19 Верасень, серада

Вы тут

Спакой у пакой


Знешнія фактары аказваюць прамое ўздзеянне на наш ўнутраны стан. Трапіў у няўтульны шэры калідор паліклінікі — дрэнна, сядзіш у любімым доме пад пледам — лепш.

У кіно, як і ў жыцці: рэжысёры часта выбіраюць канкрэтнае месца, каб падкрэсліць неабходныя эмоцыі. Прапанаваны спіс прысвечаны фільмам, у якіх «прастора» выконвае адну з асноўных роляў.


1. «Ноч у музеі», ЗША-Вялікабрытанія, 2006

Стаміўшыся ад пастаянных пошукаў працы, Лары ўладкоўваецца ахоўнікам у адзін з музеяў Нью-Ёрка. Тут і разгортваецца дзеянні фільма. Будынак — нібы маленькая краіна, са сваімі асаблівасцямі і мясцовымі жыхарамі. Пагружаемся разам з героем у атмасферу Музея прыродазнаўства, а таксама трапляем у захапляльную вандроўку.


2. «Ззянне», ЗША-Вялікабрытанія, 1980

«Ззянне» прынята лічыць адным з лепшых фільмаў жаху ў гісторыі кіно. Велізарную ролю ў нагнятанні страху грае бязлюдная гасцініца. Джэк разам з жонкай і сынам засяляецца ў гатэль, аддзелены ад свету снежнымі заваламі, каб у спакойнай абстаноўцы працаваць над кнігай. Паводле сюжэта гэта месца ўжо дапамагло скаціцца з катушак папярэднім жыхарам. Джэку знаходжанне ў гэтай халоднай прасторы таксама не пайшло на карысць.


3. «Сямейка Адамс», ЗША, 1991

Фільм майго дзяцінства. Сярод знаёмых, бадай, не знойдзеш таго, хто не бачыў гэтую карціну. Незвычайная сямейка і іх не менш незвычайны дом сталі легендай. Але акрамя крэатыўнага будынка і характэрных змрочных персанажаў, у гэтай стужцы ёсць і цікавы сюжэт. Спакой Адамсаў парушае раптоўнае з’яўленне даўно зніклага брата главы сямейства. Але дзеці хутка выкрываюць хіжыя матывы дзяцькі і пачынаюсь супраць яго барацьбу.


4. «Бункер», Калумбія-Іспанія, 2011

Калі хварэеце на клаўстрафобію, то я вам не рэкамендую глядзець гэты фільм. Галоўная гераіня, жадаючы правучыць каханага, выпадкова зачыняе сябе ў таемным бункеры і губляе сувязь са знешнім светам. Калі бачыш, як адчай ахоплівае дзяўчыну, міжволі пачынаеш адчуваць безвыходнасць і паніку. А магчымасць з бункера назіраць за жыццём дома, якое пасля знікнення гаспадыні ідзе далей, падвойвае суперажыванне.


5. «Чарлі і шакаладная фабрыка», ЗША, 2005

Юны Чарлі выйграе адзін з пяці білетаў на сакрэтную шакаладную фабрыку Вілі Вонкі. Аб гэтай экскурсіі мараць усе дзеці, бо завод Вонкі — сапраўдны салодкі рай. Тут чароўныя мятныя лугі, арэхавыя пакоі з дрэсіраванымі вавёркамі, а галоўнае — шакалад льецца ракой. Гэтая стужка — не проста салодкая гісторыя, у ёй аўтар выкрывае чалавечыя заганы: абжорства, ганарлівасць, сквапнасць. А справядлівасць, вядома ж, перамагае.


6. «Пакой», Ірландыя-Вялікабрытанія-Канада-ЗША, 2015

Джой выкралі, калі яна была яшчэ падлеткам. У зняволенні дзяўчына правяла шмат гадоў, і не бачыла нічога, акрамя свайго пакоя. Тут жа нарадзіўся і яе сын. Да пяці гадоў пакой быў светам хлопчыка, і жылі там толькі ён і яго маці. Трапіўшы ў рэальныя ўмовы, герой адносна хутка асвоіўся, але ніколі не забываў свой пакой, да якога ставіўся, як да жывога. «Пакой» — фільм, які заваяваў сэрцы крытыкаў свету і ўзяў запаветную прэмію «Оскар».

Каментарый рэдакцыі. Урывак з твора Эмы Донах’ю «Пакой», паводле якога зняты фільм, друкаваўся ў мінулагодным № 4 часопіса «Маладосць». Пераклад з англійскай зроблены студэнткай Мінскага дзяржаўнага лінгвістычнага ўніверсітэта Таццянай Ігнацьевай, практыканткай «Маладосці». Калі ты вывучаеш мовы, то таксама можаш перакладаць сучасных топавых замежных пісьменнікаў і друкавацца як перакладчык.


7. «Дом дзіўных дзяцей міс Перэгрын», ЗША-Вялікабрытанія-Бельгія, 2016

Міс Перэгрын і яе выхаванцы ніколі не пакідаюць не толькі свой дом, але і свой дзень — яны жывуць у часовым коле. У кастрычніку 1943 года ў іх прытулак трапіла бомба, але тайны дар выхавальніцы дапамог ўсім выжыць і назаўжды застацца ў адным дні. Здавалася, нішто не можа перашкодзіць спакою, але аднойчы іх знаходзіць унук былога выхаванца дома і паведамляе, што яго дзядуля загінуў пры дзіўных абставінах. І гэтая навіна не абяцае нічога добрага...

Яна МУСВІДАС

Друкуецца ў “Бярозцы”

Дадаць каментар

Выбар рэдакцыі

Грамадства

Якім чынам можа праяўляцца адзінота?

Якім чынам можа праяўляцца адзінота?

Адзінота і асабліва адзінота ў сям'і — рэальная прыкмета нашага часу.

Грамадства

Усё, што трэба ведаць пра замяшчальную гарманальную тэрапію

Усё, што трэба ведаць пра замяшчальную гарманальную тэрапію

Лішняя вага, бяссонніца, прылівы, парушэнні ціску і астэапароз — далёка не ўсе праявы, якія падпільноўваюць жанчыну ў пэўным узросце. 

Спорт

Вячаслаў Грэцкі: Часам называюць мяне Уэйнам

Вячаслаў Грэцкі: Часам называюць мяне Уэйнам

Пра знакамітае прозвішча і сучаснасць беларускага хакея.