Вы тут

Самыя папулярныя маркі ў калекцыянераў — з выявамі жывёл і раслін


Беларускія маркі зноў прызналі аднымі з найлепшых у свеце. На Азіяцкай міжнароднай філатэлістычнай выставе «CHІNA 2016» наша экспазіцыя ўдзельнічала ў 14-м міжнародным конкурсным класе і была ўзнагароджана сярэбраным медалём. Прыз прысудзілі паштовай прадукцыі, выпушчанай з 2013 па 2015 год. Чым адметная беларуская філатэлія? Пра гэта мы даведаліся ў начальніка выдавецкага цэнтра «Марка» прадпрыемства «Белпошта» Ірыны ШЫПІЛАВАЙ.


Паш­то­вы блок з Да­р'яй До­мра­ча­вай быў пры­зна­ны най­леп­шай мар­кай 2014 го­да.

У форме трохвугольніка

Крыху гісторыі. Першая ў свеце дзяржаўная марка была выпушчана ў Вялікабрытаніі 6 мая 1840 года. Яе назвалі «Чорны пені» праз колер друку і кошт у адзін пені. Роданачальнікам маркі лічаць сельскага настаўніка Роўленда Хіла, які пазней стаў каралеўскім генеральным паштмайстрам.

Гісторыя беларускай філатэліі пачынаецца з 20 сакавіка 1992 года. У той дзень была выпушчана ў абарачэнне першая айчынная паштовая мініяцюра «Крыж Еўфрасінні Полацкай». Спачатку маркі тыражаваліся ў Расіі, а з 1995 года вытворчасць дзяржаўных знакаў паштовай аплаты наладжана ў Беларусі. Маркі надрукавалі ў выдавецтве «Беларускі Дом друку»: яны выйшлі ў абарачэнне 4 мая 1995 года і былі прысвечаны 50-годдзю Перамогі ў Вялікай Айчыннай вайне.

На сёння ўведзена амаль 1200 беларускіх марак. Штогод выпускаецца каля 50 сюжэтаў мастацкіх паштовых мініяцюр. На іх адлюстраваны сучасныя рэаліі дзяржавы, гістарычная і культурная спадчына, багатыя флора
і фаўна.

— Апошнія гады выдавецкі цэнтр «Марка» працуе па некалькіх кірунках, — расказвае Ірына Шыпілава. — З аднаго боку, павышаюцца патрабаванні да распрацоўкі арыгінал-макетаў марак і іх вырабу. З другога — аптымізаваны формы выпуску: зроблены ўхіл на «зручныя» памеры марачных лістоў, прадугледжана наяўнасць купонаў і па-мастацку аформленых палёў. Беларускія маркі сталі «больш прыбранымі». Пры іх вырабе прымяняюцца паслядрукарскія паліграфічныя тэхналогіі: выбарачная лакіроўка, тэрмічнае цісненне металізаванай фольгай і іншыя. З'явіліся незвычайныя паштовыя маркі — у выглядзе трохвугольніка, круга, авала. Безумоўна, гэта вялікі крок наперад.

Экспарт у 60 краін

— Улічваючы багатую тэматыку выпускаў і высокае паліграфічнае выкананне, можна з упэўненасцю сказаць, што беларускія маркі цікавыя айчынным і замежным калекцыянерам. Адгрузка нашага філатэлістычнага матэрыялу на экспарт ажыццяўляецца ў 60 краін, — адзначае Ірына Шыпілава.

Найбольш папулярная і запатрабаваная тэма ў сусветнай філатэліі — флора і фаўна. Прыкладна траціна беларускіх марак прысвечана гэтай тэме. На паштовых мініяцюрах шырока прадстаўлена тэма запаведных тэрыторый. На марках розных гадоў паказаны Бярэзінскі біясферны запаведнік, Белавежская і Налібоцкая пушчы, Нацыянальныя паркі «Прыпяцкі», «Нарачанскі», «Браслаўскія азёры».

Раз на пяць гадоў беларуская пошта атрымлівае дазвол на выкарыстанне лагатыпа Сусветнага фонду прыроды (WWF) на марках з адным з рэдкіх відаў фаўны краіны. У супрацоўніцтве з гэтым фондам былі выдадзены серыі, прысвечаныя еўрапейскаму бабру, еўрапейскай рысі, чорнаму буслу і рагатаму дзедку (від стракоз). У 2015-м пад эгідай WWF выпусцілі маркі серыі «Рабы суслік».

Штогод выходзіць мастацкая паштовая мініяцюра «Птушка года Беларусі». Маркі гэтай серыі маюць свой стыль: яны выдаюцца невялікімі марачнымі лістамі з купонамі і мастацкім афармленнем палёў у дадатак. Традыцыйна да кожнага выпуску вырабляецца паштовая картка для картмаксімуму (на пярэднім баку такой карткі наклеена марка таго ж малюнка і стаіць штэмпель). Летась на мініяцюры быў намаляваны гогаль звычайны.

