Вы тут

Міністэрства адукацыі плануе раіцца з педагогамі і рэпетытарамі


«Глядзець на сістэму адукацыі выключна праз прызму паступлення ў ВНУ, як і ацэньваць эфектыўнасць працы педагагічнага калектыву па колькасці выпускнікоў, якія сталі студэнтамі, недапушчальна», — такую думку выказаў міністр адукацыі Ігар КАРПЕНКА падчас сустрэчы з прадстаўнікамі грамадскасці, якая прайшла на базе гімназіі №1 імя Францыска Скарыны ў Мінску.


— Для мяне асабіста куды больш важна, якіх людзей мы вырасцілі? Ці падрыхтавалі іх да самастойнага дарослага жыцця? Павінна вытрымлівацца наступная формула: грамадзянін — сем'янін — прафесіянал. І калі ўсе тры складнікі ёсць у наяўнасці, значыць, школа справілася са сваёй задачай. Але менавіта выхаванне павінна стаяць на першым месцы, — дадаў міністр.

Тэмай сустрэчы, якую ініцыявала галоўнае адукацыйнае ведамства, стала абмеркаванне стварэння грамадска-кансультацыйнага савета па пытаннях адукацыі. Як зазначыў Ігар Карпенка, грамадскі савет — гэта яшчэ адна форма камунікацыі Міністэрства адукацыі з грамадскасцю: «Ён мог бы абмяркоўваць найбольш важныя сацыяльна значныя пытанні дзяржаўнай палітыкі ў сферы адукацыі, маладзёжнай палітыкі, палітыкі ў галіне аховы дзяцінства, апекі і папячыцельства над непаўналетнімі».

Сярод задач, якія ставяцца перад грамадскім саветам, — аналіз практыкі прымянення нарматыўных прававых актаў і эфектыўнасці прававога рэгулявання ў згаданай сферы. Яшчэ адзін немалаважны момант — экспертыза грамадска значных праектаў дакументаў, распрацаваных Міністэрствам адукацыі. Асаблівае значэнне будзе надавацца тлумачальнай рабоце і фарміраванню пазітыўнай грамадскай думкі па пытаннях дзяржаўнай палітыкі ў сферы адукацыі. Савет стане своеасаблівай пляцоўкай для вызначэння магчымых рызык, якія могуць паўстаць у сістэме адукацыі.

У яго склад увойдуць ад 20 да 25 прадстаўнікоў розных сфер дзейнасці, якія знаёмыя з сістэмай адукацыі па вучобе ў школе ці ВНУ, па роду цяперашняй працы або па сваім бацькоўскім статусе: палітыкі, грамадскія дзеячы, медыйныя персоны, кіраўнікі як дзяржаўных, так і прыватных устаноў адукацыі, настаўнікі і рэпетытары са сталіцы і з рэгіёнаў.

Кола пытанняў, якія трэба будзе абмеркаваць у бліжэйшы час, акрэслілася вельмі хутка: гэта і прыёмная кампанія, і перакладванне бацькамі ўсёй адказнасці за выхаванне сваіх дзяцей на школу, неабходнасць удасканалення педагагічнай адукацыі...

— Калі з дзецьмі будучых настаўнікаў яшчэ вучаць працаваць, то ўзаемадзейнічанню з бацькамі, выстройванню з імі стасункаў, не вучаць. А гэта намнога складаней рабіць, асабліва сёння, у час развязанай «інфармацыйнай вайны» са школай, — выказаў свае думкі першы народны настаўнік Рэспублікі Беларусь, настаўнік фізікі з Магілёўскага дзяржаўнага абласнога ліцэя №1 Валерый БАРАШКАЎ.

Валерый Васілевіч быў першым, каго міністр адукацыі запрасіў у склад савета яшчэ як толькі ўпершыню была агучана ідэя яго стварэння.

Кіраўнік галіны таксама агучыў пытанні, на якія ён сёння спрабуе знайсці адказ.

— Я адчуваю, што ў Мінску педагогі, асабліва настаўнікі-прадметнікі, рашуча супраціўляюцца шостаму школьнаму дню.Так хто яны: педагогі або ўрокадаўцы, якія адпрацавалі свае 20 гадзін у тыдзень і пайшлі са школы? Мы ж не прымушаем усіх пагалоўна кожную суботу сядзець у школе і чакаць бацькоў. Але для іх школьная субота — часта адзіная магчымасць сустрэцца з педагогам-прадметнікам, каб падзяліцца з ім сваімі думкамі і задаць яму свае пытанні, — падкрэсліў Ігар Карпенка. — Хто яшчэ можа пракансультаваць бацькоў лепш, чым педагог, які бачыць поспехі і няўдачы дзіцяці штодня?

На сустрэчы была агучана прапанова запрашаць на пасяджэнні грамадскага савета таксама і вучняў, бо перш, чым штосьці за іх вырашаць, важна пачуць іх думкі і меркаванні. Але каб побач з дзецьмі не было ні дырэктараў, ні настаўнікаў з іх школ! Важна пачуць і меркаванні выпускнікоў папярэдніх гадоў, каб тыя расказалі, як іх падрыхтавала школа да дарослага жыцця і чаго ім сёння не хапае.

Удзельнікі пасяджэння прынялі рашэнне, што ў хуткім часе будзе адпрацаваны юрыдычны статус савета і арганізацыйныя моманты. Затым адбудзецца арганізацыйны сход, які і зацвердзіць савет і яго кіруючы склад.

Ігар Карпенка паабяцаў, што Міністэрства адукацыі створыць усе неабходныя ўмовы для работы грамадска-кансультацыйнага савета па пытаннях адукацыі.

Надзея НІКАЛАЕВА

nіkalaeva@zvіazda.by

Фота Анатоля КЛЕШЧУКА

Загаловак у газеце: Голас, што будзе пачуты

Дадаць каментар

Выбар рэдакцыі

Грамадства

Перадабортнае кансультаванне — гэта перш за ўсё клопат пра жанчыну

Перадабортнае кансультаванне — гэта перш за ўсё клопат пра жанчыну

У ліпені ў Мінску ў трох паліклініках — 10-й, 23-й і 37-й — былі адкрыты кабінеты «За жыццё», дзе праводзяць перадабортнае кансультаванне.

Грамадства

Наколькі складана ў нашай краіне стаць кандыдатам і доктарам навук?

Наколькі складана ў нашай краіне стаць кандыдатам і доктарам навук?

Ці лічыце вы мэтазгодным устанаўленне адзіных патрабаванняў да саіскальнікаў вучоных ступеняў па колькасці апублікаваных навуковых работ незалежна ад галіны навукі?

Культура

«Не выбірай жонку ў агародзе, а шукай у карагодзе»

«Не выбірай жонку ў агародзе, а шукай у карагодзе»

Фалькларыст і этнахарэограф Сяргей Выскварка ведае, што кажа. 

Грамадства

Ці ўсім быць вундэркіндамі?

Ці ўсім быць вундэркіндамі?

Сучасныя малыя ведаюць алфавіт, але не ўмеюць гуляць.