Наша краіна праводзіць актыўную знешнюю палітыку, для Беларусі няма нецікавых партнёраў. Літаральна кожная дзяржава свету ўяўляе для нас пэўны інтарэс, амаль для кожнай у нас ёсць што прапанаваць.
— У штогадовым Пасланні беларускаму народу і Нацыянальнаму сходу мною выразна абазначаны шляхі далейшага развіцця краіны і павышэння дабрабыту грамадзян, — нагадаў кіраўнік дзяржавы Аляксандр Лукашэнка ў пачатку мерапрыемства. — Менавіта на дасягненне гэтай мэты перш за ўсё накіравана наша знешняя палітыка.
Зараз Беларусь старшынствуе ў Цэнтральна-Еўрапейскай Ініцыятыве. Прэзідэнт Беларусі ўпэўнены: дзякуючы гэтаму ў нас з'явіліся новыя магчымасці для больш шырокага ўцягнення дзяржавы ў еўрапейскія інтэграцыйныя працэсы. Не выпадкова «тытульнай» тэмай беларускага старшынства выбрана прасоўванне сумяшчальніцтва ў Вялікай Еўропе.
— Пагадзіцеся, у кантэксце цяперашняй нестабільнай абстаноўкі і беспрэцэдэнтных выклікаў яна мае асаблівае значэнне, — адзначыў беларускі лідар. — Бягучы год знамянальны тым, што ў Мінску пройдзе сесія Парламенцкай асамблеі Арганізацыі па бяспецы і супрацоўніцтве ў Еўропе. Падзея для нашай краіны, ды і для ўсёй Еўропы, важная і дужа адказная. На сесіі плануецца абмеркаваць пытанні ўзаемнага даверу і супрацоўніцтва ў рэгіёне АБСЕ. Прымаючы высокі форум, Беларусь мае магчымасць пачаць канструктыўны дыялог з прадстаўнікамі многіх еўрапейскіх дзяржаў.
Беларусь у стане забяспечыць замежным партнёрам выхад на велізарны рынак Еўразійскага эканамічнага саюза. Па словах кіраўніка беларускай дзяржавы, гэта, несумненна, павышае яе прыцягальнасць у гандлёва-эканамічным і інвестыцыйным плане.
Аляксандр Лукашэнка паведаміў замежным дыпламатам, што бягучы год аб'яўлены ў нашай краіне Годам навукі:
— Задачы пастаўлены грандыёзныя. Па прыярытэтных для сябе кірунках даследаванняў Беларусь плануе праз дзясятак гадоў увайсці ў лік дзяржаў-лідараў. У нас захавалася і развіваецца магутная акадэмічная навука, прадстаўленая дзясяткамі буйных даследчых цэнтраў і вышэйшых навучальных устаноў. Спадзяёмся на вашу актыўную дапамогу ў арганізацыі навуковага і студэнцкага абмену, наладжванні ўніверсітэцкіх сувязяў і рэалізацыі сумесных навукова-тэхнічных праектаў.
Кіраўнік дзяржавы звярнуў увагу: у гэтай зале прадстаўлены амаль усе рэгіёны свету.
— Беларусь высока цэніць партнёрства з вашымі краінамі, — запэўніў ён. — Мы гатовы прымаць вас на ўсіх узроўнях і забяспечваць спрыяльныя ўмовы для рэалізацыі канструктыўных ідэй і прапаноў.
Даверчыя лісты кіраўніку дзяржавы ўручылі паслы Азербайджана, Ірана, Бельгіі, Нідэрландаў, Нарвегіі, Новай Зеландыі, Мальтыйскага Ордэна, Арменіі, Грэцыі, Руанды, Ізраіля, Украіны.
— Беларусы здаўна жывуць у добрасуседстве з украінцамі, — адзначыў Прэзідэнт. — Нас аб'ядноўваюць шматвекавая гісторыя, падобная культура, а таксама вельмі шчыльныя эканамічныя сувязі. Прадаставіўшы мінскую перамоўную пляцоўку для ўрэгулявання сітуацыі ва ўсходняй Украіне, мы будзем рабіць усё неабходнае для аднаўлення там міру і спакою. У гэтым плане вы нам можаце даверыцца.
