Вы тут

Захаваць тое, што ёсць


На мінулым тыдні адбыліся выбары ў парламент Нідэрландаў. Кіраўнік крайне правай галандскай "Партыі свабоды" Герт Вілдэрс яшчэ ў чэрвені 2016 года, адразу пасля перамогі "Брэксіта", прапанаваў правесці рэферэндум аб выхадзе Нідэрландаў з ЕС — "Нэксіт".


Эліты Еўрасаюза былі вельмі напалоханыя непрыемнай перспектывай "Нэксіта" і ўсур'ёз ўключыліся ў барацьбу за галасы электарату на баку палітычных партый, якія магчымасці выхаду з Еўрасаюза не абмяркоўвалі. На прасторах ЕС і гаворкі не магло весціся аб прадастаўленні партыі Вілдэрса роўных магчымасцяў для асвятлення сваіх пазіцый, уся агітацыя вялася за яго канкурэнтаў. Дастаткова было паглядзець Еўраньюс, найбуйнейшы ў ЕС канал навін, вельмі папулярны ў Нідэрландах, напярэдадні галасавання, каб пераканацца, за каго трэба галасаваць, на думку Бруселя. Сюжэты былі поўныя інтэрв'ю з сапернікамі як самога Вілдэрса, так і яго партыі, у якіх асуджаліся ключавыя пастулаты "Партыі свабоды" — правядзенне рэферэндуму аб выхадзе з ЕС і негатыўнае стаўленне як да мусульман, так і да эмігрантаў у цэлым.

На самай справе гэта добры сігнал — эліты Еўрасаюза разумеюць усю небяспеку новых рэферэндумаў аб выхадзе з ЕС і робяць эфектыўныя крокі, каб Еўрасаюз захаваць. Тут ужо гаворка не пра дэмакратыю, а пра нацыянальную бяспеку, калі так можна выказацца аб міжнароднай арганізацыі, якой з'яўляецца Еўрапейскі саюз. У выніку магутнага негатыўнага інфармацыйнага націску на "Партыю свабоды", выйграць выбары яна не змагла, хоць і прырасла нязначна дэпутатамі ў параўнанні з мінулымі выбарамі. Адыграў сваю ролю і прагматызм галандцаў — Нідэрланды вельмі моцна залежаць у развіцці сваёй эканомікі ад бесперашкоднага экспарту тавараў і паслуг у іншыя краіны ЕС, і выхад са складу гэтага інтэграцыйнага аб'яднання вельмі балюча ўдарыў бы па эканоміцы і высокім узроўні жыцця. Тым больш і нізкая нараджальнасць не дае шанцу адмовіцца ад мігрантаў, як бы гэтага ні хацелася радыкалам.

Украіна пайшла на сур'ёзнае абвастрэнне адносін з Расійскай Федэрацыяй. Прэзідэнт Пётр Парашэнка абвясціў аб увядзенні санкцый у дачыненні да пяці банкаў з расійскім дзяржаўным капіталам, якія ажыццяўляюць работу на рынку Украіны. Сур'ёзныя абмежаванні ўведзены на год у дачыненні да Ашчадбанка, VS Bаnk, Прамінвестбанка, ВТБ Банка і БМ Банка. Прэтэнзіі да банкаў пачаліся пасля таго, як Ашчадбанк пачаў абслугоўванне кліентаў з пашпартамі ДНР і ЛНР у мэтах выканання ўказа Уладзіміра Пуціна аб прызнанні ў Расіі пашпартоў, выдадзеных у самаабвешчаных рэспубліках. Цяпер банкам забаронена выводзіць грошы на карысць цэнтральных структур. Эксперты лічаць, што гэтая мера негатыўна паўплывае на эканоміку Украіны, якая і так інвестыцыямі не насычаная.

