20 Люты, аўторак

Вы тут

Цырымонія адкрыцця выстаўкі "ТІБО-2017" адбылася ў Мінску


Без лічбавых тэхналогій зараз немагчыма ўявіць ніводную сферу жыцця. Напрыклад, яшчэ не так даўно высакахуткасны мабільны інтэрнэт або падарожжа ў віртуальную рэальнасць здавалася нечым з разраду фантастыкі, а ўжо сёння адпаведныя прылады робяцца ў прамысловых маштабах. Цікавыя распрацоўкі ў сферы электронікі дэманструюцца на гэтым тыдні на выстаўцы «ТІБО-2017».


Першы намеснік прэм'ер-міністра Васіль Мацюшэўскі зачытаў падчас урачыстай цырымоніі прывітанне Прэзідэнта Беларусі Аляксандра Лукашэнкі гасцям і ўдзельнікам XXІV Міжнароднага спецыялізаванага форуму па тэлекамунікацыях, інфармацыйных і банкаўскіх тэхналогіях «ТІБО-2017».

— Мерапрыемства ў апошнія гады вельмі маштабнае. Безумоўна, пляцоўка «ТІБО» ў Беларусі карыстаецца заслужаным аўтарытэтам і ў адпаведных кампаній, і ў нашых калег па ЕАЭС, — падкрэсліў Васіль Мацюшэўскі.

— Сёлета ў выстаўцы ўдзельнічаюць больш за сто кампаній з 17 краін свету, — зазначыў міністр сувязі і інфарматызацыі Сяргей Папкоў. — Мы імкнуліся прывезці сюды самыя прасунутыя рашэнні ў галіне тэлекамунікацый.

Прыкметная чарга сабралася каля стэнда Міністэрства культуры. З дапамогай шлема віртуальнай рэальнасці кожны ахвотны мог павандраваць па Крэўскім або Гальшанскім замку. І гэта пры тым, што апошні раз зайсці ў сапраўдныя замкі (да таго, як яны ператварыліся ў руіны) можна было больш за сто гадоў таму — яшчэ да Першай сусветнай.

— Мы карысталіся архіўнымі дакументамі, з дапамогай якіх высветлілі, як выглядалі гэтыя будынкі ў XVІ—XVІІІ стагоддзях, — расказвае прадстаўнік Нацыянальнага гістарычнага музея Алег Свірыдовіч. — Шлем працуе ў камплекце са смартфонам і спецыяльнымі акулярамі. Плануем выкарыстоўваць нашу распрацоўку ў адукацыйных мэтах. Адна справа разглядаць ілюстрацыі ў падручніку і зусім іншая — пахадзіць па самім замку, хай нават і віртуальнай копіі. Плануем стварыць панарамы яшчэ некалькіх замкаў Беларусі.

Каля самага ўваходу ўжо па традыцыі быў усталяваны стэнд Мінгарвыканкама. Сярод іншага, на ім бацькам дэманстравалі, як працуе электронная картка школьніка.

— Ад верасня 2013 года мы паступова ўкараняем яе ў сталічнай сістэме адукацыі, — гаворыць Наталля Сакалова, начальнік цэнтра інфармацыйных рэсурсаў сістэмы рэгіянальнай адукацыі Мінскага гарадскога інстытута развіцця адукацыі. — Спярша яе на ўзбраенне ўзялі 15 школ, і за гэты час далучыліся яшчэ 66. Развіваем праект па двух кірунках. Наша прылада працуе як звычайная плацежная картка, якая прывязваецца да рахунку бацькі, які можа паставіць ліміт расходу грошай. Яна ж служыць пропускам у школу, дазваляе аўтаматызаваць працу бібліятэкі, заплаціць за харчаванне, замяняе даведку аб навучанні, якая дае права на бясплатны праезд. Дзякуючы карткам дзейнічае і анлайн-сэрвіс «Электронны дзённік». Яго выкарыстоўваюць 38 школ Мінска. Пастаўленую адзнаку школьніку яго бацькі могуць адразу пабачыць, бо на тэлефон прыйдзе адпаведнае паведамленне. Вось так навучальны працэс становіцца адкрытым.

Сваю апошнюю распрацоўку прадэманстраваў і холдынг «Гарызонт». Гэта 65-цалёвая сэнсарная сістэма H-BOARD з 4К-разрозненнем. Велізарная «разумная» дошка можа выкарыстоўвацца ў адукацыйных установах ці падчас правядзення прэзентацый. Але разам з тым яна можа працаваць і ў рэжыме звычайнага тэлевізара або планшэта. Кіруецца гаджэт дзвюма аперацыйнымі сістэмамі.

Айчынныя арганізацыі прапаноўвалі і не менш цікавыя прылады для дома.

— Наша сістэма хатняга відэаназірання працуе пры дапамозе wі-fі, — кажа прадстаўнік адной з кампаній Уладзіслаў. — Мантаж яе вельмі просты і не патрабуе значных капіталаўкладанняў. З дапамогай праграмы для смартфона можна ў любы момант паглядзець, што адбываецца ў полі зроку камеры, або запісаць відэа ў архіў. Ці зрабіць фотапастку — скажам, нехта адчыніў дзверы, а на ваш тэлефон тут жа прыйдзе адпаведнае паведамленне і здымак наведніка. Камеры працуюць у HD-якасці.

Валяр'ян ШКЛЕННІК

schklennik@zviazda.by

Фота Надзеі БУЖАН

Загаловак у газеце: Зроблена з розумам

Дадаць каментар

Выбар рэдакцыі

Грамадства

Ужо каторы год жыхары змагаюцца супраць агульнай паркоўкі ў двары

Ужо каторы год жыхары змагаюцца супраць агульнай паркоўкі ў двары

Гаспадары двара расказваюць, што раней тры заезды ў двор перакрывалі дэкаратыўныя металічныя вароты, унутр аўтамабілі маглі трапіць толькі праз вялікую арку з боку вуліцы Янкі Купалы.

Спорт

Штотыднёвы спартыўны агляд «Звязды»

Штотыднёвы спартыўны агляд «Звязды»

Пра соты фінал у кар'еры Максіма Мірнага, поспехі беларускіх самбістаў на дамашнім турніры і выступленні нашых гандбольных клубаў у Еўропе.

Культура

Cабраны пераклады верша Янкі Купалы «А хто там ідзе» на 101 мову свету

Cабраны пераклады верша Янкі Купалы «А хто там ідзе» на 101 мову свету

«Беларуская Энцыклапедыя імя Петруся Броўкі» адправіла ў друкарню выданне «А хто там ідзе: на мовах свету».

Палітыка

Прэзідэнт паўдзельнічаў у выбарах і адказаў на пытанні журналістаў

Прэзідэнт паўдзельнічаў у выбарах і адказаў на пытанні журналістаў

За каго аддаць свой голас, якога кандыдата лепей абраць у дзень выбараў у мясцовыя Саветы дэпутатаў?