17 Жнівень, чацвер

Вы тут

Беларускія тэнісісткі дэбютуюць у Сусветнай групе Кубка Федэрацыі


Матч самага прэстыжнага каманднага турніру Беларусь — Нідэрланды прымае Мінск. Для гэтага «Чыжоўка-Арэна» ўжо тыдзень як пераўвасобілася з лядовай пляцоўкі ў тэнісны корт. У якасці пакрыцця беларуская каманда выбрала хард, таму матчы чакаюцца хуткімі і, спадзяёмся, стануць пераможнымі для нашай каманды.


Тэнісісткі Беларусі і Галандыі ў рамках Кубка Федэрацыі сустракаліся тройчы, але не ў Сусветнай групе, а рангам ніжэй. Усе гэтыя сустрэчы скончыліся паражэннем нашых дзяўчат. Апошняе рандэву адбылося не так даўно — у 2014 годзе. Пасля гэтага нашы сапернікі пачалі паступальны рух уверх і ўжо ў мінулым сезоне галандкі зрабілі сапраўдны сюрпрыз, абыграўшы зборную Расіі ў першым крузе. У 2016 годзе ў іх наогул атрымалася дабрацца да паўфіналу Сусветнай групы, але там тэнісісткі з Нідэрландаў саступілі францужанкам.

— За час, які прайшоў пасля нашай апошняй сустрэчы, шмат чаго магло змяніцца — можна было ўвайсці ў топ-50 або нават выпасці за межы топ-200. Да кожнага матча трэба падыходзіць асобна. Тут ужо іншая атмасфера, тут мы гуляем за выхад у топ-4. Гэта будзе супрацьстаянне толькі дзвюх камандаў, а тады матч праходзіў у больш нізкай зоне і Галандыя была ўжо чацвёртай зборнай, супраць якой мы гулялі, — расказвае Вольга Гаварцова.

Перад дамашнім матчам зборная Беларусі знаходзіцца на 8-м месцы ў камандным рэйтынгу, Нідэрланды — на 5-й пазіцыі. У складзе гасцей няма зорак, але ўсе тэнісісткі добрага ўзроўню, у Мінск прыехалі — Кікі Бертэнс, Сіндзі Бёрхер, Аранча Рас і Міхаэла Крайчык. Капітан каманды — славуты тэнісіст Паўль Хархёйс (былая першая ракетка свету ў парным разрадзе).

Наш квартэт выглядае так: Аляксандра Сасновіч, Вольга Гаварцова, Арына Сабаленка і Вера Лапко. Не хапае «козыра», які дапамог бы вывесці каманду ў эліту. Маладая мама Вікторыя Азаранка будзе хварэць за беларускіх дзяўчат на адлегласці.

Адзначым, што нашы спартсменкі ўпершыню гуляюць на такім высокім узроўні — у Сусветнай групе Кубка Федэрацыі. Нагадаем, туды яны трапілі, абыграўшы не каго-небудзь, а саміх расіянак. І, вядома, цяпер каманда Эдуарда Дуброва зробіць усё, каб пазмагацца за сваю мару і працягнуць удзел у турніры.

— Падрыхтоўка да гэтай сустрэчы пачалася на наступны ж дзень пасля таго, як мы перамаглі каманду Расіі. Бо тады ўжо ведалі, хто наш будучы сапернік. Гульцы індывідуальна ездзілі на свае турніры, мая ж задача заключалася ў тым, каб адсочваць іх вынікі. І ўсё было паспяхова — у рэйтынгу ўсе паволі падымаліся. Пасля Аustrаlіаn Ореn мы пачалі рыхтавацца ў Мінску. Дзейнічалі па плане, аб'ём работы быў вельмі вялікі. Усе трэніраваліся з поўнай аддачай, але не забывалі і адпачываць. Лічу, што мы можам выступіць вельмі годна на гэтым турніры. Усе гараць жаданнем зрабіць падарунак сабе і ў першую чаргу народу, — адзначыў капітан нашай зборнай Эдуард Дуброў.

Расклад турніру:

11 лютага (субота), 11.40 — цырымонія адкрыцця матча, пасля якой адбудуцца дзве адзіночныя сустрэчы;

12 лютага (нядзеля), 10.45 — дзве адзіночныя сустрэчы і парны матч.

Дар'я ЛАБАЖЭВІЧ

lobazhevich@zviazda.by

Загаловак у газеце: Пазмагацца за мару

Дадаць каментар

Выбар рэдакцыі

Грамадства

Руху WоrldSkіlls Belarus патрабуецца ўласны брэнд

Руху WоrldSkіlls Belarus патрабуецца ўласны брэнд

У кастрычніку ў Абу-Дабі (ААЭ) пройдзе 44-ы чэмпіянат WоrldSkіlls Іntеrnаtіоnаl, у якім возьмуць удзел і беларусы. 

Грамадства

Як байцы з трох краін узводзяць новую спартыўную арэну

Як байцы з трох краін узводзяць новую спартыўную арэну

Сярод усіх маладзёжных будоўляў гэтага лета мінская гарадская — асаблівая. 

Калейдаскоп

Дзмітрый Літвіновіч: СhеrrуVаtа «абнулілася» і пачала новае жыццё

Дзмітрый Літвіновіч: СhеrrуVаtа «абнулілася» і пачала новае жыццё

Наколькі цяжка пачынаць прамаўляць уголас пасля доўгага маўчання, ці змяніліся ўмовы гульні на музычным рынку і ці прынялі хіпстары памкненні эксперыментатараў старога пакалення.

Грамадства

Унікальны заплыў «на чым папала» прайшоў на Аўгустоўскім канале

Унікальны заплыў «на чым папала» прайшоў на Аўгустоўскім канале

Гэта відовішча ўжо трэці год запар здзіўляе сваім нестандартным падыходам.