26-я штогадовая сесія Парламенцкай асамблеі Арганізацыі па бяспецы і супрацоўніцтве ў Еўропе (ПА АБСЕ), што адбудзецца ў беларускай сталіцы 5— 9 ліпеня гэтага года, дазволіць павысіць ролю нашай краіны ў пытаннях сусветнай палітыкі. Такую думку падчас першага пасяджэння рэспубліканскага аргкамітэта па падрыхтоўцы да сесіі ПА АБСЕ выказаў Уладзімір АНДРЭЙЧАНКА, старшыня Палаты прадстаўнікоў Нацыянальнага сходу Беларусі і рэспубліканскага аргкамітэта.
«Мерапрыемства такога ўзроўню і маштабу праводзіцца ў нашай краіне ўпершыню. Яно дазволіць павысіць ролю Беларусі ў пытаннях сусветнай палітыкі і бяспекі, развіцці палітычнага дыялогу з парламентарыямі іншых дзяржаў, адкрые новыя магчымасці па прасоўванні нацыянальных інтарэсаў нашай краіны, пашырэнні гандлёва-эканамічнага супрацоўніцтва, — адзначыў парламентарый. — Перакананы, што будучая сесія, у якой возьмуць удзел каля 700 дэлегатаў з 57 краін свету, не толькі з Еўропы, але і з Канады, і са Злучаных Штатаў Амерыкі, будзе рэзультатыўнай».
Маштаб і важнасць будучай работы патрабуе цеснай каардынацыі дзейнасці дзяржаўных органаў і арганізацый, лічыць спікер. З гэтай мэтай быў створаны дзяржаўны аргкамітэт. «Палатай прадстаўнікоў ужо праведзена пэўная падрыхтоўчая работа. У першую чаргу гэта датычыцца вырашэння фінансавых пытанняў», — падкрэсліў Уладзімір Андрэйчанка. Па яго словах, ужо падрыхтаваны папярэдні каштарыс выдаткаў.
Агульная тэматыка сесіі, што мае адбыцца ў гэтым годзе, — умацаванне ўзаемнага даверу і супрацоўніцтва ў імя міру і росквіту ў рэгіёне АБСЕ. Ужо распрацаваны лагатып і праект праграмы. У прыватнасці, 5 ліпеня плануецца правядзенне сустрэчы Прэзідэнта Аляксандра Лукашэнкі з кіраўніцтвам ПА АБСЕ, выступленне кіраўніка дзяржавы з прывітальным словам на ўрачыстым адкрыцці сесіі.
Вераніка ПУСТАВІТ
Сумесныя праекты ядзерных тэхналогій.
У парадку дня — зацвярджэнне Канцэпцыі нацбяспекі і Ваеннай дактрыны.