Вы тут

Адкарэкціраваны пэўныя нюансы праходжання ЦТ


Пра змяненні, што былі ўнесены ў Правілы прыёму ў ВНУ і сярэднія спецыяльныя навучальныя ўстановы, стала вядома яшчэ ў пачатку года. У прыватнасці, абітурыенты даведаліся пра тое, што цяпер яны змогуць здаваць на ЦТ чатыры дысцыпліны замест трох (адну з дзяржаўных моў плюс тры профільныя прадметы), а таксама пра павелічэнне тэрміну дзеяння сертыфікатаў ЦТ на два гады. Днямі пастановай урада былі ўнесены карэктывы ў Парадак арганізацыі і правядзення цэнтралізаванага тэсціравання з улікам новых Правілаў прыёму, зацверджаных кіраўніком дзяржавы.


Згодна з гэтым дакументам, у выпадку, калі абітурыент зарэгіструецца для праходжання ЦТ больш чым па чатырох вучэбных прадметах, ён будзе дапушчаны да ўдзелу толькі па чатырох першых прадметах (згодна з графікам правядзення ЦТ), на якія ён зарэгістраваўся. Таксама ў Палажэнні аб парадку арганізацыі і правядзення ЦТ падрабязна рэгламентавана магчымасць выхаду з экзаменацыйнай аўдыторыі падчас здачы ЦТ.

Абітурыенты змогуць выходзіць з аўдыторыі па ўважлівай прычыне (дрэннае самаадчуванне, фізіялагічныя патрэбы і інш.) падчас правядзення ЦТ толькі ў суправаджэнні арганізатара, які забяспечвае правядзенне цэнтралізаванага тэсціравання па-за аўдыторыяй. Пры выхадзе абітурыент пакідае экзаменацыйныя матэрыялы і лісты для рабочых запісаў на сваім працоўным месцы ў аўдыторыі побач з дакументам, які сведчыць яго асобу. Адказны арганізатар перад гэтым у прысутнасці абітурыента правярае камплектнасць пакінутых ім экзаменацыйных матэрыялаў. Час знаходжання абітурыента па-за аўдыторыяй уключаецца ў агульны час праходжання цэнтралізаванага тэсціравання па вучэбным прадмеце, гэта значыць, што ніхто не будзе персанальна падаўжаць экзамен для асобна ўзятага чалавека. Аб гэтым абітурыент павінен быць папярэджаны загадзя, да выхаду з аўдыторыі, каб узважыць усе «за» і «супраць». Факт выхаду за межы аўдыторыі фіксуецца адказнымі арганізатарамі ў пратаколе правядзення цэнтралізаванага тэсціравання.

Пасля вяртання абітурыента ў аўдыторыю для праходжання ЦТ адказны арганізатар паўторна правярае ў яго прысутнасці камплектнасць экзаменацыйных матэрыялаў, якія знаходзяцца на рабочым месцы абітурыента.

Таксама ў абноўленым Парадку арганізацыі і правядзення ЦТ ёсць і пункт, які ўлічвае тую акалічнасць, што сертыфікаты цяпер будуць дзейнічаць два гады. Напрыклад, абітурыент можа не паступіць у бягучым годзе ў ВНУ, згубіць ці сапсаваць свой сертыфікат, а на наступны год вырашыць скарыстацца сваімі мінулагоднімі вынікамі ЦТ. У гэтым выпадку ён зможа звярнуцца ў Рэспубліканскі інстытут кантролю ведаў, каб атрымаць дублікат сертыфіката. Дублікаты будуць прызнавацца сапраўднымі да канца каляндарнага года, які ідзе за годам, у які здавалася цэнтралізаванае тэсціраванне.

Надзея НІКАЛАЕВА

nіkalaeva@zvіazda.by

Фота Марыны БЕГУНКОВАЙ

Загаловак у газеце: Ці выходзіць з экзаменацыйнай аўдыторыі?

Дадаць каментар

Выбар рэдакцыі

Грамадства

Як мультымедыйныя тэхналогіі матывуюць вучняў?

Як мультымедыйныя тэхналогіі матывуюць вучняў?

29—30 лістапада ў Мінску пройдзе міжнародная спецыялізаваная навукова-тэхнічная выстава-форум «Інфармацыйныя тэхналогіі ў адукацыі» (ІTE-2017). 

Грамадства

Колькі працягнецца «мёртвы» сезон?

Колькі працягнецца «мёртвы» сезон?

Што стрымлівае развіццё турыстычна-рэкрэацыйнага парку «Аўгустоўскі канал».

Калейдаскоп

5 фільмаў супраць сезоннай хандры

5 фільмаў супраць сезоннай хандры

Раніца ўжо дыхае ў спіну зімовым холадам.