Вы тут

Стартаваў найбуйнейшы ў краіне медыцынскі форум BеlаrusMеdіса


Ён уключае ў сябе міжнародныя спецыялізаваныя выстаўкі «Ахова здароўя Беларусі—2017», «ФармЭкспа» і «Стаматалогія Беларусі». Арганізатарам выступае Міністэрства аховы здароўя і выставачная кампанія «Тэхніка і камунікацыі» (T&С).


Штогод выстаўка збірае ў Мінску каля 200 вядучых вытворцаў і дыстрыб'ютараў абсталявання, паслуг, медыкаментаў, вырабаў медыцынскага прызначэння з Беларусі і іншых краін. Краінай-партнёрам сёлета выступіла Рэспубліка Індыя, якая прадставіла аб'яднаную экспазіцыю шэрагу індыйскіх кампаній.

Паводле слоў міністра аховы здароўя Рэспублікі Беларусь Валерыя МАЛАШКІ, сучасныя інавацыйныя рашэнні і тэхналогіі актыўна ўкараняюцца сёння ў паліклініках. «Неабходна больш інтэнсіўна развіваць тэхналогіі замяшчэння стацыянара, арганізоўваць папярэдняе абследаванне і далечванне пацыента ў амбулаторна-паліклінічных умовах, развіваць хірургію аднаго дня, адкрываць дзённыя стацыянары ў шпіталях. Менавіта ў паліклініках сёння павінны быць сканцэнтраваны спецыялісты, медыцынскае абсталяванне. Гэта задаволіць на працягу аднаго дня патрэбы пацыента ў дыягностыцы і правядзенні некаторых медыцынскіх умяшанняў, і на выстаўцы «Ахова здароўя Беларусі» можна ўбачыць такое высакаякаснае і сучаснае абсталяванне, якім мы аснасцім нашы паліклінікі і ўстановы аховы здароўя ў найбліжэйшы час», — адзначыў міністр.

На выставе «Ахова здароўя Беларусі-2017».

На адкрыцці мерапрыемства ён таксама не абышоў увагай нядаўні трагічны выпадак у Віцебску. Там 30-гадовая жанчына нарадзіла па месцы жыхарства дзяўчынку, якая ў выніку аспірацыі каляплоднымі водамі загінула. Міністр аховы здароўя заўважыў, што легалізаваць роды на даму ў нашай краіне пакуль рана. У першую чаргу неабходна рухацца па шляху аказання меддапамогі ва ўстановах аховы здароўя. Роды на даму без суправаджэння медработніка, без інфармавання сістэмы аховы здароўя, наогул самастойнае прыняцце такога рашэння бацькамі — злачынства ў дачыненні да дзіцяці. У іншых краінах, дзе падобная практыка ёсць, роды на даму прымаюць афіцыйныя акушэркі, якія маюць спецыяльны сертыфікат, чаго і блізка не было ў дадзенай сітуацыі.

Валерый Малашка закрануў і тэму больш шырокага выкарыстання ў Беларусі медыцынскага страхавання. «Мы сёння кажам, што элементы страхавання павінны прыходзіць у сістэму аховы здароўя. Узаемадзеянне паміж Белдзяржстрахам і ўстановамі аховы здароўя адбываецца досыць паспяхова, што паказала летась сваю эканамічную эфектыўнасць».

Форум працуе па адрасе: пр-т Пераможцаў, 20/2, Футбольны манеж. Час работы: 22 і 23 сакавіка — з 10.00 да 18.00, 24 сакавіка — з 10.00 да 15.00.

Святлана БАРЫСЕНКА

protas@zviazda.by

Фота БЕЛТА

Загаловак у газеце: «Здаровыя» тэхналогіі

Выбар рэдакцыі

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».