Вы тут

Спасцігнуць мудрасць зімы


У зімы свая мудрасць, і як ні імкнецца распазнаць яе чалавек, а ніяк не адужае. Быццам, змяніўся клімат, таму і халады ўжо не тыя – так тлумачыцца галашчокі новы год, ці вадохрышчанскія маразы, што плачуць капяжом. На ўсё свая ёсць праўда. Толькі шчодрыца-зіма возьме ды сыпане снежнага сейва. Праедзецца ў запрэжцы дужых вятроў па шырокаму ледзяному раздоллю, праскочыць з завываннем па намётах ды гурбах. Рыпяць палазы санак – зіма злуецца, пякучых маразоў наганяе. Такая яна, сёлетняя наравістая гаспадыня самай халоднай пары года. І ў лютым абяцае яшчэ паказаць свой нораў. І ўсё ж студзень – той месяц, калі абуджальныя сілы прыроды пачынаюць браць сваё. Самае галоўнае – даўжэе дзень, а гэта значыць, і ўправіцца са справамі становіцца зручней.

Вось так і часопіс “Родная прырода” падабраўся да свайго 45-гадовага юбілею. Раю абавязкова спыніцца на тых старонках студзеньскага нумара, дзе журналісты расказваюць пра 1972 год, калі з’явіліся першыя нумары выдання, знаёмяць з яго развіццём на працягу чатырох з паловай дзесяцігоддзяў. За гэты час атрымаўся сапраўдны экалагічны летапіс краіны. Прыемна, што да гэтага прыналежны не толькі яго стваральнікі, але і ўсе шматлікія чытачы – а гэта нават цэлыя пакаленні вялікіх аматараў прыроды.

Адна з найбольш сучасных экалагічных тэм, да якіх звяртаецца часопіс, – калі эканоміка стане “зялёнай”. У канцы мінулага года пастановай Савета Міністраў Рэспублікі Беларусь зацверджаны Нацыянальны план дзеянняў па развіццю “зялёнай” эканомікі ў Рэспубліцы Беларусь да 2020 года. Пра змены, якія рэалізацыя гэтага дакумента ўнясе ў жыццё дзяржавы і яе грамадзян, на старонках выдання расказвае першы намеснік міністра прыродных рэсурсаў і аховы навакольнага асяроддзя Рэспублікі Беларусь Ія Малкіна.

Выклікае безумоўную цікавасць і размешчаны ў часопісе матэрыял пра беларускіх спецыялістаў, занятых у галіне геалогіі. Яны працуюць не толькі на радзіме, але накопленыя вопыт і веды актыўна выкарыстоўваюць у геолагаразведцы і здабыванні карысных выкапняў за мяжой. Супрацоўніцтва беларусаў у геалагічнай сферы наладжваецца нават на афрыканскім кантыненце.

Падказка спецыяліста па прыродаахоўных пытаннях грамадскай арганізацыі “Ахова птушак Бацькаўшчыны” Сямёна Левага, як адрозніць варону ад крумкача толькі гэтым не абмяжоўваецца. Воранавыя – вядомае сямейства птушак на тэрыторыі Беларусі. Яны валодаюць высокім інтэлектам. Якія іх віды сустракаюцца, і ці можна гэтых птушак утрымліваць дома – шукайце адказы на старонках свежага нумара “Роднай прыроды”.

А таксама пабывайце ў школьным музеі зёлак; наведайце першы ўрок у Школе юнага Рабінзона; адчуйце асалоду жывых гукаў прыроды ад сустрэчы з паэтам Навумам Гальпяровічам.

Упэўнены, чарговая сустрэча з любімым часопісам прынясе вам радасць!

Дадаць каментар

Выбар рэдакцыі

Культура

Топ беларускіх дыялектызмаў, якія вы маглі не ведаць

Топ беларускіх дыялектызмаў, якія вы маглі не ведаць

Нязвыклая форма — заўсёды штуршок для пошуку.

Культура

Як мог выглядаць Мінск? Ведае беларускі архіў

Як мог выглядаць Мінск? Ведае беларускі архіў

Дзе замежнікі вывучаюць савецкую архітэктуру.

Калейдаскоп

Вясёлыя гісторыі нашых чытачоў

Вясёлыя гісторыі нашых чытачоў

Пра бунт малога, выпадак на ферме і цікавае выступленне на вяселлі.