Вы тут

Сэрцы, што поўняцца песнямі


Для выкладчыкаў, навучэнцаў і гасцей, якія завіталі ў Мінскі дзяржаўны каледж імя М. І. Глінкі, вясна пачалася з канцэрта «Народная песня ў маім сэрцы». Адна з найстарэйшых устаноў адукацыі, заснаваная ў 1924 годзе, Мінскі дзяржаўны каледж імя М. І. Глінкі вось ужо амаль сорак чытыры гады рыхтуе артыстаў і кіраўнікоў фальклорных калектываў.


Плённай працай у гэтым кірунку, падмурак якому быў закладзены кампазітарам Алесем Рашчынскім, вылучаецца дзейнасць цыклавой камісіі «Народны хор», якім кіруе таленавіты выкладчык, хормайстар Кіра Мікалаеўна Славінская. Менавіта дзякуючы дзейнасці гэтай жанчыны ўпершыню ў гісторыі каледжа ў сакавіку 2016 года загучала з новай сілай народная песня ў выкананні Нацыянальнага акадэмічнага народнага хору імя Г. І. Цітовіча, мастацкім кіраўніком якога з’яўляецца народны артыст Рэспублікі Беларусь Міхась Дрынеўскі.

Творчы прафесійны калектыў каледжа «Народны хор» вядзе актыўную канцэртную дзейнасць у Рэспубліцы Беларусь і за мяжой, выкананнем беларускіх народных песень, песень у апрацоўцы беларускіх кампазітараў, аўтарскіх твораў садзейнічае адраджэнню найбагацейшых традыцый беларускага музычнага фальклору, далучэнню слухачоў да аўтэнтычных скарбаў роднай культуры. Святочны канцэрт «Народная песня ў маім сэрцы» ладзіўся ў каледжы ўпершыню і стаў падмуркам культураадпаведнага выхаваўчага асяроддзя, якое аб’яднала лаўрэатаў II Мінскага адкрытага конкурсу харавых і сольных спеваў «Вясновы спеў».

Конкурс «Вясновы спеў», існаванне якога пачынаецца з 2014 года, праводзіцца сярод дзяцей ва ўзросце ад сямі да сямнаццаці годоў па намінацыях «Акадэмічныя сольныя спевы», «Акадэмічныя харавыя спевы», «Народныя харавыя спевы», «Народныя сольныя спевы». Летась у конкурсе ўзялі ўдзел 58 салістаў і 33 харавыя калектывы і харавыя ансамблі. Агульная колькасць выканаўцаў склала больш як паўтары тысячы чалавек! Па выніках конкурсу 21 саліст і 26 харавых калектываў сталі лаўрэатамі, сярод якіх першае месца ў намінацыі «Народныя сольныя спевы» атрымала Настасся Бекарэвіч, якая цяпер ужо навучэнка I курса каледжа імя Глінкі (выкладчык Г. Б. Мілавідава), у намінацыі «Народныя харавыя спевы» — ансамбль народнай музыкі «Медуніца» сярэдняй школы № 11 г. Мінска (кіраўнік І. А. Радзькова).

Асноўная ідэя правядзення канцэрта «Народная песня ў маім сэрцы» — стварэнне этнакультурнай прасторы, фарміраванне ў навучэнцаў каштоўнасных арыенціраў у напрамку ўсведамлення значнасці песеннай традыцыйнай культуры свайго народа, далучэнне навучэнцаў да роднай мовы, нацыянальных традыцый. На значнасць мерапрыемства звярнулі ўвагу ў сваёй прадмове да выканаўцаў і слухачоў старшыня цыклавой камісіі «Народны хор» Кіра Славінская і намеснік дырэктара па вучэбнай рабоце Аляксей Снітко, які адзначыў: «У Мінску і таксама за яго межамі харавая і вакальная спеўная культура, як акадэмічная, так і народная, жывуць і развіваюцца. Пакуль ёсць таленавітыя людзі, якія любяць музыку, дзяцей, педагогіку і з захапленнем укладваюць свае сілы ў выхаванне новых талентаў, народнае мастацтва будзе квітнець».