Як адзначыў беларускі лідар, Беларусь заўсёды выбудоўвала адносіны з Азербайджанам у духу сяброўства і ўзаемапавагі. Аляксандр Лукашэнка звярнуў увагу, што сумеснымі намаганнямі рэалізаваны шэраг буйных праектаў у галіне вытворчай кааперацыі. Трэба максімальна выкарыстоўваць той патэнцыял, які ёсць, і рухацца далей у гэтым кірунку.
Развіццё двухбаковага супрацоўніцтва з Арменіяй для нас уяўляе асаблівы інтарэс. Аляксандр Лукашэнка звярнуў увагу: партнёрства ў рамках Еўразійскага эканамічнага саюза адкрывае новыя магчымасці для павелічэння нашага тавараабароту, дыверсіфікацыі паставак і ўвогуле развіцця і паглыблення адносін.
З задавальненнем кіраўнік краіны адзначыў актывізацыю кантактаў на палітычным і гандлёва-эканамічным узроўнях з Бельгіяй. Наша дзяржава гатова працягнуць рэалізацыю сумесных праектаў у лагістыцы, энергетыцы, хімічнай і харчовай прамысловасці...
— Узаемавыгадныя сувязі беларускі бок мае намер развіваць з Грэчаскай Рэспублікай, — заявіў Аляксандр Лукашэнка. — Значны патэнцыял для іх пашырэння маецца ў гандлёва-эканамічнай галіне. Для гэтага сумеснымі намаганнямі нам неабходна выпрацаваць доўгатэрміновыя механізмы і эфектыўныя інструменты супрацоўніцтва.
Па словах Прэзідэнта, канструктыўны характар маюць адносіны Беларусі з Мальтыйскім Ордэнам. Ён выказаў словы падзякі за тую ролю, якую адыгрывае гэта краіна, удзельнічаючы ў рэалізацыі рознага кшталту гуманітарных праектаў у Беларусі.
— У дзясятку асноўных эканамічных партнёраў Беларусі традыцыйна ўваходзяць Нідэрланды. Мы падтрымліваем рашэнне аб адкрыцці аддзялення вашага Пасольства ў Мінску. Мяркую, што больш блізкае знаёмства нідэрландскіх дыпламатаў з нашай краінай самым станоўчым чынам паўплывае на ўмацаванне нашых сяброўскіх сувязяў, — упэўнены Аляксандр Лукашэнка.
Разам з тым наша краіна зацікаўлена ў адкрытым і ўзаемапаважлівым дыялогу з Нарвегіяй, якая з'яўляецца адным з найбуйнейшых імпарцёраў нашай прадукцыі сярод скандынаўскіх краін. Разам з тым узаемны гандаль можна пашырыць.
— З прыбыццём у Мінск Пасла Дзяржавы Ізраіль мы ўскладаем вялікія надзеі на каапераванне ў галіне высокіх тэхналогій, адукацыі, аховы здароўя, навукі і культуры, — сказаў Прэзідэнт. — Тут у нас з вамі дастаткова памочнікаў, бо многіх беларусаў і ізраільцян аб'ядноўваюць цесныя, часам сямейныя сувязі.
Вітаючы назначэнне новага Пасла Ірана, кіраўнік дзяржавы падкрэсліў: гэта краіна з'яўляецца важным партнёрам Беларусі ў Азіяцкім рэгіёне. У выбудоўванні адносін з Новай Зеландыяй Беларусь гатова падтрымаць з задавальненнем любыя ініцыятывы з боку гэтай краіны. Што да супрацоўніцтва з Руандай, то, як звярнуў увагу Аляксандр Лукашэнка, тут ёсць «нерэалізаваныя магчымасці ў прамысловасці, сельскай гаспадарцы, адукацыі».
Напрыканцы Прэзідэнт пажадаў паслам поспехаў у выкананні высокай дыпламатычнай місіі.
Надзея ЮШКЕВІЧ
Набор на бюджэтныя месцы павялічыцца.
Колькі ж каштуе гэты важны кампанент здаровага рацыёну зараз?
Не выявіць ні секунды абыякавасці.
