Вы тут

Дата-цэнтр і воблачная платформа BеСlоud гатовыя да выкарыстання


BеСlоud прадставіў Рэспубліканскі цэнтр апрацоўкі даных і Рэспубліканскую воблачную платформу. Найбуйнейшы цэнтр апрацоўкі даных у краіне, дата-цэнтр bеСlоud — адзін з найсучаснейшых ва Усходняй Еўропе. Воблачная платформа размяшчаецца на базе дата-цэнтра, не мае аналагаў на беларускім рынку і ўжо даступная ў тэставым рэжыме дзяржаўным і камерцыйным арганізацыям.


Мяркуецца, што ў 2018 годзе інфармацыйныя рэсурсы ўсіх дзяржаўных органаў размесцяцца менавіта на гэтай воблачнай платформе, а ў хуткім часе рашэнні bеСlоud дапамогуць рэалізаваць сацыяльна значныя для краіны праекты — стварыць сістэмы маніторынгу грамадскай бяспекі, кіравання энергетыкай, транспартам, аховай здароўя, адукацыяй і іншыя ініцыятывы.

Размяшчаецца дата-цэнтр пад аграгарадком Калодзішчы на тэрыторыі ў 12 тысяч квадратных метраў. Праектам прадугледжана ўстаноўка 624 серверных стоек, іх увядзенне ў эксплуатацыю будзе адбывацца ў чатыры этапы. Першы, пачынаючы з распрацоўкі праектнай дакументацыі і заканчваючы ўвядзеннем у эксплуатацыю, быў праведзены за рэкордна кароткі час — за 9 месяцаў. Усе сістэмы рэалізаваныя па схеме "неабходнае плюс адно запасное" з магчымасцю расшырэння. Электразабеспячэнне адбываецца за кошт дызель-генератарных установак і бесперабойных крыніц. Аб'ект аснашчаны комплекснай сістэмай кантролю доступу, шлюзавай сістэмай праходу паміж памяшканнямі, відэаназіраннем і спецыяльнымі датчыкамі. Доступ у цэнтр магчымы толькі па смарт-картках. Допуск журналістаў, дарэчы, стаў магчымым дзякуючы фіксацыі пашпартных звестак.

"Аб'ект знаходзіцца пад пастаяннай аховай, мае некалькі ступеняў абароны, пачынаючы ад плота з калючым дротам і заканчваючы вібракабелем, а таксама 96 відэакамерамі, здольнымі зафіксаваць любое парушэнне па перыметры, — паведаміў журналістам падчас наведвання аб'екта галоўны інжынер Рэспубліканскага цэнтра апрацоўкі даных Ігар АЎДЗЕЕЎ. — Са знешнім светам дата-цэнтр звязаны дзвюма оптавалаконнымі лініямі сувязі, якія праходзяць па розных маршрутах. Першы модуль цэнтра апрацоўкі даных быў зманціраваны ў Харватыі, пасля чаго дастаўлены аўтамабільным транспартам у Беларусь і зманціраваны ўжо напрыканцы года. Ад пачатку будаўнічых работ на той момант прайшло ўсяго 9 месяцаў, беспрэцэдэнтна кароткі тэрмін для ўзвядзення падобнага аб'екта. Цягам гэтага года плануецца зманціраваць яшчэ тры модулі, магутнасці якіх забяспечаць патрэбы ўсёй краіны на даволі працяглы час.

Глабальная мэта праектаў bеСlоud — стварэнне нацыянальнай воблачнай платформы, якая дазволіць дзяржаве і бізнесу істотна знізіць затраты на ІT. Запуск воблачнай платформы дасць магчымасць эфектыўнага выкарыстання сучасных інструментаў у галіне кіравання ІT-інфраструктурай. Спраектаваны і пабудаваны дата-цэнтр паводле міжнародных стандартаў TІЕR ІІІ Dеsіgn і TІЕR ІІІ Fасіlіtу, сертыфікаваны па РСІ DSS, што сведчыць аб найбольш высокай ступені надзейнасці і бяспекі сістэм — на ўзроўні 99,982%. Гэта першы і адзіны ў Беларусі цэнтр апрацоўкі даных, які прайшоў сертыфікацыю падобнага ўзроўню. Акрамя таго, размова ідзе пра высокі ўзровень бяспекі персанальных даных трымальнікаў плацежных пластыкавых картак і ў цэлым інфармацыйнай структуры прадпрыемстваў фінансавага сектара.

— Дата-цэнтр bеСlоud з'яўляецца адным з самых сучасных у краіне і адпавядае сусветным стандартам — у першую чаргу, ён прызначаны для рэалізацыі рэсурсаёмістых і тэхналагічных праектаў, — адзначыў генеральны дырэктар bеСlоud Сяргей ПАБЛАГУЕЎ. — Дзякуючы высокаму ўзроўню тэхнічнага персаналу, гібкасці і высокатэхналагічным магчымасцям, мы гатовыя рэалізаваць любыя актуальныя задачы і знайсці рашэнні пад індывідуальныя патрэбы самых патрабавальных заказчыкаў.

Цікавасць беларусаў да воблачных тэхналогій значна вырасла за апошні год. Па ацэнках экспертаў, аб'ём продажу воблачных паслуг Іааs/Sааs вырас летась да 10 млн долараў. А да 2020 года аб'ём сусветнага рынку воблачных сэрвісаў перавысіць продаж традыцыйных ІT-паслуг. Таму воблачная платформа bеСlоud не проста размяркоўвае і выкарыстоўвае віртуальныя рэсурсы, але і паралельна стварае гібкую ІT-інфраструктуру. Магутнасці можна аператыўна мяняць паводле патрабаванняў бізнесу. Можна, напрыклад, стварыць ІT-інфраструктуру невялікага прадпрыемства за 25 хвілін рабочага часу.

Рынак воблачных тэхналогій актыўна развіваецца ў краінах СНД, у тым ліку ў нас. Ужо сёння воблачныя тэхналогіі называюць адным з нямногіх інструментаў, якія дазваляюць рэалізаваць інавацыйныя праекты без маштабных затрат.

Святлана БАРЫСЕНКА

Выбар рэдакцыі

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».