— Беларуская пошта ўлічвае інтарэсы калекцыянераў і выпускае шырокі спектр філатэлістычнай прадукцыі. Гэта канверты Першага дня, спецыяльныя памятныя гашэнні, картмаксімумы рознай тэматыкі. Арганізаваны выраб тэматычных і гадавых набораў, буклетаў і іншых паштовых сувеніраў, — расказвае Ірына Шыпілава. — Трэба адзначыць, што маркі, будучы калекцыйным матэрыялам, не толькі не губляюць з гадамі сваёй матэрыяльнай каштоўнасці, а наадварот, набываюць яе. Выпушчаныя пэўным тыражом, яны раскупляюцца, колькасць іх у продажы пастаянна змяншаецца, а попыт павялічваецца.

Водгук і ідэі кліентаў

Вызначыць найлепшую сярод беларускіх марак, выпушчаных летась, можа любы ахвотны. Конкурс-апытанне праходзіць з 20 лютага па 20 сакавіка. Анкету можна запоўніць на сайце Белпошты або ў любым аддзяленні сувязі краіны.

Сярод пераможцаў мінулых гадоў — паштовыя блокі «1025-годдзе Хрышчэння Русі», «Дар'я Домрачава — трохразовая алімпійская чэмпіёнка ХХІІ зімовых Гульняў у Сочы (біятлон). Герой Беларусі», «70 гадоў Перамогі ў Вялікай Айчыннай вайне».

— Мы заўважылі наступную тэндэнцыю: найлепшымі выпускамі становяцца паштовыя блокі. Але гэта хутчэй тэхнічная асаблівасць, бо блок складаецца з маркі і мастацкага поля, а таму змяшчае больш ілюстраванага матэрыялу, — кажа Ірына Шыпілава. — Штогадовы конкурс — гэта ўнікальная магчымасць атрымаць зваротную сувязь ад пакупнікоў. Кожнае пажаданне ці заўвага не застаецца без увагі. У выніку посткросеры падказалі шмат ідэй для мастацкіх картак і паштовых марак.

Служым закону, народу, айчыне

Міністэрства сувязі і інфарматызацыі Рэспублікі Беларусь 24 лютага выпускае ў абарачэнне паштовы блок, прысвечаны 100-годдзю беларускай міліцыі, бо менавіта ў далёкім 1917-м, 4 сакавіка, грамадзянскі камендант Мінска падпісаў загад, згодна з якім М.В. Фрунзэ прызначаўся часовым начальнікам міліцыі Усерасійскага земскага саюза па ахове парадку ў горадзе... Праект падрыхтаваны ў супрацоўніцтве з Міністэрствам унутраных спраў. Дызайн Таццяны Кузняцовай. У дзень выпуску паштовага блока ў аддзяленні сувязі №1 Мінска (крама «Філатэлія»), вул. Маскоўская, 16) будзе праводзіцца спецыяльнае гашэнне на канверце.

Кніга «Паштовыя маркі Рэспублікі Беларусь. 2015» стала дыпламантам нацыянальнага конкурсу «Мастацтва кнігі», які праводзіўся ў рамках XXІV Мінскай міжнароднай кніжнай выставы-кірмашу.

Наталля ЛУБНЕЎСКАЯ

lubneuskaya@zvіazda.by

Загаловак у газеце: Мініяцюры з суслікам і буслом

Выбар рэдакцыі

Спорт

Аляксандра Герасіменя: У кожнага свой рэцэпт поспеху

Аляксандра Герасіменя: У кожнага свой рэцэпт поспеху

Аляксандра Герасіменя — сапраўдны баец, а яшчэ — клапатлівая маці і жонка. І проста працавіты чалавек, які не ведае перашкод.

Грамадства

Якія сацыяльныя ініцыятывы беларусаў атрымалі прызнанне на Sосіаl Wееkеnd

Якія сацыяльныя ініцыятывы беларусаў атрымалі прызнанне на Sосіаl Wееkеnd

Прыз сімпатый гледачоў заваявала ініцыятыва «Школа бацькоўства».

Грамадства

Гісторыя дзяўчыны, якая перамагла анарэксію

Гісторыя дзяўчыны, якая перамагла анарэксію

Здараецца, што ў пагоні за прыгожай фігурай некаторыя дзяўчаты зусім перастаюць есці.

Грамадства

Успаміны былой вязніцы пра Саласпілскі лагер смерці

Успаміны былой вязніцы пра Саласпілскі лагер смерці

Яна добра памятае той летні дзень. За акном сталі чутныя роў матацыклаў і нямецкая гаворка.