Над сталічным мікрараёнам Уручча-6 плылі клубы дыму. І раз-пораз над вуліцай Гінтаўта ў неба ўзмывалі струмені вады са спецыяльных рукавоў. Але прычынай гэтага быў не пажар. На тэрыторыі пажарна-аварыйнай выратавальнай часці №40 навучэнцы васьмі сталічных вышэйшых навучальных устаноў спаборнічалі ў гарадскім конкурсе па асновах бяспекі жыццядзейнасці "Студэнты. Бяспека. Будучыня".
- Мы праводзім спаборніцтвы ў пяты раз, - расказвае начальнік аддзела сацыякультурнай дзейнасці Цэнтра прапаганды і сацыякультурнай дзейнасці Мінскага гарадскога ўпраўлення МНС Аляксандр Пурыновіч. - Яны разлічаны на два дні. Графік мы выбудавалі так, каб за адзін дзень студэнты здолелі на сабе адчуць цяжар работы ратаўнікоў. Гэта і аказаць першую медычную дапамогу, і выцягнуць чалавека з задымленай кватэры, і выразаць з дапамогай гідраўлічнага інструмента пацярпелых пасля дарожна-транспартнага здарэння, і патушыць пажар. Між іншым, манекены, якія выкарыстоўваюцца ў якасці пацярпелых, важаць каля сямідзесяці кілаграмаў - усё як і ў рэальнасці. Баёўка таксама сапраўдная, з масай больш за трыццаць кілаграмаў. Другі ж дзень прысвечаны праектам творчым. Гэта і тэставанне па ведах АБЖ, і конкурс на лепшы відэаролік сацыяльнай рэкламы...
Навыкі, якія навучэнцы дэманструюць на спаборніцтвах, могуць спатрэбіцца і ў рэальным жыцці. Так здарылася з магістрантам БДУІР Аляксандрам Андрайчуком.
- Аднойчы ехаў у аўтобусе і заўважыў, што жанчыне стала блага. Пакуль даехала машына "хуткай", аказваў небарацы першую дапамогу. А навучыўся гэтаму на конкурсе, у якім удзельнічаю ўжо ў чацвёрты раз.
А Кацярыне Замесавай, якая вучыцца ў БДУКІ, давялося нават ратаваць чалавека з палаючага аўтамабіля. ДТЗ адбылося прама на яе вачах. Мініяцюрная дзяўчына разам з прахожым выцягнулі пацярпелых з разбітага транспарту, і прама за іх спінамі машына загарэлася...
Валяр'ян ШКЛЕННІК
Фота Надзеі БУЖАН
Фіналістка праекта «Акадэмія талентаў» на АНТ — пра творчасць і жыццё.
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.