Лекцыя з “Маладосцю” у МДЛУ

Лекцыя з “Маладосцю” у МДЛУ

У першы панядзелак вясны першы курс факультэта міжкультурных камунікацый Мінскага дзяржаўнага лінгвістычнага ўніверсітэта праслухаў лекцыю па сучаснай беларускай літаратуры з вуснаў нязвыклых выкладчыкаў — рэдактараў і аўтараў часопіса “Маладосць”.

Завітваць у сцены гэтай установы “маладосцеўцам” даводзіцца часта, як і тамтэйшым студэнтам — у “маладосцеўскія”. Прычыны — існаванне ў часопісе імянной рубрыкі ўніверсітэта, рэгулярнае друкаванне перакладаў, зробленых студэнтамі падчас практыкі ў нашай рэдакцыі. Але гэта ўскосныя прычыны, якія працуюць перманентна на працягу года. Першачарговай, галоўнай прычынай з’яўляецца сама вясна, з пачаткам якой па традыцыі, заведзенай, мабыць, Пятром Васючэнкам, ладзіцца штогадовая творчая сустрэча пад назвай: “Вясна, каханне, “Маладосць”. (Ці мо яны не бяруць “маладосць” у коскі, мо не пішуць з вялікай літары?.. Так ці іначай, але) сустрэча гэтая заўсёды ладзіцца праз “Маладосць”.

Гэтым разам Кацярына Массэ, сама студэнтка-лінгвістка, Віктар Лупасін, паэт і сябра часопіса, Кацярына Тарасава, паэтка-дзесяцікласніца, Дзмітрый Шулюк, паэт, празаік, калумніст, намеснік галоўрэда, а таксама галоўны рэдактар часопіса Святлана Воцінава расказалі пра часопіс і практыку, пачыталі вершы і прозу, пазадавалі пытанні і панастаўлялі студэнтам “адзнак” — за адказы ўручаліся экземпляры выдання.