Вы тут

Дзень праваслаўнай кнігі прайшоў у Нацыянальнай бібліятэцы


Па блаславенні Патрыяршага Экзарха ўсяе Беларусі, Мітрапаліта Мінскага і Заслаўскага Паўла Выдавецкі савет Беларускай Праваслаўнай Царквы разам са Свята-Елісавецінскім манастыром і Нацыянальнай бібліятэкай Беларусі арганізавалі Дзень праваслаўнай кнігі, прысвечаны 500-годдзю беларускага кнігадрукавання. Арганізатары імпрэзы нагадалі беларусам, што 500-годдзе беларускага кнігадрукавання — гэта, па сутнасці, свята царкоўнай кнігі, бо Францыск Скарына пачаў сваю асветніцкую дзейнасць з выдання «Псалтыра». Музей кнігі Нацыянальнай бібліятэкі спецыяльна да падзеі падрыхтаваў выстаўку рэдкіх выданняў Бібліі.


— Варта звяртаць увагу не толькі на час узнікнення кнігадрукавання і яго форму, але і на змест: першая беларуская друкаваная кніга была Бібліяй, — сцвярджае намеснік дырэктара Нацыянальнай бібліятэкі Алесь СУША. — На выстаўцы мы зрабілі акцэнт на Бібліі і яе гісторыі, якая налічвае ўжо больш за два тысячагоддзі.

У межах экспазіцыі прадстаўлены старажытныя еўрапейскія спісы на папірусе і пергаменце, а таксама ўпершыню дэманструецца якасна зробленае факсімільнае ўзнаўленне «Паслання апостала Пятра» — адзін з найбольш старажытных рукапісаў хрысціянскага свету, які ўваходзіць у склад Новага Запавету Бібліі (факсіміле зусім нядаўна перадала ва ўласнасць Нацыянальнай бібліятэцы Ватыканская апостальская бібліятэка). Акрамя сусветнай біблейскай гісторыі акрэслілі і шлях духоўнай кнігі на беларускіх землях: гісторыя Бібліі на Беларусі налічвае амаль тысячу гадоў, пачынаючы ад Тураўскага евангелля ХІ стагоддзя. Нацыянальная бібліятэка прэзентавала не толькі друкаваныя выданні, але і каштоўныя рукапісныя кнігі, што існуюць у адзіным асобніку. Напрыклад, унікальныя помнікі кнігапісных традыцый нашай краіны — беларускія рукапісныя евангеллі XVІ—XVІІ стагоддзяў.

Асобнае месца на выстаўцы займае першакніга беларускай культуры — Біблія Францыска Скарыны. Гледачы пазнаёміліся з трыма асобнікамі Бібліі з фонду Нацыянальнай бібліятэкі, у якіх змешчаны адразу 7 канвалютаў першадрукара: «Кніга царстваў» аб'ядноўвае пад адной вокладкай 4 кнігі. Акрамя «Кнігі царстваў», на экспазіцыю трапілі «Прамудрасць Божая» і «Ісус Сірахаў» — выданні Бібліі, што пабачылі свет на пачатку друкарскай дзейнасці Скарыны ў Празе. Іх набылі для бібліятэкі больш як 90 гадоў таму, і з таго часу кнігі рэдка прадстаўляюць гледачам — вядома, такія рарытэты беражліва захоўваюцца.

Дар'я ЧАРНЯЎСКАЯ

Загаловак у газеце: Ад Бібліі вытокі

Дадаць каментар

Выбар рэдакцыі

Культура

Форум тэатральнага мастацтва «ТЭАРТ» пакінуў на сэрцы рваныя раны

Форум тэатральнага мастацтва «ТЭАРТ» пакінуў на сэрцы рваныя раны

Мядзведзь на сцэне, Чэхаў на мове жэстаў і самая дакладная перадача стану дэпрэсіі.

Спорт

Настасся Чарняўская: Трэба, каб людзі ведалі: бадмінтон — рэальны спорт

Настасся Чарняўская: Трэба, каб людзі ведалі: бадмінтон — рэальны спорт

Якія задачы ставяцца перад камандай у 2019 годзе і што самае важнае ў бадмінтоне?

Грамадства

Які ўрок лепшы: перакулены або традыцыйны?

Які ўрок лепшы: перакулены або традыцыйны?

Як зрабіць, каб у вучняў загарэліся вочы?

Грамадства

Губернатар Гродзеншчыны - пра перспектыўныя праекты рэгіёна

Губернатар Гродзеншчыны - пра перспектыўныя праекты рэгіёна

Горад-спадарожнік, анкалагічны цэнтр, «вёскі будучыні»...