Чвэрць расіян лічыць, што Сонца круціцца вакол Зямлі

Кожны чацвёрты жыхар Расіі перакананы, што гэта Сонца круціцца вакол Зямлі, а не наадварот. Пра гэта паведамляе газета «Известия» са спасылкай на словы Валерыя Фёдарава, гендырэктара Усерасійскага цэнтра вывучэння грамадскай думкі.

«Па даных апытання, чвэрць расіян верыць у тое, што не Зямля круціцца вакол Сонца, а Сонца вакол Зямлі. Гэта сацыялагічны факт, які мы выявілі, затым пераправерылі і зноў пацвердзілі», — сказаў Валерый Фёдараў.

Кіраўнік цэнтра прызнаўся, што быў уражаны адказам часткі сваіх суайчыннікаў на гэтае пытанне. Ён не ўдакладніў, як шмат людзей было апытана і калі праходзіла даследаванне.

У 2011 годзе паведамлялася аб выніках падобнага даследавання. Тады аб вярчэнні Сонца вакол Зямлі сказала трэць рэспандэнтаў (32%). Таксама 11% апытаных былі ўпэўненыя, што радыеактыўнае малако можна зрабіць бяспечным, калі яго проста пракіпяціць.