Яшчэ адной украінскай навіной стала абвяшчэнне Кіевам афіцыйнай блакады транспартных маршрутаў з ДНР і ЛНР. Фармальнай падставай стала тое, што кіраўніцтва самаабвешчанай Данецкай народнай рэспублікі ўвяло знешняе кіраванне амаль на 40 прадпрыемствах украінскай юрысдыкцыі ў адказ на паўтара месяца блакады неафіцыйнай, якая праводзілася членамі радыкальных фарміраванняў Украіны па сваёй ініцыятыве, што негатыўна адбілася на эканамічнай сітуацыі ў ДНР і ЛНР. Сітуацыя дрэнная і тым, што яна можа падарваць выкананне "Мінскіх дамоўленасцяў" аб урэгуляванні ўкраінскага крызісу. У гэтым не зацікаўлены ні Расія, ні Еўрасаюз. Да ўвядзення блакады прэзідэнт Украіны выступаў супраць яе. Эксперты мяркуюць, што, будучы не ў стане справіцца з неафіцыйнай блакадай, Пётр Парашэнка вырашыў паказаць сябе моцным лідарам, надаўшы ёй афіцыйны характар.

На тыдні спачатку парламент, а потым і каралева Вялікабрытаніі Лізавета ІІ прынялі рашэнне ўхваліць біль пра запуск працэдуры Brехіt, што надало дакументу законную сілу. Пасля прыняцця гэтых рашэнняў, прэм'ер-міністр Тэрэза Мэй мае магчымасць задзейнічаць артыкул 50 Лісабонскай дамовы аб выхадзе з ЕС, накіраваўшы ў Брусель фармальны запыт аб выхадзе Вялікабрытаніі з Еўрасаюза.

На мінулым тыдні ў Мінску прайшло мноства сустрэч на вельмі высокім узроўні з замежнымі палітыкамі. У прыватнасці, 13—14 сакавіка Беларусь наведала дэлегацыя Міністэрства замежных спраў ФРГ на чале з дзяржаўным міністрам МЗС па справах Еўропы Міхаэлем Ротам, 15 сакавіка ў Мінску прайшла сустрэча намеснікаў міністраў замежных спраў краін — удзельніц "Усходняга партнёрства" і Вышаградскай групы, у той жа дзень прайшла сустрэча Аляксандра Лукашэнкі з намеснікам прэм'ер-міністра — міністрам замежных і еўрапейскіх спраў Бельгіі Дзідзье Рэйндэрсам. 15 сакавіка старшыня Палаты прадстаўнікоў Нацыянальнага сходу Беларусі Уладзімір Андрэйчанка і старшыня Парламенцкай асамблеі АБСЕ Крысцін Мутонен падпісалі ў Мінску дамову аб правядзенні ў Мінску 26-й летняй сесіі Парламенцкай Асамблеі АБСЕ, што яшчэ некалькі гадоў таму было немагчыма. 16 сакавіка на сустрэчы Прэзідэнта Беларусі Аляксандра Лукашэнкі з кіраўніком місіі МВФ па Беларусі Пітэрам Долманам былі абмеркаваны перспектывы развіцця адносін з Міжнародным валютным фондам.

Сяргей Кізіма, доктар палітычных навук

Дадаць каментар

Выбар рэдакцыі

Грамадства

Першае працоўнае месца: чым вабіць і чым палохае?

Першае працоўнае месца: чым вабіць і чым палохае?

Вясной у ВНУ традыцыйна пачынаецца размеркаванне.

Культура

Як жылі беларусы-сакуны на Старадарожчыне

Як жылі беларусы-сакуны на Старадарожчыне

Дом без падмурка, печ — на драўляным фундаменце.

Грамадства

Як «Звязда» пісала гісторыю (1946 — 1953)

Як «Звязда» пісала гісторыю (1946 — 1953)

Аднаўленне разбуранай у гады Вялікай Айчыннай вайны народнай гаспадаркі стала беспрэцэдэнтным подзвігам мірнага часу.

Грамадства

Як будзе развівацца беларуская фармацэўтыка

Як будзе развівацца беларуская фармацэўтыка

Залежнасць краіны ад імпарту павінна быць зніжана пры захаванні якасці і эфектыўнасці лекавых прэпаратаў.