Закаціла веласіпед у двор, накінула фартух — і пабегла... Першая справа, вядома, сагрэць чалавека. Наталля Каляда ідзе па дровы, выносіць попел, каб можна было распаліць у печы. Потым спяшаецца па ваду да студні. Наступнымі ў чарзе паход у магазін, мыццё падлогі і — хоць крышачку размовы з гаспадыняй хаты. Для сваіх падапечных сацыяльны работнік часта становіцца, бадай, адзіным ратавальнікам ад адзіноты.
Дапамагае... звонкі голас
У Баранавіцкім раёне каля 480 людзей не могуць паўнавартасна паклапаціцца пра сябе. Пра магчымых падапечных у тэрытарыяльны цэнтр сацыяльнага абслугоўвання насельніцтва паведамляюць работнікі ФАПаў, сельвыканкамаў. Ды і самі сацыяльныя работнікі ходзяць па дамах, распытваюць, ці не патрэбна дапамога.
— Многія нашы супрацоўнікі пачынаюць з сумяшчэння. Напрыклад, нясе паштальён газету ў далёкую вёсачку і адначасова па нашай прапанове прыбірае ў хаце адзінокага старога. Ёсць працуючыя пенсіянеры, якім хочацца паклапаціцца пра іншых. Так, нашаму старэйшаму работніку 75 гадоў, — кажа Наталля Маслоўская, загадчыца аддзялення сацыяльнай дапамогі на даму Баранавіцкага тэрытарыяльнага цэнтра сацыяльнага абслугоўвання насельніцтва.
З Кацярынай Тарасаўнай Пятрушкай Наталля Каляда працуе 18 гадоў. Бабуля ўсё жыццё правяла ў роднай вёсцы Палянічыцы, даўно пахавала мужа, малодшую сястру. Наталля яе адначасова і памочнік па гаспадарцы, і суразмоўца, і перакладчык. З часам доўгажыхарка амаль страціла слых, так што суседак яна не чуе, а ўрачы, што наведваюць Кацярыну Тарасаўну, просяць, каб сацыяльны работнік была побач, перадавала іх словы пацыентцы.
— Я раней працавала ў сферы культуры, цяпер таксама часта выступаю на святах, так што голас звонкі, — усміхаецца Наталля, — ды і прывыкла, што з бабай Кацяй трэба «на ўсю хату» гаварыць. Вочы ў Кацярыны Тарасаўны добра бачаць, можа разабраць шрыфт і ў чэку з магазіна, і ў газетным матэрыяле. Аднойчы, калі слых зусім знік, мы з ёй размаўлялі запіскамі. Наогул, асноўная праблема, ад якой пакутуе пажылы чалавек, — адзінота. Выйсці да суседак сілы не стае, а ў госці рэдка хто заходзіць. Кацярына Тарасаўна выпісвае раённую газету, дык часта просіць, каб навіны мы разам чыталі і абмяркоўвалі потым.
Штотыднёвае падарожжа
Праца для Наталлі Каляды пачынаецца з 8 раніцы. Жанчына абыходзіць дамы два-тры разы на тыдзень, але ёсць выпадкі, калі сацыяльнаму работніку трэба наведваць падапечнага штодзённа. На аднаго чалавека, што пражывае ў сельскай мясцовасці без камунальных выгод, заканадаўствам зацверджана норма — 2 гадзіны 40 хвілін. За гэты час трэба прынесці вады, дроў, распаліць печку, прыбраць у доме, пры неабходнасці — дапамагчы з асабістай гігіенай, прыгатаваць ежу, паклапаціцца пра медыцынскую ці якую іншую дапамогу. А яшчэ падмесці, а зімой — расчысціць двор і дарогу да веснічак. У дадатковых паслугах значыцца таксама праполка агарода, колка дроў, упарадкаванне брыкету...
— Бывае, стары чалавек напачатку адмаўляецца ад дапамогі. Ці саромеецца, ці апасаецца, што гэта дорага каштуе. У такім разе мы размаўляем, тлумачым, прапануем заключыць дамову на месяц для параўнання, — гаворыць Наталля Каляда. — Дарэчы, пасля такой спробы пакуль яшчэ ніхто не забраў сваю заяву.
