Вы тут

"Роднай прыродзе" спаўняецца 45 гадоў!


Фота Аляксандра Батуры

Першыя нумары «Роднай прыроды», якія пабачылі свет у 1972 годзе, – гэта інфармацыйна-метадычны бюлетэнь Дзяржкамітэта Савета Міністраў БССР па ахове прыроды, Прэзідыумаў Рэспубліканскіх таварыстваў аховы прыроды, паляўнічых і рыбаловаў, камісіі па ахове прыроды АН БССР. За больш чым чатыры дзесяцігоддзі часопіс трансфармаваўся з метадычнага выдання для спецыялістаў у грамадска-палітычны, навукова-папулярны ілюстраваны экалагічны часопіс для шырокай чытацкай аўдыторыі. На ім выраслі пакаленні экалагічна адукаваных беларусаў.

Зараз часопіс выглядае вельмі прэзентабельна: мелаваная папера, поўнакаляровы друк. І ўсё, ж якім бы прыгожым не было афармленне, галоўнае – змест выдання. Дарэчы, часопіс выдаецца на дзвюх мовах – беларускай і рускай.

“Мы вельмі цэнім усе тыя магчымасці, якія даюць сучасныя тэхналогіі, але ў нашым часопісе вы не знойдзеце публікацыі, падпісанай “па матэрыялах сеткі інтэрнэт”, – кажа галоўны рэдактар часопіса Алена Стэльмах. – Журналісты атрымліваюць інфармацыю толькі з першакрыніц”. Сярод экспертаў часопіса – супрацоўнікі Міністэрства прыродных рэсурсаў і аховы навакольнага асяроддзя Рэспублікі Беларусь, Нацыянальнай акадэміі навук Беларусі, Цэнтральнага Батанічнага саду, іншых профільных арганізацый.

У цэнтры ўвагі часопіса ўсе гэтыя гады: узаемаадносіны чалавека з прыродай, наступствы негатыўнага ўплыву безгаспадарчых адносін да навакольнага асяроддзя, аб'яднанне аднадумцаў – абаронцаў прыроды.

У часопісе можна знайсці самую разнастайную інфармацыю аб флоры і фаўне Беларусі, дзякуючы эксклюзіўным фотарэпартажам адкрыць для сябе непаўторную прыгажосць роднай прыроды, здзейсніць завочнае падарожжа па ўнікальных мясцінах Беларусі.

Вядомыя этнографы знаёмяць чытачоў з народнымі прыметамі, заснаванымі на прыродных з’явах. Новыя рубрыкі пашыраюць геаграфію публікацый пра прыроду іншых краін.

Фота Андрэя Шымчука

Добры часопіс той, які захоўваецца ў падпісчыкаў з пазнакамі пра найбольш цікавыя для іх публікацыі. Мы дакладна ведаем, што рэкамендацыі нашых спецыялістаў папулярныя ў дачнікаў і пчаляроў, рыбакоў і аматараў "ціхага палявання". Шмат карыснага знаходзяць для сябе прыхільнікі лекавых раслін.

Вялікі раздзел часопіса прызначаны для юных чытачоў – тут тэматычныя казкі і загадкі, “Почемучка” для самых маленькіх. І галоўнае – спецвыпуск “Юны натураліст” для школьнікаў. “ЮН” – гэта шмат карыснай інфармацыі, неабходнай пры падрыхтоўцы вучнямі хатніх заданняў па біялогіі, геаграфіі. Прыцягвае ўвагу маляўнічы постэр з фотаздымкамі жывёл, насякомых, раслін з “Чырвонай кнігі Рэспублікі Беларусь”. Па сутнасці, “Юны натураліст” – гэта другі часопіс пад адной вокладкай.

“Для нас вельмі важна зваротная сувязь з чытачамі, таму існуе добрая традыцыя праводзіць творчыя конкурсы, – кажа Алена Стэльмах. – Надта парадавалі ўдзельнікі конкурсу фатаграфій “Краявіды малой Радзімы”. Калекцыя іх здымкаў – зачараванне нашай любімай Беларуссю”.

Сучаснага чытача “Роднай прыроды” ўсё больш цікавіць экалагічная чысціня навакольнага яго свету, і ён сам схільны творча падыходзіць да свайго побыту. У дапамогу нашым чытачам – рубрыка «Экапарады ад Машы Зялёнай».

Выбар хатняга гадаванца, яго выхаванне – няпростая задача, у часопісе нямала падказак, як з гэтым добра справіцца. Ёсць свае прыхільнікі і ў рубрыкі «Акварыумістыка для пачаткоўцаў».

У 2017 годзе чытачоў чакаюць новыя займальныя праекты. “У студзеньскім нумары запрашаем нашых сяброў у “Школу юнага Рабінзона”. Весці ўрокі будзе Аляксандр Піскуноў, – чалавек у лесе бывалы. Акрамя таго, Аляксандр Уладзіміравіч напісаў шмат кніг пра прыроду, беражлівае стаўленне да яе. У нашай школе чытачы даведаюцца, як арыентавацца на мясцовасці, здабываць агонь без запалак, будаваць найпростыя хованкі, – распавядае Алена Стэльмах. – Таксама запрашаем у займальнае падарожжа па музеях прыроды, у тым ліку школьных.

Фота Георгія Гулеўскага

“Мой родны кут, як ты мне мілы ...” – хто не памятае гэты ўзнёслы радок класіка? Колькі пяшчотных фарбаў і замілавання ў ім! У новай рубрыцы часопіса “Паэзія жывых гукаў” беларускія пісьменнікі раскажуць пра прыроду, як найлепшую крыніцу натхнення, прадставяць сваю творчасць”.

Аксана ЯНОЎСКАЯ

Дадаць каментар

Выбар рэдакцыі

Палітыка

Ці можна адрадзіць неперспектыўныя вёскі і ці быць ордэну Сям'і

Ці можна адрадзіць неперспектыўныя вёскі і ці быць ордэну Сям'і

Пра гэта пацікавіліся парламентарыі ў кіраўніка дзяржавы.

Грамадства

Што адчуваюць вадалазы-сапёры, калі спускаюцца пад ваду

Што адчуваюць вадалазы-сапёры, калі спускаюцца пад ваду

У беларускай арміі гэтых спецыялістаў называюць штучнымі кадрамі. 

Культура

Зорка Скарыны: недатыкальна фантастычная ці нерэальна блізкая?

Зорка Скарыны: недатыкальна фантастычная ці нерэальна блізкая?

Каб пераканаць у сваёй задуме, ён мог бы зладзіць прэзентацыю на восем з паловай хвілін з відэапраекцыяй на экран і лазернай указкай.

Эканоміка

Ці такія прывабныя зніжкі, як іх малююць?

Ці такія прывабныя зніжкі, як іх малююць?

Што насамрэч нам прапануюць шматлікія акцыі гандлёвых сетак?