Сесія Парламенцкай асамблеі АБСЕ ў Мінску — важнае мерапрыемства

26-я штогадовая сесія Парламенцкай асамблеі АБСЕ ў Мінску — выключна важнае палітычнае мерапрыемства. Пакуль што за ўвесь перыяд нашай незалежнасці ў Беларусі такіх падзей не было. Але прыйшоў час — і гэтым летам да нас завітаюць прадстаўнікі амаль 60 краін — членаў асамблеі. А гэта, па папярэдніх разліках, — амаль 600 чалавек.

Падчас зімовага пасяджэння ПА АБСЕ, што адбылося на мінулым тыдні, наша дэлегацыя сустрэлася з кіраўніцтвам арганізацыі і абмеркавала правядзенне 26-й штогадовай сесіі.

— Я далажыў, што ў нас створаны аргкамітэт, падпісана распараджэнне кіраўніка дзяржавы па гэтай тэме, — паведаміў віцэ-спікер Палаты прадстаўнікоў Баляслаў Пірштук, які ўзначальваў беларускую дэлегацыю ў Вене. — Нашу краіну двойчы наведваў міжнародны сакратарыят, мы вызначылі фармат таго мерапрыемства, якое будзе праходзіць у Мінску. Кіраўніцтва ПА АБСЕ было задаволена гэтай інфармацыяй. Мы чакаем 15—17 сакавіка кіраўнікоў ПА АБСЕ да нас з двухдзённым візітам.

Стаўленне да Беларусі, да нашых парламентарыяў было цёплым. Гэтым разам, адзначаюць нашы дэпутаты, на пасяджэнні Парламенцкай асамблеі ў адрас Рэспублікі Беларусь увогуле не гучала ніякай крытыкі. Амаль усе парламентарыі праявілі цікавасць да беларускага стэнда.

— У першы дзень, калі мы пачалі працу, практычна за першую палову дня былі разабраны карты беларускай сталіцы, магніты, лістоўкі, — адзначыў намеснік старшыні Палаты прадстаўнікоў. — Дэпутаты другіх краін вельмі цікавіліся, падыходзілі і ўдакладнялі нюансы. Мы, такім чынам, робім вывад, што пераважная большасць дэпутатаў ПА АБСЕ з велізарнай цікавасцю чакаюць сустрэчы ў Беларусі. Для нас вельмі важна, каб гэтае мерапрыемства прайшло на добрым узроўні.

Надзея ЮШКЕВІЧ

yushkevich@zviazda.by