Вы тут

Цэнтр сучасных мастацтваў адкрыў пікантную выставу Ганны Сілівончык


Непрытоены эратызм і рамантызм чалавечых стасункаў

У момант, калі мы прагнем адчуць вясну і пачуццёвыя прыгоды, якія яна нам абяцае, Цэнтр сучасных мастацтваў адкрыў пікантную выставу адной з найцікавейшых сучасных беларускіх мастачак Ганны Сілівончык.


У сваёй манеры — з вельмі прыгожымі колерамі, прапісанымі дэталямі, метафарычнасцю выявы — яна прадставіла цэлую серыю палотнаў, на якіх чалавек і прырода пранікаюць адно ў аднаго і становяцца дзіўным наватворам. Дзе адгукаюцца позывы цеплыні, адчуваецца імкненне да аднаўлення, эмоцый і асалоды, бачыцца тонкае апеляванне да інтымных бакоў жыцця. Гэта ўвасобілася ў выставе пад назвай «Тычынкі і песцікі», дзе хапае пакручастых, узорыстых, усюдыісных раслін, якія ўтрымліваюць матывы квітнення і аднаўлення. Экспазіцыя ў будынку Цэнтра сучасных мастацтваў, што на праспекце Незалежнасці, будзе доўжыцца да сярэдзіны наступнага месяца.

Назва, метафары, выявы адсылаюць, зразумела, да рэпрадуктыўнай сістэмы, але ж гэтым, на шчасце, сэнсы не абмяжоўваюцца. Можна ўпадабаць няхітрую радасць і дзёрзкую фантазію карціны «Вясенні суботнік», дзе людзі ў халатах, камбінезонах і світарах паводле амаль дзіцячага дапушчэння — усёмагутныя. Голымі рукамі яны ўздзейнічаюць на прыродныя працэсы: вешаюць сонейка, выпускаюць з клеткі птушак, садзяць дрэвы, малююць аблокі фарбай вядомага беларускага вытворцы. Можна аказацца сам-насам з іроніяй над пэўнага кшталту дыспазіцыяй у сям'і: палатно называецца «Догляд хатніх раслін», дзе расліны і мужчына — адно і тое ж. Ён ляжыць, а жанчыны паліваюць яго, стрыгуць і цалуюць. Нарэшце, можна знайсці шчырую, па-мастацку тонкую работу «Садовыя нажніцы», дзе вобраз чалавека ўвасабляецца ў інструменце, дзве часткі якога ўяўляюць сабой мужчыну і жанчыну ў пэўных стасунках.

«Натуральныя жыццёвыя цыклы ў іх чыстым, абсалютным значэнні. Адкрыты эратызм. Смелая, на мяжы эпатажнага разбурэння «табу», іронія над сацыяльнымі ролямі і абмежаваннямі. І, вядома, пачуццёвы рамантызм душэўных перажыванняў», — паводле мастацтвазнаўцаў, усё ўмяшчаецца ў выставу.

Так што экспазіцыя «Тычынкі і песцікі» вельмі прыгожа, метафарычна і вобразна адгукаецца на фізіялагічныя працэсы палавога размнажэння, і не толькі ў раслін. Выстава здольная прыцягнуць наведвальнікаў, хоць бы па тым, як палотны Ганны Сілівончык, з іх багатым і фантастычным раслінным светам, напрамую пераклікаюцца з гэтай парой года. Не кажучы ўжо пра імя самой мастачкі, для пазнавальнага стылю якой у беларускай і не толькі прасторы ўжо замацаванае асобнае месца. Карціны аўтаркі захоўваюцца ў прыватных калекцыях Беларусі, Расіі, Італіі, ЗША, Францыі, Польшчы, Японіі і іншых краін, у фондах музеяў у Беларусі, Расіі і ЗША. За плячыма ў Ганны Сілівончык бясконцая колькасць удзелу ў выставах і арганізацыі 27 прыватных экспазіцый у краіне і па-за яе межамі.

«Тычынкі і песцікі» — чарговая магчымасць прыгледзецца да дэтальна прапрацаваных палотнаў Ганны Сілівончык і знайсці ў іх аналогіі і сімвалы, нарэшце, паглядзець на крыху апошленую сучасным кантэкстам тэму праз прыгожае вытанчанае ўвасабленне. Таму што і насамрэч гэта прыгожа і вытанчана.

Соф'я КІСЯЛЁВА 

Загаловак у газеце: Не Зусім нявінная вясна

Выбар рэдакцыі

Грамадства

Сувораўскае вучылішча вачыма яго навучэнцаў

Сувораўскае вучылішча вачыма яго навучэнцаў

Быць сувораўцам ва ўсе часы было прэстыжна. 

Культура

Харвацкі кінафестываль ZаgrеbDох даследуе рэгіён вялікім экранам

Харвацкі кінафестываль ZаgrеbDох даследуе рэгіён вялікім экранам

Балканскія краіны паўсталі перад гледачом з іх надзённым.

Эканоміка

Новыя жыллёвыя ўмовы. Абараніць уласнікаў, спажыўцоў і пастаўшчыкоў паслуг

Новыя жыллёвыя ўмовы. Абараніць уласнікаў, спажыўцоў і пастаўшчыкоў паслуг

Пра новаўвядзенні, якія дэпутаты мусяць разгледзець на вясновай сесіі.