Як захаваць здароўе ў міжсезонне?

Медыкі расказалі, што неабходна мець на ўвазе, каб не дапусціць абвастрэння хранічных захворванняў вясной.

Эпідэміі грыпу няма, ёсць толькі адзінкавыя выпадкі, у тым ліку цяжкія

Дацэнт кафедры тэрапіі Беларускай медыцынскай акадэміі паслядыпломнай адукацыі, кандыдат медыцынскіх навук Сяргей ПЯТРОЎ:

— Сезон рэспіраторных захворванняў і грыпу на самай справе працягнецца дзесьці да канца красавіка. Пасля пандэміі сезона 2009—2010 гадоў у нас не назіраецца эпідэміі грыпу. Ва многім гэта звязана з тым, што ўсе напалохаліся (не толькі ў Беларусі, але і ў многіх краінах), і пачалася актыўная вакцынацыя. Эпідэміі грыпу няма і сёлета, але ёсць адзінкавыя выпадкі, у тым ліку такія, што цяжка працякаюць. Практыка паказвае, што пацярпелі ў першую чаргу непрышчэпленыя.

Таму калі ў верасні—кастрычніку надыдзе час чарговай вакцынацыі, не ігнаруйце яе, каб у нашым грамадстве зноў быў створаны калектыўны імунітэт. Палеміка вакол таго, што можна абысціся і без вакцынацыі, ствараецца на пустым месцы. Аргумент у тых, хто супраць, адзін — узнікаюць ускладненні. Сапраўды, яны бываюць, але вельмі рэдка. Той, хто не прышчэпліваецца, паразітуе за кошт тых, хто прышчэпліваецца. Першыя, па сутнасці, абараняюць не толькі сябе, але і іншых.

Калі надыдзе сапраўды час міжсезоння, гэта ў першую чаргу адчуюць людзі з хранічнымі захворваннямі лёгкіх — бранхіяльнай астмай і абструктыўнай хваробай лёгкіх. У першым выпадку парада адна — як мага менш кантактаваць з пылком раслін, а ў другім, калі ўдалося пазбегнуць рэспіраторных захворванняў і грыпу, можна параіць кінуць курыць.

Гуляйце на свежым паветры ўсёй сям'ёй і забудзьцеся на рэстараны хуткага харчавання

Дацэнт кафедры педыятрыі Беларускай медыцынскай акадэміі паслядыпломнай адукацыі, кандыдат медыцынскіх навук Алена КАЛУПАЕВА:

— Ад грыпу летась было прышчэплена каля 70 працэнтаў дзяцей ва ўзросце ад 6 месяцаў. Таму выпадкаў грыпу рэгіструецца вельмі мала, а вось распаўсюджанасць рэспіраторнай паталогіі застаецца пакуль высокай.

Усе нашы дзеці назіраюцца ў паліклініках, штогод праходзяць агляд у педыятра, ім вызначаецца група здароўя. 1-ю групу, а сюды адносяцца абсалютна здаровыя дзеці, маюць 28 працэнтаў, 2-ю (калі ёсць невялікія функцыянальныя адхіленні ў стане здароўя, напрыклад, схільнасць да частых ВРВІ) — 58,6 працэнта, 3-я і 4-я група дзяцей з хранічнай паталогіяй — у 11,9 і 1,6 працэнтаў адпаведна. На першым месцы па распаўсюджанасці — захворванні органаў дыхання, на другім — хваробы вачэй, асабліва міяпія (блізарукасць), на трэцім — траўмы, на чацвёртым — страўнікава-кішачныя захворванні. Гастрапаталогія, дарэчы, — самая распаўсюджаная сярод хранічных, праўда, колькасць такіх хвароб крыху знізілася ў мінулым годзе ў параўнанні з 2015-м.

