25 Люты, субота

Вы тут

Міжнароднае радыё "Беларусь" абвясціла конкурс “Мая кніга для свету”


Нагода — вялікі юбілей беларускага і ўсходнеславянскага кнігадрукавання. Форма ўдзелу — сэлфі з любімай кнігай. Людзі з розных краін, маладыя і сталыя, маленькія і старэнькія дасылаюць свае здымкі на адрас радыё. Умовы ўдзелу ў конкурсе можна прачытаць тут.


Пра названы конкурс і іншыя праекты міжнароднага радыё “Беларусь” гутарым з дырэктарам дырэкцыі падрыхтоўкі праграм на замежных мовах Дзмітрыем Занеўскім.

Пра конкурс

— У 2017-м адзначаецца 500-годдзе першай кнігі, надрукаванай Скарынай на беларускай мове, і мы вырашылі адзначыць гэты факт не толькі ў нашых перадачах, праектах культурнага цыклу або навінах, але і праз інтэрактыўны конкурс для слухачоў. На сайце радыё створаны спецыяльны аддзел, пазначаны банерам конкурса. Мы выкладваем фотаздымкі ўдзельнікаў, наведвальнікі сайта за іх галасуюць, і тыя, хто на пэўных этапах атрымаюць найбольшую колькасць галасоў, атрымаюць і наш прыз. Акрамя таго, прадугледжаны і спецыяльныя прызы журы конкурса. Такім чынам, маем два віды судзейства і два наборы пераможцаў, хоць мо яны недзе і супадуць. Гэта не першая спроба інтэрактыву, мы маем пэўны вопыт конкурсаў такога кшталту.

Трэба сказаць, што конкурс далёка не заўсёды з’яўляецца проста конкурсам, рэччу ў сабе. Вяшчаючы на васьмі мовах, радыё “Беларусь” мае магчымасць паглядзець, якія кнігі цікавяць людзей у розных краінах свету і ці чытаюцца наогул папяровыя кнігі. Варта таксама паназіраць, на якіх мовах “конкурсных” кніжак атрымаецца больш і ў якой краіне апынецца больш “конкурсных” чытачоў. Такая вось цікавая ідэя.

— Конкурс запушчаны нядаўна, але мы ўжо маем першыя фотаздымкі, дасланыя з розных краін, у тым ліку з Беларусі, Індыі, Польшчы, Егіпта. Пакуль усе фотаздымкі адлюстроўваюць папяровыя кнігі. Але самыя розныя — і дзіцячыя, і дарослыя, і не толькі мастацкія. Слухач з В’етнама прыслаў здымак з кнігай “Як гартавалася сталь” у перакладзе на в’етнамскую мову. Слухач з Індыі прыслаў сваё фота і напісаў, што яго любімая кніжка належыць “пяру” Сі Дзіньпіна, назва яе перакладаецца прыкладна як “Практыка дзяржаўнага кіравання ў Кітаі. Вельмі цікавы ліст прыслаў і слухач з Польшчы Ярослаў Янджэйчак. Напісаў, што як паляк, славянін ён з нагоды 500-гадовага юбілею выдання Скарынай “Псалтыра” абраў для ўдзелу ў конкурсе шэдэўр Якуба Коласа “Новая зямля”.

Пачалося гэта літаральна толькі што, а працягнецца да канца вясны. У маі або напачатку лета плануецца абвясціць пераможцаў фінала, але будуць абвяшчацца пераможцы на кожным этапе. То бок, цікавасць падаграваецца і тым, што прадугледжваецца шмат пераможцаў. А ў якасці прызоў, як мяркуецца, будуць рассылацца па свеце беларускія кнігі з перакладамі або выданні пра Беларусь, выпушчаныя на розных мовах.

Пра іншыя інтэрактывы

— Паралельна з названым конкурсам на нашым сайце праводзіцца своеасаблівае тэсціраванне на веданне Беларусі. Выкладзеныя пытанні тэстаў маюць варыянты адказаў. Сферы, закранутыя ў пытаннях, — самыя розныя – ад эканомікі да геаграфіі, пра людзей і традыцыі, звычаі і славутасцяў. Прайшоўшы тэст да канца, можна адразу даведацца, што было названа правільна, а што не. Прычым, пытанні рэгулярна аднаўляюцца, таму і цікавасць да тэстаў ніяк не знікае.