Вялікую каштоўнасць у гэтай сувязі маюць народныя калектывы, ансамблі народнай музыкі і фальклору дзяцей і моладзі, дзейнасць якіх прысвечана перайманню фальклорнага мастацтва.

З музычным прывітаннем адкрыў канцэрт народны хор і інструментальны ансамбль каледжа імя М. І. Глінкі з песняй «Ай, чалом, чалом» (кіраўнік І. У. Канцэвіч, канцэртмайстар Я. М. Мароз). У канцэрце ўзялі ўдзел салісты і ансамблі ўстаноў сярэдняй і дадатковай адукацыі г. Мінска, якія прадэманстравалі спецыфіку народнай манеры спеваў: акрамя вышэйзгаданай «Медуніцы», яшчэ ўзорны ансамбль народный музыкі «Бараўлянская крынічка» Бараўлянскай дзіцячай школы мастацтваў (кіраўнік А. Г. Горская); ансамбль народнай песні «Жывіца» дзіцячай музычна-мастацкай школы мастацтваў № 1 г. Мінска (кіраўнік Л. Н. Якімавец); фальклорны ансамбль «Праменьчык» дзіцячай музычнай школы мастацтваў імя Я. А. Глебава г. Мінска (кіраўнік В. В. Лінко).

Жыццёвыя ўмовы змяняюцца і не спрыяюць захаванню фальклору. Але, нягледзячы на тое, што фалькларысты мінулага адзначалі знікненне фальклорных традыцый, народная спадчына жыве, хаця і не ў тых межах, як гэта было, напрыклад, сто гадоў таму. Важна зразумець, што, пакуль жыве народ, будзе працягваць існаванне і народная песня. Таму галоўная задача падобных сустрэч на базе вядучых устаноў адукацыі, адной з якіх з’яўляецца Мінскі дзяржаўны каледж імя М. І. Глінкі, — актыўна ўзнаўляць народныя музычныя традыцыі ў эстэтычным выхаванні падрастаючага пакалення на базе дзіцячых музычных школ мастацтва, сярэдніх школ і нават у дзіцячых садках.

Нездарма вядомы харавы дырыжор, грамадскi i музычны дзеяч Р. Р. Шырма адзначаў, што народ, якi перастае спяваць, перастае i жыць.

Наталля КАРДАШОВА

Загаловак у газеце: СЭРЦЫ, ШТО ПОЎНЯЦЦА ПЕСНЯМІ

Дадаць каментар

Выбар рэдакцыі

Грамадства

​Як аб'яднаць эканамічны рост з экалагічным дабрабытам?

​Як аб'яднаць эканамічны рост з экалагічным дабрабытам?

Гэтае і іншыя пытанні абмеркавалі ўдзельнікі ХІV Рэспубліканскага экалагічнага форуму.

Культура

Прайшоў VІІІ фэст сярэднявечнай культуры «Гальшанскі замак»

Прайшоў VІІІ фэст сярэднявечнай культуры «Гальшанскі замак»

Фестываль у аграгарадку Гальшаны, што на Ашмяншчыне, хоць і валодае статусам рэгіянальнага, ужо каторы год аб'ядноўвае аматараў айчыннай гісторыі з усёй краіны.

Грамадства

Як праходзяць грамадскія работы ў заапарку?

Як праходзяць грамадскія работы ў заапарку?

У дзень арганізацыя прымае да 15 «адпрацоўшчыкаў».

Грамадства

«Звязда» міні-ківі пасадзіла, а вы?

«Звязда» міні-ківі пасадзіла, а вы?

Днямі ў садзе Інстытута пладаводства ў Самахвалавічах былі высаджаны новыя кусты актынідыі.