17 Жнівень, чацвер

Вы тут

Жлобін прыняў чарговы міжнародны турнір


Жлобін ужо даўно стаў па-сапраўднаму спартыўным горадам, сваю рэпутацыю ён пацвердзіў напярэдадні, прыняўшы гандбольны адборачны турнір да чэмпіянату Еўропы — 2017 сярод дзяўчат. Месцам правядзення стаў Цэнтр алімпійскага рэзерву, які разгарнуўся на самым беразе Дняпра.


Госці з Партугаліі, Швейцарыі і Грузіі па заслугах ацанілі спартыўны комплекс і засталіся задаволеныя прыёмам беларусаў.

— Мы заўсёды гатовыя прымаць гасцей, таму што рэспубліканскія і міжнародныя турніры праводзім даволі часта, — адзначае дырэктар ЦАР Аляксей Скуркоўскі. — І атрымліваем толькі станоўчыя водгукі, таму што гатовы аказваць і беларускім, і замежным спартсменам поўны пералік паслуг, пачынаючы ад пражывання, харчавання і заканчваючы аднаўленчымі медыцынскімі працэдурамі.

У мінулым годзе Цэнтр алімпійскага рэзерву ў Жлобіне адзначыў сваё дзесяцігоддзе. Сёння ён складаецца з сямі аб'ектаў і ўяўляе сабой своеасаблівую піраміду. Першымі (у 2006 годзе) адкрыліся лядовая арэна, разлічаная на 2000 гледачоў, і плавальны 50-метровы басейн. Пазней з'явіўся аквапарк, які адразу стаў адным з любімых месцаў гараджан. Ён, дарэчы, быў прызнаны «Найлепшым турыстычным аб'ектам» Рэспубліканскага конкурсу «Пазнай Беларусь».

У дадатак у крокавай даступнасці ад ужо наяўных аб'ектаў былі пабудаваныя палац гульнявых відаў спорту на 1500 глядацкіх месцаў, вяслярная база і лыжаролерная траса. Каб Цэнтр быў паўнавартасным універсальным аб'ектам, неўзабаве з'явіўся і гасцінічны комплекс «Дняпроўская жамчужына», які можа прыняць 114 чалавек.

— Сёння ў нас займаецца каля тысячы дзяцей па 7 аддзяленнях. Усе віды спорту — алімпійскія, таму карыстаюцца папулярнасцю, і мы, трэба сказаць, ускладаем надзеі на нашых навучэнцаў. Самымі паспяховымі відамі пакуль з'яўляюцца хакей і плаванне, добрыя вынікі ў нашых выхаванцаў і ў акадэмічным веславанні, у веславанні на байдарках і каноэ і ў валейболе. Біятлон і гандбол пакуль для Жлобіна з'яўляюцца маладымі відамі, таму пра вынікі казаць рана, — адзначае Аляксей Скуркоўскі.

Падчас спаборніцтваў трыбуны не пустуюць.

Тое, што комплекс жыве актыўным жыццём, бачыш, ледзь наблізіўшыся да спартыўных аб'ектаў: практычна каля кожнага з іх клубіцца дзятва.

— Мы тут амаль кожны дзень. Старэйшы сын займаецца хакеем, малодшы — пакуль плаваннем, — расказвае жыхарка Жлобіна Святлана Мікуліч. — Для такіх гарадоў, як наш, падобныя спартыўныя цэнтры проста аддушына, прыходзім сюды і адчуваем сябе жыхарамі сучаснага, развітога горада. Пакуль чакаю дзяцей з трэніроўкі, магу ў кавярню зайсці, перакусіць пасля работы, а некаторыя бацькі ў нас за гэтыя паўтары-дзве гадзіны паспяваюць пазаймацца ў трэнажорнай зале або схадзіць на фітнес. У выхадныя мы тут наогул усёй сям'ёй: муж — у лазню, мы з дзецьмі — на горкі ў аквапарк. Пару разоў на месяц можам дазволіць гэта сабе без шкоды для сямейнага бюджэту. Шчыра вам скажу, кошты ў нас значна адрозніваюцца ад мінскіх, таму спачатку вельмі часта прыязджалі са сталіцы і Гомеля ў наш аквапарк. Калі такія комплексы будуюцца прадумана, з розумам, не ўзнікае пытання — «навошта?» Іншая справа, калі б яны не былі запатрабаваныя, — адзначае Святлана.

