння, каб быць жаноцкай, трэба мець нямала мужнасці. Напрыклад, маўчаць аб тым, што вы ўмееце мяняць свечкі ў аўто, і цярпліва чакаць, пакуль ён сам праявіць ініцыятыву.

Чытайце таксама пра іншыя спосабы журналісткі-авантурысткі знайсці жаніха ў краме, транспарце і там, дзе не трэба :)

Сафія ГРОМАВА

grоmаvа@zvіаzdа.bу

Загаловак у газеце: За рулём аўто

Выбар рэдакцыі

Грамадства

Карэспандэнт «Звязды» высвятляла, чаму так цёмна на асветленых вуліцах Магілёва

Карэспандэнт «Звязды» высвятляла, чаму так цёмна на асветленых вуліцах Магілёва

Вечарам прайсціся ўздоўж цэнтральнай вуліцы Першамайскай у Магілёве адно задавальненне.

Спорт

Баскетбаліст Бенджамін-Павел Дуду: У Гане мяне называлі белым

Баскетбаліст Бенджамін-Павел Дуду: У Гане мяне называлі белым

Мама Бена — беларуска, тата — ураджэнец Ганы.

Эканоміка

Куды звяртацца, калі грамадзяніну затрымліваюць зарплату?

Куды звяртацца, калі грамадзяніну затрымліваюць зарплату?

Адказ на гэта і іншыя пытанні — у гутарцы з Дзмітрыем Шаўчуком.