Толькі па афіцыйных звестках на Брэстчыне 32 тысячы школьнікаў са 160 тысяч маюць тыя ці іншыя праблемы са здароўем. Для атрымання сапраўднай карціны патрабуецца скрынінг, а для выпраўлення сітуацыі — шэраг прафілактычных мер, у тым ліку тых, што дапамогуць дзецям захаваць правільную паставу, мяркуе намеснік старшыні Брэсцкага аблвыканкама Алег ВЯЛІЧКА.
Працяглае сядзенне ў няправільнай позе вядзе да скаліёзу, а на апошніх стадыях гэта ўжо інваліднасць, абмежаванне руху. А пачынаецца ўсё з банальнай гіпадынаміі. Дзеці сядзяць у школе на ўроках, потым дома за камп'ютарам, і пазваночнік дэфармуецца. 5 працэнтаў школьнікаў у рэгіёне маюць дыягнаставаны скаліёз, яшчэ 6,5 працэнта — парушэнне паставы, усяго — 11 працэнтаў. У Брэсце размова наогул ідзе пра 19! Аднак мяркуецца, што пры дасканалейшым абследаванні гэта лічба акажацца яшчэ большай.
У вобласці ёсць пакуль толькі два камп'ютарныя тамографы, якія дазваляюць прасвяціць пазваночнік. Апараты бясшкодныя, пацыент не атрымлівае апраменьвання. Адзін з тамографаў знаходзіцца ў абласной дзіцячай бальніцы, другі — у Пінскім дыспансеры спартыўнай медыцыны. Каб ахапіць усе раёны, патрабуецца яшчэ тры апараты, якія неабходна набыць у межах прафілактычнага праекта «Правільная пастава — залог здароўя».
Сумесная ініцыятыва ўпраўленняў адукацыі і аховы здароўя нарадзілася пасля звароту брастаўчаніна Аркадзя Разбаша да намесніка старшыні аблвыканкама. Бацька школьнікаў прыйшоў з падборкай літаратуры па працах і методыцы акадэміка Уладзіміра Базарнага ды ўласнымі прапановамі ўкаранення ў навучальны працэс методыкі аздараўлення. Алег Іванавіч, урач па прафесіі, і раней чуў пра работу расійскага вучонага, доктара медыцынскіх навук Уладзіміра Базарнага. Яшчэ раз пагартаў артыкулы навукоўца з вынікамі яго 30-гадовых даследаванняў у школах, дзе вучні сядзяць не за партамі, а навучаюцца за канторкамі стоячы і ў ходзе ўрока маюць магчымасць рухацца. Апісанне вынікаў, вядома, не пакідае абыякавым таго, хто ўважліва пачытае работы Базарнага. У эксперыментальных школах каля 100 працэнтаў дзяцей атрымліваюць атэстаты здаровымі. У звычайных школах, як вядома, карціна не такая ідэальная.
Канторкі — мэбля, якую апошнім часам, хоць не вельмі актыўна, але выкарыстоўваюць школы. Тая ж парта, толькі за ёй можна пісаць і чытаць не седзячы, а стоячы. Чвэрць школ наогул не маюць такой мэблі. Больш таго, як заўважыў начальнік абласнога ўпраўлення адукацыі Юрый ПРАСМЫЦКІ, далёка не ўсе педагогі валодаюць методыкай выкладання прадметаў з выкарыстаннем канторкі для вучняў. Але на гэты аспект цяпер будзе звяртацца асаблівая ўвага падчас правядзення курсаў павышэння кваліфікацыі для настаўнікаў.
Святлана ЯСКЕВІЧ
Мерапрыемства праводзіцца на добраахвотнай аснове.
Не выявіць ні секунды абыякавасці.