Насельніцтва Жлобіна — 75 тысяч чалавек, і спорт тут любяць, гэта відаць па наведвальнасці матчаў хакейнага клуба «Металург» (кіраўніцтва арэны падкрэслівае, што па статыстыцы гульні каманды наведвае кожны другі жыхар горада), ды і гандбольная кваліфікацыя, якая прайшла напярэдадні, пацвярджае актыўнасць грамадзян. Кіраўніцтва комплексу адзначае, што асноўная доля фінансавання на ўтрыманне аб'екта вылучаецца з бюджэту, але вось-вось лічбы наблізяцца да адзнакі 50 на 50.

— Мы блізкія да таго, каб пакрываць палову выдаткаў на ўтрыманне ЦАР за кошт гаспадарчай дзейнасці. У асноўным гэта даходы ад аквапарку, спа-салона, салярыя, більярда, кавярні. Значную частку сродкаў мы атрымліваем ад здачы плошчаў у арэнду, правядзення карпаратыўных мерапрыемстваў і, вядома ж, вучэбна-трэніровачных збораў беларускіх і замежных спартыўных клубаў. Больш за ўсё, вядома, да нас едуць расіяне, таму што кошт у нас ніжэйшы, а якасць паслуг вышэйшая. Але былі і больш далёкія госці, у 2015 годзе прыязджалі плыўцы з Бахрэйна і таксама засталіся задаволеныя, — расказвае Аляксей Леанідавіч.

Поўным прызнаннем паспяховага функцыянавання Цэнтра стала ўключэнне яго ў экскурсійны тур «Залатое кальцо Гомельшчыны».

Да тэмы:

Зборная Беларусі (U-19) у адборачным турніры да чэмпіянату Еўропы заняла трэцяе месца ў групе і не прайшла на Еўра-2017.

Дар'я ЛАБАЖЭВІЧ

lobazhevich@zviazda.by

Загаловак у газеце: На беразе Дняпра

Дадаць каментар

Выбар рэдакцыі

Грамадства

Руху WоrldSkіlls Belarus патрабуецца ўласны брэнд

Руху WоrldSkіlls Belarus патрабуецца ўласны брэнд

У кастрычніку ў Абу-Дабі (ААЭ) пройдзе 44-ы чэмпіянат WоrldSkіlls Іntеrnаtіоnаl, у якім возьмуць удзел і беларусы. 

Грамадства

Як байцы з трох краін узводзяць новую спартыўную арэну

Як байцы з трох краін узводзяць новую спартыўную арэну

Сярод усіх маладзёжных будоўляў гэтага лета мінская гарадская — асаблівая. 

Калейдаскоп

Дзмітрый Літвіновіч: СhеrrуVаtа «абнулілася» і пачала новае жыццё

Дзмітрый Літвіновіч: СhеrrуVаtа «абнулілася» і пачала новае жыццё

Наколькі цяжка пачынаць прамаўляць уголас пасля доўгага маўчання, ці змяніліся ўмовы гульні на музычным рынку і ці прынялі хіпстары памкненні эксперыментатараў старога пакалення.

Грамадства

Унікальны заплыў «на чым папала» прайшоў на Аўгустоўскім канале

Унікальны заплыў «на чым папала» прайшоў на Аўгустоўскім канале

Гэта відовішча ўжо трэці год запар здзіўляе сваім нестандартным падыходам.