Вясной актуальнымі становяцца прафілактычныя мерапрыемствы для дзяцей з захворваннямі страўнікава-кішачнай і сардэчна-сасудзістай сістэм, органаў дыхання. Бацькі для папярэджвання абвастрэнняў, незалежна ад захворвання, павінны звярнуць увагу на рэжым дня і адпачынку. Неабходна дастатковае знаходжанне на свежым паветры, фізічная актыўнасць, штодзённыя прагулкі перад сном. Акрамя таго, рацыянальнае збалансаванае харчаванне. Заахвочвайце дзяцей спектаклямі і выстаўкамі, фізкультурай і спортам, а не паходамі ў рэстараны хуткага харчавання. Звярніце ўвагу і на псіхаэмацыянальны клімат у вашай сям'і і школе. Прызначце на вясну і паход да ўрача для праходжання чарговага медабследавання.

Нельга ісці супраць прыроды — біярытмы ніхто не адмяняў

Дацэнт кафедры кардыялогіі і ўнутраных захворванняў Беларускага дзяржаўнага медыцынскага ўніверсітэта, кандыдат медыцынскіх навук Вольга ПАЎЛОВІЧ:

— Каб не хварэць, трэба жыць па правілах прыроды. Існуе нават такі кірунак у медыцыне, як хронамедыцына — яна ўлічвае розныя біярытмы. Напрыклад, сутачныя. Скажам, у хворых з артэрыяльнай гіпертэнзіяй пасля сутачнага манітарыравання можна выявіць пікі павышэння артэрыяльнага ціску і адпаведным чынам зрушыць прыём лекаў, каб дасягнуць большай эфектыўнасці. Такім чынам мы спрабуем ужо адысці ад стандартных прыёмаў тройчы на дзень — раніцай, днём і ўвечары. Калі ў пацыента атэрасклероз, яму прызначаюцца стаціны, а іх нельга прымяняць у любы час сутак. Вядома, што халестэрын у большай ступені выпрацоўваецца ноччу, а таму прэпараты гэтай групы мэтазгодна прызначаць увечары, пры гэтым у меншай дозе, каб знізіць пабочныя эфекты. Трэцяе пакаленне антыгістамінных прэпаратаў можна ўжываць адзін раз у суткі, аднак калі канкрэтна? Навука сёння ведае, што найвышэйшая канцэнтрацыя гістаміну ў крыві ўвечары, а таму менавіта ў гэты час і трэба прымаць падобныя лекі. Для зніжэння тромбаўтварэння, а яно можа прывесці і да інфаркту, той жа аспірын лепей таксама прымаць увечары. Таму што тромбы зліпаюцца менавіта бліжэй да начнога часу. А вось глюкакортыкастэроіды выпрацоўваюцца ў большай колькасці раніцай, таму і гармоны павінны прызначацца менавіта на гэты час, асабліва тым, хто ўжывае іх працягла.

Вельмі важная рэч для ўсіх — рэжым дня. Арганізму неабходна своечасова прачынацца, прымаць ежу, класціся спаць. Адмена пераходу на зімовы час мела тут вялікае значэнне. Многія пажылыя і хранічна хворыя скардзіліся ў сувязі з гэтымі пераходамі на дэзадаптацыю.

Усе нагрузкі размяркоўвайце раўнамерна і цягам дня, і цягам тыдня. Рабіце перапынкі ў рабоце, рацыянальна размяркоўвайце час працы нават у выхадныя. Дарывацца да работы на той жа дачы вельмі шкодна, аб чым сведчыць наш прафесійны тэрмін "дачны інфаркт".

Міжсезонне на нас сапраўды уплывае, у тым ліку сваім нестабільным надвор'ем. Біярытмы збіваюцца. Таму менш у гэты час сядзіце перад тэлевізарам, больш стасункаў са станоўчымі людзьмі, аранжавага колеру ў інтэр'еры. Парайцеся з урачом і адносна прыёму вітамінных комплексаў. Асцярожней трэба быць з алкаголем. Мінімальныя дозы ўздзейнічаюць станоўча ў пэўным узросце, але менавіта мінімальныя.

Святлана БАРЫСЕНКА