Цікава, што супрацоўнікі радыё прапануюць і слухачам прымаць удзел у аднаўленні пытанняў. І слухачы дасылаюць свае пытанні! Тысячы людзей з розных краін прынялі ўжо ўдзел у такім тэсціраванні. Радыё мае водгукі, прынамсі, з Польшчы — тамтэйшы слухач рэгулярна дзеліцца сваімі поспехамі і “праваламі”, і з Індыі, дзе існуе цэлы клуб слухачоў “Беларусі”. Англамоўная патэнцыйная аўдыторыя радыё “Беларусь”, зразумела, большая, чым беларускамоўная. Хаця за мяжой жыве некалькі мільёнаў беларусаў.

Пра новыя праекты

Да 500-годдзя скарынаўскіх кніг у сакавіку запускаецца яшчэ адзін праект — віктарына пра Скарыну, кнігу і бібліятэчную справу. Пытанні будуць абвяшчацца ў эфіры. А ўвогуле, у кожным сезоне адбываецца па некалькі інтэрактыўных праектаў. Таму што…

— Цяпер няма радыё, якое займаецца толькі радыё. Цяпер радыё — гэта і відэа, і аудыа, і фота, і інтэрактыў. Адбываецца гэткае зліццё розных форм медыя, і я думаю, што у рэшце рэшт не стане ніякага дзялення, прынамсі, на радыё і тэлебачанне, а ўтворыцца агульная медыя-прастора, якая працягне існаваць у такіх вось няпэўных, няжорстка рэгламентаваных формах.

У бліжэйшых планах — пашырэнне вяшчання на тых мовах, якія ў радыё “Беларусь” ужо ёсць. Восем моў – гэта нямала. І гэта патрабуе вялікай каардынацыі дзеянняў, а таксама супрацоўнікаў з высокім узроўнем ведання мовы, якім да таго ж падабаюцца і радыйная праца, і журналістыка ўвогуле. Такія людзі — не з адным талентам — сустракаюцца, як ведаем, нячаста. А слухачы, тым часам, просяць “адкрыць” новыя мовы. У прыватнасці, партугальскую і іўрыт. Калі радыйшчыкі, пралічыўшы ўсе свае магчымасці, убачаць перспектыўныя эфекты, то гэта абавязкова адбудзецца.

Сам Дзмітрый Занеўскі ведае некалькі моў — англійскую, шведскую, польскую, скончыў Мінскі дзяржаўны лінгвістычны ўніверсітэт. Трапіў на радыё выпадкова, але затрымаўся тут, бо…

— Кожны дзень можна займацца толькі тым, што падабаецца, у чым знаходзіш шмат для сябе цікавага, што дапамагае самаразвіццю. Тое, што мы расказваем пра Беларусь, мне здаецца вельмі важным. Таму я тут і працую.

Святлана Воцінава

Дадаць каментар

Выбар рэдакцыі

Грамадства

Уступныя іспыты рэфармуюць?

Уступныя іспыты рэфармуюць?

А ў школах могуць увесці так званыя міністэрскія кантрольныя работы.

Грамадства

Як працуе жодзінскі Цэнтр патрыятычнага выхавання моладзі «Вектар»

Як працуе жодзінскі Цэнтр патрыятычнага выхавання моладзі «Вектар»

За 18 гадоў існавання праз Цэнтр патрыятычнага выхавання моладзі «Вектар», што ў Жодзіне, прайшло больш як тры тысячы падлеткаў.

Спорт

Вячаслаў Талкачоў: Калі б не аварыя — да 40 бегаў бы

Вячаслаў Талкачоў: Калі б не аварыя — да 40 бегаў бы

З яго пачыналася наша гісторыя ў біятлоне.

Грамадства

У чым маюць патрэбу людзі з інваліднасцю?

У чым маюць патрэбу людзі з інваліднасцю?

У студзені гэтага года праходзіла грамадскае абмеркаванне праекта Нацыянальнага плана дзеянняў па рэалізацыі Канвенцыі ААН аб правах інвалідаў.