Па магчымасці, вёскі, куды зазірае сацыяльны работнік, знаходзяцца побач. Аднак усё роўна пяць—сем кіламетраў у адзін бок жанчына праязджае. Летам і ў спрыяльнае надвор'е — на веласіпедзе, зімою — на рэйсавым аўтобусе, але часам і пешкі даводзіцца ісці. Двухколавы транспарт для сваіх супрацоўнікаў закупляе тэрытарыяльны цэнтр. Сёлета якраз замоўлена сем новых веласіпедаў.
Хай жывуць сваім жыццём
У наступнай вёсачцы Гацішча нас сустракае Соф'я Антонаўна Санчук. Наталля цёпла ўсміхаецца, распытвае падапечную пра яе справы. Гаспадыня ахвотна паказвае гаспадарку, расказвае, як на вясновыя святы атрымала віншаванні ад родных з горада. Калі ж мы папыталіся, чаму не пераязджае ў гарадскую кватэру, 83-гадовая гаспадыня падзялілася, што аднойчы паспрабавала... і ёй не спадабалася.
— Нічога сказаць не магу, клапаціліся, мне нават гатаваць не трэба было. Толькі сумна там. Усе на работу на дзень разыдуцца, а я ні суседзяў не ведаю, ні схадзіць куды не магу. У вёсцы хоць людзі знаёмыя. Ды і пляменнікам замінаць не хачу — ім сваім жыццём хочацца пажыць.
Наталля Маслоўская кажа, што такая сітуацыя тыповая для сельскай мясцовасці. Дзеці працуюць у горадзе, а старыя бацькі нізашто не хочуць кідаць родную хату. Добра, калі ў моладзі ёсць магчымасць і жаданне прыехаць да пажылых родзічаў на выхадныя. Аднак не кожнаму дазваляюць абставіны, работа.
— Думаю, у такіх выпадках лепш аформіць заяву на сацыяльнага работніка. Гэта не сорамна, калі пра старога паклапоціцца спецыяліст. Куды горш, калі нямоглы чалавек на тыдзень застаецца ў адзіноце.
Без выпадковых людзей
За размовай пад'ехалі да трэцяй і апошняй на сёння вёсачкі Малой Каўпеніцы. Тут ужо працуе іншы сацыяльны работнік. Наталля Серада атрымала прафесію «ў спадчыну» ад сваячкі. Як кажа жанчына, работа не страшная і вядомая, бо раней даводзілася даглядаць бабулю і маці.
Хатка Алены Спірыдонаўны Раманка выглядае акуратнай: вышываныя падушкі, такая ж карціна на сцяне... У маладосці майстрыха і сяброўкам дапамагала ўпрыгожваць інтэр'ер посцілкамі з вышытым узорам. Вось і цяпер бачна, што гаспадыня імкнецца да парадку, хоць і бачыць замест навакольнага свету невыразныя сілуэты.
— Крыўдна, што не магу нават у доме прыбрацца як след. Я мокрай анучкай па дыванах прайдуся, пыл змыю. Але ж без Наташынай дапамогі нават бульбы зварыць не магу, бо наабіраць не атрымліваецца. Летась разам цыбулю ў агародзе пасадзілі. Раней у нас з мужам вялікі ўчастак быў, адной толькі парэчкі сто кустоў. Цяпер жа мужа сем гадоў як няма, і зямля занядбалася. Канешне, прыязджаюць пляменнікі ў госці, у горад да сябе запрашаюць... Пасля мяне гэты дом усё роўна прададуць. Тут ні газу, ні вадаправоду, а гарадскому чалавеку без іх жыць нязручна.
Наталля расказвае, што да некаторых падапечных даводзіцца забягаць некалькі разоў на дзень: праверыць печку, каб не ўчадзелі, паглядзець, ці добра сябе пачуваюць. Пра складанасці працы жанчына не разважае — проста робіць, што трэба. Па яе словах, сама прафесія не церпіць выпадковых людзей. Каб тут працаваць, трэба мець душу.
Рагнеда ЮРГЕЛЬ,
Баранавіцкі раён
Фота Сяргея НІКАНОВІЧА
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
Васілеўскія такія: на Зямлі і ў космасе ліхія!