16 млн зваротаў да стаматолага зафіксавана летась. Едуць да нас і з-за мяжы, фактычна з любога канца свету, аднак такую лічбу забяспечылі, галоўным чынам, мы самі. Больш за палову выпадкаў звязаны з тэрапеўтычнай дапамогай, частка прыпадае на артапедычнае і хірургічнае лячэнне, асобным радком — дзіцячыя паслугі.
Эпідэміялагічныя абследаванні папярэдніх гадоў паказваюць, што 30 працэнтаў 3-гадовых дзяцей ужо маюць карыес (і толькі ў 2 працэнтаў пашкоджаныя зубы вылечаныя), сярод 6-гадовых размова ідзе адпаведна пра 80 і 50 працэнтаў. Карыёзныя пашкоджанні і розныя праявы перыядантыту маюць фактычна усе дарослыя.
Зараз адбываецца закупка за бюджэтныя грошы фторлаку, сілантаў і індыкатараў зубнога налёту для ацэнкі стаматалагічнага здароўя дзіцячага насельніцтва і правядзення прафілактыкі карыесу. Паводле слоў галоўнага ўрача Рэспубліканскай клінічнай стаматалагічнай паліклінікі, галоўнага пазаштатнага стаматолага Міністэрства аховы здароўя Рэспублікі Беларусь Андрэя МАЦВЕЕВА, калі дзецям да 1 года пакрываць зубы, якія толькі прарэзваюцца, лакам з фторам, то інтэнсіўнасць развіцця карыесу можа знізіцца да 3 гадоў дзесьці на 60 працэнтаў. Той жа эфект забяспечвае і запячатванне фісур. Калі з самага ранняга ўзросту выкарыстоўваць пасту з фторам, можна знізіць выпадкі карыесу ў 4 разы.
Ва ўсіх рэгіёнах праводзяцца зараз пілотныя праграмы кантралюемай чысткі. У дашкольных і школьных установах прадугледжаны куткі гігіены для штодзённай чысткі зубоў пад кантролем выхавацеля. Праводзяцца супрацоўнікамі паліклінік са згоды бацькоў і прафагляды. У сталіцы такой работай ахоплена ўжо значная колькасць садкоў.
Непасрэдна ў лячэбных установах прафілактычнымі мерапрыемствамі займаюцца ўрачы гігіеністы-стаматолагі. Яны праводзяць размовы з пацыентамі, выконваюць некаторыя маніпуляцыі — знімаюць зубныя адкладанні, паліруюць, герметызуюць фісуры. У нас ужо з наступнага года плануецца пачаць падрыхтоўку памочнікаў урача-стаматолага і перападрыхтаваць зубных фельчараў, у якіх і будуць менавіта такія абавязкі.
Што да інавацый кшталту вырошчвання зубоў, то пакуль гэта толькі на стадыі даследаванняў, а таму можна меркаваць, што ў бліжэйшыя гады такая тэхналогія прымяняцца не будзе. Тым часам усё больш актыўна выкарыстоўваюцца лазерныя тэхналогіі пры лячэнні слізістай ротавай поласці, фотасенсібілізатары — для барацьбы са шкоднай мікрафлорай. Распрацоўваюцца і ўкараняюцца новыя тэхналогіі дыягностыкі карыесу.
Спецыялісты нагадваюць, што разлічваць ў першую чаргу трэба не на супертэхналогіі, якія вырашаць усе праблемы, а на саміх сябе.
Колькасць урачоў-стаматолагаў адпавядае ў нас сярэдняй, рэкамендаванай Сусветнай арганізацыяй аховы здароўя. У стаматалагічнай службе працуе каля 12 тысяч чалавек, з якіх 5 тысяч — урачы. 3,5 тысячы з іх занятыя ў дзяржаўнай сістэме аховы здароўя, амаль усе маюць кваліфікацыйную катэгорыю. Што да спецыялістаў, якія працуюць у прыватных установах, то ўжо ў сярэдзіне мінулага года практычна ўсе ўрачы таксама мелі кваліфікацыйную катэгорыю не ніжэй за першую.
Для дзяржаўных устаноў аховы здароўя актыўна набываецца стаматалагічнае абсталяванне айчыннай вытворчасці "Белдэнт". У апошнія гады актыўна выкарыстоўваюцца і беларускія стаматалагічныя матэрыялы для пламбіравання.
Ці трэба лячыць малочныя зубы?
Абавязкова! Адна з прычын карыесу — мікраарганізмы зубнога налёту. Чым больш дзірак у роце, тым больш мікраарганізмаў, і лёс зубоў, якія яшчэ толькі прарэзваюцца, прадвызначаны. Часовыя зубы маюць такую ж пабудову, як і пастаянныя, толькі меншыя па памеры, але там ёсць і карані, і нервы. Таму дзіця можа даведацца пра зубны боль, а з такім горкім вопытам яго пасля вельмі цяжка будзе адаптаваць да лячэння зубоў пастаянных. Нялечаныя зубы — гэта яшчэ і крыніца абвастрэння хранічных захворванняў, развіццё ўскладненняў. А калі працэс дойдзе да неабходнасці выдалення зуба, гэта парушыць жавальную функцыю, прыкус, бо іншыя зубы пачнуць змяшчацца.
Святлана БАРЫСЕНКА
У парадку дня — зацвярджэнне Канцэпцыі нацбяспекі і Ваеннай дактрыны.
Фіналістка праекта «Акадэмія талентаў» на АНТ — пра творчасць і жыццё.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
