Рост рэальнай заработнай платы — 100,5% да студзеня-лютага мінулага года — дасягнуты за кошт павышэння прадукцыйнасці працы. Пра гэта падчас пасяджэння Прэзідыума Савета Міністраў паведаміў прэм'ер-міністр Беларусі Андрэй Кабякоў.
«У цэлым пастаўленыя ў рамках прагнозу на студзень—сакавік гэтага года задачы выконваюцца. Эканоміка паступова выходзіць з рэцэсіі, валавы ўнутраны прадукт на 0,3% перавысіў узровень мінулага года пры прагнозе, як вы памятаеце, 99,6%. Вырасла і прадукцыйнасць працы па ВУП 100,7% пры прагнозе 99,7%, — адзначыў беларускі прэм'ер. — Станоўчы ўплыў аказаў знешні попыт, які расце: тэмп росту экспарту тавараў і паслуг у студзені-лютым склаў 117,4% да аналагічнага ўзроўню мінулага года. Чыста па таварах экспарт вырас на 19,9%, а без уліку нафты і нафтапрадуктаў і калію — без сыравінных тавараў — тэмп росту склаў 131%. Знешнегандлёвыя патокі збалансаваныя, сальда станоўчае — 56,1 мільёна долараў ці 0,7% да ВУП».
Пры гэтым, па словах кіраўніка ўрада, аднаўленне эканамічнага росту забяспечана без урону для макраэканамічнай стабільнасці. Унутраны валютны рынак функцыянуе стабільна, захоўваецца тэндэнцыя чыстага продажу насельніцтвам валюты. Так, за першы квартал прададзена амаль 500 мільёнаў долараў. Захоўваецца станоўчая дынаміка і па рублёвых дэпазітах насельніцтва: за тры месяцы прыраслі на 6,5% (плюс 192 мільёны рублёў).
Замацоўваецца станоўчая тэндэнцыя і ў асноўных галінах эканомікі. У сакавіку прамысловая вытворчасць прырасла яшчэ на 1,2 працэнтнага пункта. Па выніках студзеня— сакавіка мы выйшлі на ўзровень 104,3% да мінулага года. «З ростам спрацавалі ўсе канцэрны і міністэрствы, за выключэннем, па вядомых прычынах, канцэрна Белнафтахім», — адзначыў Андрэй Кабякоў і дадаў, што пры гэтым ёсць спадзяванне на паляпшэнне сітуацыі «з улікам дасягнутых на мінулым тыдні дамоўленасцяў з расійскімі партнёрамі па газе і нафце». «Важна, што ў эканоміцы выйшлі на рост рэальнай заработнай платы — 100,5% да студзеня-лютага 2016 года. І гэты рост забяспечаны за кошт прадукцыйнасці працы. Меры па збалансаваным росце заработнай платы на ўстаноўлены кіраўніком дзяржавы ўзровень — 1000 рублёў — нараўне са сніжэннем выдаткаў і павышэннем эфектыўнасці ва ўсіх сферах эканомікі дазволяць выйсці на запланаваны ўзровень рэальных існуючых грашовых даходаў насельніцтва», — дадаў прэм'ер-міністр.
«У першым квартале эканоміка выйшла на ўзровень, які запланаваны на першае паўгоддзе: па прагнозе ВУП першага паўгоддзя павінен быць 100,2%», — падсумаваў Андрэй Кабякоў.
Вераніка ПУСТАВІТ
У парадку дня — зацвярджэнне Канцэпцыі нацбяспекі і Ваеннай дактрыны.
Фіналістка праекта «Акадэмія талентаў» на АНТ — пра творчасць і жыццё.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
