Вы тут

Беларусам прапануюць купляць назвы нябесных цел


Абяцанне падарыць зорку з неба — класічны прыём з донжуанскага арсенала. І хоць з ажыццяўленнем гэтага на практыцы ёсць некаторыя складанасці, паненкам такая рыторыка даспадобы. Прыемна — ліха яго бяры! — калі дзеля цябе гатовыя на розныя дзівацтвы. Але пры наяўнасці пэўнай сумы грошай нават немагчымае магчыма.


Зоркай, што ззяе за дзясяткі светлавых гадоў, вы не завалодаеце. А вось даць ёй імя на свой густ, аказваецца, не праблема. Заплаціўшы пэўную суму, вы можаце назваць «свабодную» зорку, напрыклад, у гонар каханай дзяўчыны. Такую паслугу прапануе адна са сталічных кампаній. Назва ўносіцца ў «міжнародны зорны каталог», а вы атрымліваеце сертыфікат і карту з указаннем «вашага» нябеснага цела...

Бясконцыя абшары космасу здаўна абуджалі ў чалавецтве не толькі рамантычныя памкненні, але і камерцыйны сверб. Знаходзяцца ўвішныя спадары, што прадаюць дзялянкі зямлі на Месяцы і Марсе. І цікава, што пакупнікі таксама ёсць! Нехта набывае сертыфікаты проста дзеля забаўкі. А іншыя такім чынам робяць «інвестыцыі» на будучыню. Напэўна, у чаканні часу, калі злётаць на Марс будзе, як маршруткай «Мінск—Ждановічы» праехацца. Але ці будзе мець дакумент на марсіянскія ўгоддзі юрыдычную сілу — вялікае пытанне.

Што да куплі зорных назваў, то на сайце кампаніі вас папярэджваюць: права валодання нябесным целам выданы дакумент не дае. А грошы бяруць за ўнясенне абранага вамі «імені» ў каталог. Цана на гэтыя паслугі, трэба сказаць, кусаецца. Назва для самай цьмянай зоркі каштуе 52,5 рубля. З іх 21 рубель — гэта надрукаванне «дакументаў». А самы «пафасны» варыянт палегчыць вашу кішэню ажно на 1365 рублёў! Затое зорку можна будзе пабачыць простым вокам, без тэлескопа. Уражвае і спіс дадатковых паслуг: ад простага ламінавання (6,3 рубля) да стварэння «пашпарта» зоркі з яе гістарычнымі і фізічнымі характарыстыкамі (2100 рублёў). Зрэшты, такія расцэнкі не павінныя пужаць кліента. Бо зорка — гэта вам не цюльпаны ў пераходзе купіць. Гэта сур'ёзная заяўка аб сваіх пачуццях. Мінуць гады і стагоддзі, а імя вашай каханай назаўсёды застанецца ў астранамічным каталозе. Так бы мовіць, у Вечнасці...

Але не спяшайцеся радавацца, атрымаўшы на рукі запаветны сертыфікат. Сваёй вартасцю ён мала чым адрозніваецца ад «дакументаў» на марсіянскія шэсць сотак. Бо абранае вамі імя для зоркі не стане агульнаўжывальным.

— Адзіная арганізацыя, якая мае права даваць назвы нябесным целам, — гэта Міжнародны астранамічны саюз (МАС), — сцвярджае кандыдат фізіка-матэматычных навук, дацэнт Альгерд Кузнечык, дырэктар абсерваторыі Белдзяржуніверсітэта. — Прычым толькі малая частка зорак мае ўласныя «імёны», якімі мы карыстаемся ў сілу традыцыі. А ўсе астатнія назвы складаюцца з камбінацый лацінскіх літар і лічбаў, што прысвойваюцца паводле пэўнага алгарытму. І толькі гэтыя найменні, зацверджаныя МАС, ужываюцца астраномамі ва ўсім свеце. Можна весці якія заўгодна «альтэрнатыўныя» каталогі, але навуковай супольнасцю яны нават не разглядаюцца.

Словы беларускага навукоўца пацвярджае і афіцыйны сайт МАС. Цэлы раздзел яго прысвечаны праблеме гандлю зорнымі імёнамі. Зрэшты, для самой арганізацыі праблем ніякіх няма: яна не займаецца камерцыяй. І да «касмічных» дзялкоў не мае ніякага дачынення. Аб чым і папярэджвае далёкіх ад навукі людзей.

За што ў такім разе кліент плаціць грошы? За тое, каб абраную ім назву ўнеслі ў нейкі зорны рэестр, які не прызнаецца навукоўцамі, і выдалі прыгожую паперку. Прычым у махлярстве арганізатараў гэтай бізнес-схемы абвінаваціць цяжка. Каталог ёсць? Ёсць. Якія прэтэнзіі? Дый на сайце кампаніі ёсць пазнака, што да МАС гэты каталог дачынення не мае. Але ж далёка не кожны абывацель разбіраецца ў падобных тонкасцях. А назваць зорку ў гонар блізкага чалавека — прапанова спакуслівая...

Зрэшты, можна абысціся і меншымі выдаткамі. Выбіраеце любую з 30 мільярдаў трыльёнаў зорак, што ёсць у аглядным Сусвеце, заказваеце ў любой паліграфічнай канторы «сертыфікат» — і вуаля! Маеце, па сутнасці, тое ж самае, але без пераплаты. І можаце смела прэзентаваць дарагому вам чалавеку. А калі хто прычэпіцца з пытаннямі, адказвайце, што зорка зарэгістравана ў вашым асабістым каталозе.

Хоць шанц даць зорцы імя, што будзе прызнана ва ўсім свеце, вы маеце. Для гэтага досыць усяго толькі... самастойна адкрыць гэтую зорку! І колькі б ні было нулёў на вашым банкаўскім рахунку, іншых магчымасцяў міжнародная навуковая супольнасць не прадугледжвае.

Валянцін БОЙКА

boіka@zvіazda.by

Загаловак у газеце: Гандляры зоркамі

Выбар рэдакцыі

Грамадства

Беларусь і Расія зблізілі пазіцыі па праграме рэалізацыі дагавора аб Саюзнай дзяржаве

Беларусь і Расія зблізілі пазіцыі па праграме рэалізацыі дагавора аб Саюзнай дзяржаве

Аб гэтым заявіў старшыня Савета Рэспублікі Міхаіл Мясніковіч на сустрэчы са старшынёй Савета Федэрацыі Валянцінай Мацвіенка.

Грамадства

Як Брэст рыхтуецца да святкавання свайго 1000-годдзя

Як Брэст рыхтуецца да святкавання свайго 1000-годдзя

Афіцыйныя святкаванні і асноўныя мерапрыемствы гарадскога Міленіума пройдуць 6—8 верасня.

Калейдаскоп

Вясёлыя гісторыі нашых чытачоў

Вясёлыя гісторыі нашых чытачоў

Пра ляльку з секс-шопа, галубоў на ігрушы і дзяўчынку, якая схавала пашпарты.