Расліна загінула ці спіць?

Даглядаючы расліны і не жадаючы ім нашкодзіць, трэба ўлічваць, што ў іх ёсць перыяды актыўнага росту, а таксама перыяды спакою.

Відавочна, што садовыя расліны перажываюць тыя ці іншыя змены ў сувязі з умовамі надвор'я, але і пакаёвыя расліны таксама схільныя да іх. Неспрыяльныя ўмовы надвор'я служаць прычынай спячкі, у якую ўпадаюць расліны. На самай справе, многія расліны нават маюць патрэбу ў такім перыядзе спакою, каб выжыць. Падчас адной такой дрымоты лісце расліны ападае, і можа здацца, што яна загінула. Але, хутчэй за ўсё, гэта не так.

Віды, якім проста неабходны спакой, ніякім чынам нельга пазбаўляць яго. Калі вы ўсё ж паспрабуеце стварыць для сваіх раслін вечнае лета, перанёсшы іх у дом, то яны не пражывуць у такіх умовах больш за два гады. Пасля максімальнага перыяду бесперапыннага росту, расліна, родам з краін з умераным кліматам, міжволі пяройдзе ў стан спакою, незалежна ад пары года або прыродных умоў. Лісцевыя расліны скідаюць лісце, вечназялёныя не даюць новых парасткаў.

Як садовыя, так і пакаёвыя расліны могуць упасці ў спячку таксама і пасля атрыманага стрэсу. Напрыклад, калі расліну зусім не паліваюць, яна можа скінуць усё лісце і заснуць, каб захаваць вільгаць, якая засталася. Часам здаецца, што расліна памірае, але на самай справе такі ахоўны механізм ратуе ёй жыццё.

Зразумець, загінула расліна ці проста знаходзіцца ў стане спакою, дапаможа спецыяльная праверка.

Зрэжце кончык дубчыка памерам з аловак. Вазьміце дубчык і рэзка сагніце яго туды-сюды некалькі разоў. Жывая галінка будзе лёгка згінацца і ў рэшце рэшт расшчэпіцца, агаляючы вільготную драўніну ўнутры. Мёртвы дубчык трэсне, як толькі вы яго злёгку сагняце, і будзе сухі ўнутры. Можна таксама злёгку падрапаць нажом або пазногцем вонкавую частку галінкі. Калі расліна жывая, пад карой яна будзе зялёнага колеру і злёгку вільготнай навобмацак. А мёртвы дубчык будзе карычневага колеру, і вам з цяжкасцю ўдасца яго падрапаць. У такім выпадку трэба далей даследаваць сцябло і паспрабаваць падрапаць ніжнюю галінку, а то і сцябло каля самых каранёў. Расліна можа праявіць прыкметы жыцця ў гэтых месцах. Калі такое адбудзецца, трэба зразаць мёртвыя сцёблы амаль да самага кораня. Нягледзячы на тое, што яна выглядае мёртвай над паверхняй глебы, у спячай расліны будуць жывыя карані.

Калі праверка са згінаннем або драпаннем галінкі падасца непераканаўчай, можна дастаць расліну з вазона і праверыць, ці выглядаюць карані жывымі і здаровымі, ці яны цалкам згнілі або засохлі. Гнілыя карані будуць мець непрыемны пах, і гэта будзе азначаць, што расліна памерла. Калі ж карані выявяцца гнуткімі, то гэта наадварот будзе паказваць на тое, што расліна проста заснула. Бывае, што некаторыя карані могуць аказацца мёртвымі, а іншыя — жывымі, уключаючы і асноўны корань. Такім чынам, каб дапамагчы расліне аптымізаваць свае рэсурсы і ажыць з надыходам цяпла, вы можаце абрэзаць мёртвыя карані. Паспрабуйце пры гэтым не закрануць асноўны корань і іншыя здаровыя карані.

Расліна можа заснуць, але гэта не значыць, што яна зусім не мае патрэбы ў доглядзе. Ёй не патрэбна святло, але расліну ўсё ж трэба час ад часу паліваць: адзін раз у месяц будзе дастаткова. Даволі просты догляд, але ў халодны перыяд многія людзі паліваюць расліны гэтак жа часта, як і летам. Гэта згубна для раслін, бо ад празмернага паліву яны могуць загінуць. У ацепленых памяшканнях зямля ў вазоне хутка сохне, але толькі зверху, глыбей яна можа аказацца вільготнай.

Каб даведацца, ці час паліваць расліну, раскапайце зямлю ў вазоне ўглыб сантыметры на 2—3 і памацайце глебу пальцам. Калі зямля вільготная, расліну не трэба пакуль паліваць.

Стан спакою — неад'емная частка цыкла росту расліны. Нічога з гэтым нельга зрабіць, хіба што чакаць цёплых дзён. Расліны выйдуць з спячкі, як толькі пацяплее, і вы заўважыце новыя прыкметы жыцця. А пакуль можна абрэзаць мёртвыя сцёблы, каб вызваліць месца для новых парасткаў.

Ірына ТАМКОВІЧ